Opi Matuvasi Omakumbululo
“Hamue tuatetulula otyitateka ‘tyoñgeni’ matutaindya onombongo opo tulitekule, nokutekula ombunga. Tupu, hamue tuvahona nokuna onongombe ononyingi, no nomakina ononene mbokuhika oviimbo, nokulia okunyingi, ine ovinyango oviwa vienima. Mahi nkhele pena epulo liati, ‘omokonda yatyi’ tuatungilwa. Omokonda yatyi ovanthu vahatekela momalumono? Oityi vahanda?” —David G. Meyers professor de psicologia no Colégio Esperança, Holanda, Michigan, Estados Unidos da América.
OÑGENI ove mokumbulula omapulo alingwa nomulongesi oo? Ovanthu vamue vehole okupula inkha tyesukisa umue okutaindya omuvo pala okuovola omakumbululo. Mahi, okuhasuku nomapulo atyo oo, tyelifwa nokukala tyahasukile nokamanya okatutu kanyingila mosapato yove. Ove upondola okutualako nokueenda, mahi kumakala noungendi uhambukisua.
Inkha nthiki imue welipulile omokonda yatyi tuatungilwa, haveko vala. Ovanthu vamue vokulilongesa konthele Yonkhalelo Yovanthu Mouye, vati okuti ovanthu ovanyingi movilongo ovinyingi vekahi nokusoka “omokonda yatyi ovanthu vatungilwa.”
Inkha uhanda okukala nombembwa yotyotyili momutima, wesukisa okuvasa omakumbululo omapulo aa etatu akolela unene.
Opi tuatunda?
Omokonda yatyi Huku atungila ovanthu?
Oityi tyitukevelela komutue?
Opi upondola okuvasa omakumbululo otyotyili omapulo oo akolela? Katyasukisile okusoka unene opo ukumbulule ine okuhatekela kounongo wovanthu. Ononthele mambulandulako mambuave omakumbululo avasiwa Mondaka ya Huku, Ombimbiliya. Tukuita uikule Ombimbiliya yove, olitalelako muene oityi oyo ipopia.
[Olutalatu Lualandwa pefo 2]
COVER: Beach background: © Andoni Canela/age fotostock