3 Lilongesa Otyili Konthele ya Jesus
“Mokonda Huku una oluembia olunene novanthu, waava Omona wae wongunga, opo kese omunthu umukolela ahakanyimueko, mahi akakale nomuenyo wahapu.”—João 3:16.
OTYIPI OTYITATEKA? Vamue kavetavela okuti Jesus waliko. Vakuavo vetavela okuti Jesus waliko, mahi vati wankhiale kohale, ankho omunthu vala nga vakuavo.
OÑGENI UPONDOLA OKUTETULULA OTYITATEKA? Hetekela omulongwa Natanaele.a Epanga liae Filipe wemupopilile okuti navasa Mesiya—“Jesus omona wa Jose omu Nazare.” Anthi, Natanaele ketavelele vala konondaka mba Filipe. Oe akumbulula okuti: “Ko Nazare kupondola okutunda otyipuka otyiwa?” No ngotyo, etavela etyi Filipe emukonga okuti, “endyu ukatale” ove muene. (João 1:43-51) Nove tupu mopoloko esilivilo, inkha ulilongesa konthele ya Jesus. Oityi upondola okulinga?
Lilongesa omahipululo alekesa okuti Jesus wali omunthu wotyotyili. Josefu na Tasitu, ankho ovahoneki vomahipululo ankho ahumbwa kohale, mahi ankho ha Vakristau. Vapopile okuti Jesus Kristu ankho omunthu waliko tyotyili. Tasitu wahonekele oñgeni Omutumini wo Roma Nero avelele onombei Ovakristau mokonda yotupia tuatumbukile mo Roma menima 64 P.K., okuti: “Nero pala okuyovola una walungilua, avele onombei Ovakristau, ankho veyelweale no va Roma, mokonda yefendelo liavo, evemonesa ononkhumbi ononene nokuveipaa. Enyina Ovakristau, liatuka ku [Kristu], una wamonehilue ononkhumbi onene moutumini wa Tibeliu, ahitiswa na Posu Pilatu.”
O Encyclopædia Britannica, omukanda umue walingwa mo 2002, wapopia etyi tyapopile ovahoneki vomahipululo kohale konthele ya Jesus no yo Vakristau okuti: “Omahipululo oo alekesa okuti kohale alo umue onondyale mbo Vakristau, ankho vetavela okuti Jesus omunthu waliko tyili. Anthi, vamue vahimbika okupatana konthele yae, otyikando tyotete avehena etyi vei, momanima ehehi okualamba pahetyino.” Menima 2002, onthele imue mo jornale The Wall Street Journal, yati: “Ovanongo ovanyingi mouye, pahe vetavela okuti Jesus omu Nazare tyili waliko.”
Tala etyi tyilekesa okuti Jesus watutilisua. Etyi Jesus akuatwa no nondyale mbae, ovalongwa vae vaile nkholo avemusipo. Iya epanga liae Petulu mokonda yowoma apopi okuti himwi. (Mateus 26:55, 56, 69-75) Etyi Jesus akuatwa, ovalanduli vae aveliyandyana. (Mateus 26:31) Konyima, ovalongwa vae avahimbika liwa okuundapa nombili onene. Petulu na João avapopi nomutima wakola novanthu vana vaipaisa Jesus. Ovalongwa va Jesus vakalele nondundo onene, avayandyanesa omalongeso avo mo Roma aiho. Ankho vatokolele okunkhia mokonda yomatavelo avo.
Oityi tyevelingisile epiluluko olio enene? Apostolu Paulu wahangununa okuti Jesus watutilisua iya ‘amoneka ku Sefa [Petulu], konyima amoneka kekwi na vevali.’ Paulu wayauisako okuti: “Konyima yotyo, amoneka kovakuatate ovityita vitano otyikando tyike vala.” Ovanthu ovanyingi vemumuene, ankho nkhela vena omuenyo, etyi Paulu ahoneke onondaka ombo. (1 Coríntios 15:3-7) Oumbangi womunthu wike ine vevali, ovanthu vapondola okupatana. (Lucas 24:1-11) Mahi, oumbangi wovanthu valamba povityita vitano, ulekesa okuti tyili Jesus watutilisua.
ONDYAMBI PATYI MATUPEWA? Vana vena ekolelo mu Jesus nokutavela kwe, vapondola okuevelwa ononkhali mbavo, nokukala nomutima wasukuka. (Marcos 2:5-12; 1 Timóteo 1:19; 1 Pedro 3:16-22) Inkha vankhia, Jesus walaa okuvetutilisa “monthiki yahulilila.”—João 6:40.
Opo unoñgonoke vali konthele oyo, tala momukanda Oityi Ombimbiliya Tyili Ilongesa?b mokapitulu ka 4 kati, “Jesus Kristu Olie?” no ka 5 kati, “Otyilikutila Tyeyovo—Otyali Tyakolela tya Huku.”
[Onondaka Poutoi]
a Mateusi, na Marku, na Luka ovahoneki vo no Evandyeliu, ankho vaihana Natanaele okuti o Batolomeu.
b Walingua no Nombangi mba Jeova
[Olutalatu pefo 7]
Nga Natanaele, lilongesa omanyingilikilo apopia konthele ya Jesus