Ouhamba wa Huku Otyityi?

OVILINGA via Jesus viokuivisa ankho vina osapi patyi? Jesus wapopile okuti osapi yovilinga viae ankho Ouhamba wa Huku. (Lucas 4:​43) Jesus wapitaululile ovikando ovinyingi ondaka Ouhamba wa Huku tyina ankho alongesa ovanthu. Okuti ovanthu vakalele tyanguanguana? Okuti vapulile Jesus oityi Ouhamba wa Huku? Au. Mono Evandyeliu mutupu omapulo atyo oo. Okuti ovanthu ovo, Ouhamba wa Huku ankho veunoñgonokale?

Tyotyili, Ovihonekwa viokohale vina ankho ova Judeu vahumba unene, ankho vilekesa nawa oityi Ouhamba wa Huku, netyi maukalinga. Ngetyi tyalingile ova Judeu, nonthue hono tupondola okunoñgonoka vali nawa Ouhamba, wa Huku, inkha tutanga nokulilongesa Ombimbiliya. Tutalei ononthele epanduvali Ombimbiliya itulongesa konthele Youhamba wa Huku. Ononthatu mbotete, ankho mbuiweale no va Judeu vokononthiki mba Jesus, no vokohale etyi Jesus nkhele eheneye. Ononkhuavo ononthatu mbulandulako, mbapopilwe na Kristu ine ono apostolu mbae mokueenda kuotyita tyotete. Onthele yahulililako ikahi nokuyandyuluka nawa mononthiki mbetu.

1. Ouhamba wa Huku, outumini wotyotyili maukakalako apeho. Eulo liotete Liombimbiliya, lipopia okuti Huku ankho matumu omuyovoli opo ayovole ovanthu vokuna ekolelo. Omuyovoli oo, wihanua okuti ‘ombuto’ ankho makamanako ovitateka aviho viaetwa noumphuki wa Andau, na Eva, na Satanasi. (Gênesis 3:​15) Konyima, Ohamba David ankho wokuna ekolelo, atolelwa otyipuka tyimue tyihambukiswa unene konthele ‘yombuto’ oyo, ine Mesiya. Wapopililue okuti Mesiya oo, makakala Ohamba Youhamba wa Huku. Outumini oo, maukelikalela nomautumini omakuavo aeho. Tupu maukakalako apeho.​—⁠2 Samuel 7:​12-14.

2. Ouhamba wa Huku maukanyimako omautumini aeho ovanthu. Omuuli David wapelue emonekelo limue omu amona omautumini ouye maekelipinga koutumini mokueenda kuomanima, alo mononthiki mbetu. Tala onthyulilo ihambukiswa yemonekelo olio: “Kononthiki mbovatumini ovo [ovanthu vahulililako], Huku yo keulu makavialeka ouhamba umue uhakahanyaunuako vali. Iya Ouhamba oo kamaukapita pomaoko elongo ekuavo. Maukahanyaunako omautumini atyo aeho nokuenyimako. Iya ouhamba oo, ngao ukakalako apeho.” Ngotyo, omauhamba aeho, ine omautumini ouye uno, kumue novita viavo, nononkhumbi, noungangala wavo, mavikanyimuako apeho. Ngetyi tyalekesa oversikulu yalandulako meulo lia Daniele, Ouhamba wa Huku wavialekua keulu, mahi apa katutu mauya okutumina kombanda yoohi aiho. (Daniel 2:​44, 45) Outumini oo, o wotyotyili, tupu oo vala maukatumina kombanda yoohi.a

3. Ouhamba wa Huku maukamanako ovita, nomauvela, nondyala, alo umue ononkhia. Omaulo Ombimbiliya alekesa oityi Ouhamba wa Huku maukalinga pano pohi. Outumini oo, maukalinga etyi omautumini ovanthu kaekahi nokulinga ine kaetyivili okulinga. Sokolola omauta aeho ovita okuhanyaunuako apeho! ‘Huku makamanako ovita alo apa paoyela o ohi.’ (Salmo 46:⁠9) Kamakukakala vali onondotolo, no nosipitali, ine omauvela. “Nawike omunthu kombanda yoohi makati: ‘Ame ndyivela.’” (Isaías 33:​24) Kamakukakala vali ondyala, nokulia kuhehi, ovanthu kamavakankhia vali nondyala. ‘Makukakala ovilia ovinyingi kombanda yoohi.’ (Salmo 72:​16) Kamakukakala vali omitambo, omalangalo, onondyuo mbokupaka ovivimbi, ine ononkhumbi mbutundilila kovipuka ovio. Ondyale yetu, ononkhia, maikanyimuako. Huku ‘makanyimako ononkhia apeho, iya Ohamba Tatekulu Jeova, makasekuna ononkhuka kovipala aviho.’​—⁠Isaías 25:⁠8.

4. Omutumini Wouhamba wa Huku, waholovonua na Huku. Mesiya haeko muene weliholovona, tupu kaholovonenwe novanthu ovakuankhali. Mesiya waholovonua muene na Jeova Huku. Omanyina Mesiya na Kristu, alekesa okuti oe waholovonua na Huku. Omanyina oo evali, ahangununa okuti ‘Omunakwa.’ Moluotyo, Ohamba oyo, yanakwa ine yaholovonwa na Jeova pala otyilinga tyae tyakolela. Huku wapopia konthele yae okuti: ‘Tala! Omuumbili wange ndyikahi nokukuata! Omuholovonua wange, ame napanda! Nemupaka ospilitu yange. Oe malongesa ovilongo ouviuki.’ (Isaías 42:⁠1; Mateus 12:17, 18) Omupakeko wetu oe vala utyii nawa Omutumini patyi tuesukisa.

5. Omutumini Wouhamba wa Huku walekesa kovanthu aveho okuti watokala okuhumbwa. Jesus omu Nazale walekesile okuti oe Mesiya walaelue. Jesus watyitilue mombunga Huku aholovonene. (Gênesis 22:18; 1 Crônicas 17:11; Mateus 1:⁠1) Etyi Jesus ankho ekahi pano pohi, wafuisilepo omaulo omanyingi konthele ya Mesiya ahonekwa omanima omanyingi kohale. Tupu, Jesus wanoñgonokua okuti o Mesiya tunde keulu. Otyo tyaendele ñgeni? Huku wapopile keulu okuti Jesus Omona Wae muene. Iya onoandyu nambo ambulekesa okuti Jesus oe Mesiya walaelue. Tupu, Jesus walingile omahuviso kolupala luovanthu ovanyingi nononkhono mba Huku.b Jesus walekesile ovikando ovinyingi okuti oe makakala Omutumini omuwa. Jesus una epondolo liokuvatela ovanthu, nehando liokutyilinga. (Mateus 8:​1-3) Jesus ankho una otyali, nokankhenda, nokuakola omutima, nomutima weliola. Atyiho Jesus alinga etyi ankho ekahi pano pohi, tyahonekwa Mombimbiliya opo ovanthu aveho vatange.

6. Ouhamba wa Huku una ovanthu 144.000 mavakatumina na Kristu. Jesus wapopile okuti ovakuavo, okukutikinyamo ono apostolu mbae, mavakatumina nae keulu. Jesus waihanene ovanthu ovo okuti ‘okahambo okatutu.’ (Lucas 12:​32) Konyima, apostolu João atolelwa okuti okahambo oko okatutu kena ovanthu 144.000. Ovanthu ovo vena otyilinga keulu tyokukatumina kumue na Kristu ngo nohamba, novanakwa.​—⁠Revelação (Apocalipse) 5:​9, 10; 14:​1, 3.

7. Ouhamba wa Huku ukahi pahe nokutumina keulu, apa katutu mauhimbika okutumina kombanda yoohi aiho. Onthele ei yahulililako, oyo ihambukiswa vali tupondola okulilongesa. Ombimbiliya ipopia unene okuti Jesus wavialekua Kouhamba keulu. Pahe, Jesus ukahi nokutumina keulu, apa katutu meya okutumina oohi aiho opo afuisepo omaulo tuapopia pombanda. Mahi, oñgeni matukala nonthumbi yokuti Ouhamba wa Huku ukahiale nokutumina? Iya onalupi mauhimbika okutumina kombanda yoohi?

[Onondaka Poutoi]