Oityi Jesus Alongesile Konthele Youhamba wa Huku

“Jesus ahimbika okuendaenda momapundaumbo omanene nomatutu, okuivisa . . . onondaka onongwa mbouhamba wa Huku.”—LUCAS 8:1.

ONTHUE tuhole okupopia ovipuka tutala okuti viakolela, vikahi momutima wetu. Jesus wati: “Omulungu upopia etyi tyeyula momutima.” (Mateus 12:34) Tyina tulilongesa ovipuka Jesus apopile mokueenda kuovilinga viae viokuivisa, tupondola okupopia okuti Ouhamba wa Huku ankho otyipuka tyakolela unene momuenyo wae.

Ouhamba wa Huku Oityi? Ouhamba outumini umwe utuminwa Nohamba. Ouhamba oo, wavialekua na Huku. Jesus wapopile unene konthele Youhamba wa Huku, oyo ankho osapi yonondaka mbae. Mono Evandyeliu ononkhuana, ondaka Ouhamba yapopiwamo ovikando vilamba po 110. Mahi, Jesus kalongesile vala nonondaka. Tupu, ovipuka alingile vialongesile unene konthele Youhamba wa Huku netyi mauya okulinga.

Olie Ohamba? Ohamba Youhamba wa Huku kayaholovonenwe novanthu. Mahi, Omutumini oo waholovonua na Huku. Momalongeso ae, Jesus wapopia okuti oe waholovonua na Huku opo akale Ohamba.

Jesus ankho utyii okuti omaulo Ombimbiliya apopia okuti Mesiya walaelue makatumina apeho Mouhamba. (2 Samuel 7:12-14; Daniel 7:13, 14; Mateus 26:63, 64) Hinangela okuti Jesus wapopile nokuayandyuluka okuti oe o Mesiya walaelue. Jesus waimbukile okuti oe Ohamba yaholovonwa na Huku. (João 4:25, 26) Jesus waundapesa ovikando ovinyingi ondaka “Ouhamba wange.”—João 18:36.

Tupu, Jesus walongesile okuti kuna vakuavo makatumina nae Mouhamba. (Lucas 22:28-30) Ovatumini ovo vaihanwa okuti “otyunda otyitutu.” Oe wevepopila okuti: “Tate yenyi wapanda okumuavela ouhamba.” (Lucas 12:32) Omukanda wahulililako Wombimbiliya ulekesa okuti vana mavakakala nelao liokutumina na Kristu vea 144.000.—Revelação 5:9, 10; 14:1.

Opi kukala Ouhamba wa Huku? Jesus wapopila omutumini woko Roma Posiu Pilatu okuti, “Ouhamba wange kaulingi onthele youye uno.” (João 18:36) Ouhamba wa Huku pomaoko a Kristu kamaukatuminwa novanthu pano pohi. Jesus wapopile ovikando ovinyingi okuti Ouhamba wa Huku “Ouhamba wo keulu.”a (Mateus 4:17; 5:3, 10, 19, 20) Tyotyili, outumini Wouhamba wa Huku, ukala keulu.

Jesus wakala omuvo omunyingi pano pohi, mahi pahe ankho ukevelela okukondoka keulu. Iya Jesus apopi okuti “mandyimupongiyila omphangu,” okuikula ondyila opo vana mavakatumina nae vakakale nae.—João 14:2, 3.

Oityi Ouhamba maukalinga? Jesus walongesile ovateheleli vae velikuambele ku Huku okuti: “Ehando liove lilingwe pano pohi, ngetyi lilingwa keulu.” (Mateus 6:9, 10) Ehando lia Huku likahi nokulingwa keulu. Ouhamba, ondyila pala okufuisapo ehando lia Huku pano pohi. Pala okulinga ehando olio, Ouhamba maukalinga omapiluluko omanene pano pohi.

Oityi Ouhamba maukalinga pano pohi? Jesus walongesile okuti Ouhamba wa Huku mauya okumanako vana valinga ovipuka ovivi. (Mateus 25:31-34, 46) Otyo tyilekesa onthyulilo yovipuka aviho ovivi. Jesus walongesa okuti ohi maikeyula ovanthu “vomutima wapoleya,” ovaviuki, vokuna onkhenda, “vokuasukuka momutima,” novana-mbembwa.—Mateus 5:5-9.

Okuti ovanthu vekolelo mavakakala mouye wasila? Au! Jesus walaa okuti Ouhamba wa Huku maukalinga omapiluluko ahuvisa pano pohi. Omulume umwe wapapelelue momuti ponthele ya Jesus wati: “Jesus, nthyinangele tyina wamanyingila mouhamba wove.” Jesus emukumbulula okuti: “Tyotyili, hono ame ndyikupopila okuti, Mokakala naame Momphangu Yombembwa.” (Lucas 23:42, 43) Enga, Ouhamba wa Huku maukapilulula ohi ino aiho ikale omphangu yombembwa, ngetyi ankho tyikahi motyikunino tyo Endene.

Tupu Oityi Ouhamba maukalinga pala ovanthu? Jesus walinga ovipuka ovinyingi tyipona vala okulaa etyi Ouhamba wa Huku maukalinga. Oe tupu walekesa etyi Ouhamba oo maukalinga. Jesus walingile omahuviso omanyingi okuvelula, okulekesa okuti komutwe wandyila mokueenda Kuouhamba wae meketyilinga monkhalelo yavilapo vali. Mo Evandyeliu Jesus wati: “Oe waendaenda mo Galileia aiho, okulongesila mo nondyuo mbavo mbokufendela , nokuivisa onondaka onongwa mbouhamba wa Huku. Avelula omauvela aeho nomiihamo aviho pokati kovanthu.”—Mateus 4:23.

Jesus wahakulile omauvela omanyingi. Oe “wapatula omaiho a una watyitua omumphoki.” (João 9:1-7, 32, 33) Jesus wahakulile omulume umwe ankho una ouvela wotyilundu. (Marcos 1:40-42) Etyi Jesus aetelwa “omulume umwe ompholo nokuhetyivili okupopia,” oe walekesile okuti upondola okulinga “onompholo okutehelela novihita mulungu okupopia.”—Marcos 7:31-37.

Ohamba yaholovonwa na Huku ina epondolo liokumanako ononkhia. Movikando vitatu, Jesus watutilisa ovanthu vokuankhia. Jesus watutilisa omona wongunga womuhepe, omukainthu womanima 12, nepanga liae Lasalu.—Lucas 7:11-15; 8:41-55; João 11:38-44.

Jesus waundapesa apostolu João pala okuhoneka ovipuka vihuvisa mavikapita Mouhamba wa Huku okuti: “Ekaka lia Huku likahi pokati kovanthu, iya oe makakala navo, ovo mavakakala ovanthu vae. Iya Huku muene makakala navo. Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.” (Revelação 1:1; 21:3, 4) Nkhele soka—ouye umwe uhena ononkhia, nonongembia! Iya elikuambelo liokuita ehando lia Huku lilingwe pano pohi ngetyi likahi nokulingwa keulu, malikafuiswapo aliho.

Onalupi Ouhamba wa Huku mauya? Jesus walongesile okuti outumini wae maukapita momuvo wakolela oe aihana okuti omuvo “wokuya” kuae. Jesus waavelele eulo liayandyuluka nawa pala okulekesa onalupi okuya kuae moutumini mauhimbika. Omuvo oo, ankho maulekesua novitateka ouye auho, okukutikinyamo ovilwa, ondyala, ovinimawe, omikihi, novipuka ovivi mavikeliyawisa. (Mateus 24:3, 7-12; Lucas 21:10, 11) Ovipuka ovio novikuavo vali ovinyingi Jesus apopile, viahimbika okumoneka menima lio 1914, etyi Ovita Viotete Viouye Auho viahimbika. Tunde opo, Jesus ukahi pahe nokutumina Ngohamba. Apa katutu Ouhamba mauya opo ehando lia Huku lilingwe pano pohi.b

Okuya Kuouhamba wa Huku tyikekukalesa ñgeni? Otyo tyitei oñgeni wetavela onondaka mba Jesus.

[Onondaka Poutoi]