Omapulo Alingwa Novatangi
Momukanda apostolu Paulu ahonekelele ova Hebreu, wapopia konthele “yokupaka omaoko.” Okuti ankho upopia etyi tyilingwa pokuholovona ovakulu vewaneno ine otyipuka otyikuavo tyelikalela?—Hebreus 6:2.
Petupu ehunga liokupatana. Mahi, tyafuile Paulu ankho upopia konthele yokupaka omaoko pala okuava ospilitu.
Ombimbiliya pamue ipopia okupaka omaoko, tyina ipopia konthele yovanthu vapewa ovilinga via Huku. Moisesi “wapakele okuoko kuae” ku Josue etyi aholovonwa opo emupinge kounkhalamutwe. (Deuteronômio 34:9) Mewaneno lio Vakristau, ovalume vamue vafuapo, ankho vapakwa omaoko pala okupewa otyilinga mewaneno. (Atos 6:6; 1 Timóteo 4:14) Paulu walondola ovakulu konthele yokukanyauka okupaka omaoko komunthu.—1 Timóteo 5:22.
Mahi, Paulu walondolele Ovakristau ova Hebreu, “vatualeko okukula mopamphepo” mokuayekapo “ondongeso yotete.” Apopi konthele “yokulivela mokonda yokuasapo ovilinga vieta ononkhia, no yekolelo mu Huku, no yelongeso lio nombatisimu, nokupaka omaoko.” (Hebreus 6:1, 2) Okuti Ovakristau okukala ovakulu vewaneno, otyo otyipuka tyotete tyivelunda okutualako okukula mopamphepo? Au. Mahi, ovakuatate vokuapia nawa mopamphepo vesukisa okuovola okukala ovakulu vewaneno nokupanda otyilinga otyo.—1 Timóteo 3:1.
Mahi, tupu ankho vapaka omavoko mokonda yotyipuka otyikuavo. Kotyita tyotete, Jeova wayekapo ovanthu vae Isilayeli yopahitu, iya etavela o Isilayeli yopaspilitu, ewaneno lio Vakristau ovanakwa. (Mateus 21:43; Atos 15:14; Gálatas 6:16) Vapelwe ospilitu avahimbika okupopia omalaka kehuviso. Otyo tyalekesa okuti Huku wevetavela. (1 Coríntios 12:4-11) Etyi Korneliu nombunga yae vakala Ovakristau, avapewa ospilitu sandu, navo avahimbika “okupopia omalaka.”—Atos 10:44-46.
Ovikando vimue, tyina omunthu ankho apewa ospilitu kehuviso, ankho upakwa omaoko. Etyi Filipe aivisa onondaka onongwa ko Samaria, ovanthu ovanyingi avambatisalelwa. Iya ononkhalamutue mbo no apostolu, avatumuko Petulu na João. Omokonda yatyi? Tutanga okuti: ‘Iya [ovo vevali] avaende okukapaka omaoko avo [kovanthu ovape vokuambatisalwa], avahimbika okutambula ospilitu sandu.’ Otyo tyilekesa okuti ospilitu ankho vapewa yevepele ounongo ankho umoneka ku vakuavo. Otyo tutyii, mokonda Simau ankho wokulinga omaumbanda, wamuene ovilinga vihuvisa viospilitu oyo. Moluotyo, akala nelungavi ahande okulanda epondolo olio, opo nae akapake vakuavo omaoko atambula ospilitu sandu, vakalinge omahuviso. (Atos 8:5-20) Konyima, ovanthu 12 mo Efesu avambatisalwa. Tutanga okuti: “Etyi Paulu evepaka omavoko ae, ospilitu sandu aivelaukila, iya avahimbika okupopia omalaka, nokuula.”—Atos 19:1-7; eleka na 2 Timóteo 1:6.
Moluotyo, mu Hebreus 6:2, tyafuile Paulu ankho upopia konthele yokupaka omaoko pala okuavela ospilitu ovataveli ovape.