Onondaka Mbokumanuhula

Kuhinangela omuvo omuwa ankho ukala novanthu va Jeova, momaliongiyo, no movionge, no movilinga viokuivisa, ine etompho limwe ewa wakelele nalio nomukuatate wove? Ove kualimbuilwe Jeova. Iya Jeova nae kekulimbuilwe. Jeova uhinangela unene ovilinga oviwa ankho umulingila. Iya uhanda unene okukukuatesako opo ukondoke kwe.

Jeova wati: “Ame muene mandyikaovola onongi mbange, andyikembutekula. Mandyikalisa onongi mbange, ngomunthita wavasa onongi mbae ankho mbeliyapauka, iya embutuala pokulia.”—Ezequiel 34:11, 12.