Otyipuka tya 3
Tualako Notyituwa Tyokupandula
OITYI OMBIMBILIYA ILONGESA? “Pandulei ovipuka aviho.”—1 Tessalonicenses 5:18.
OTYITATEKA OTYIPI? Tukahi pokati kovanthu velipaka kounene, nokuhapandula, iya nonthue tupondola okuhimbika okuvehetekela. (2 Timóteo 3:1, 2) Tupu, tyipondola okutuhindila okuliyawisa vali unene ovilinga momuenyo wetu weyulale ovilinga. Tupondola okulemenwa unene novitateka ine okuovola vala ovipuka tuhanda, atuhakala nomuvo wokuhambukilwa evi tunale ine okupandula evi vakuetu vetulingila.
OITYI UPONDOLA OKULINGA? Ovola omuvo wokusokolola nawa ovipuka oviwa ove una. Tyotyili pamwe upondola okulemenwa novitateka. Mahi, hinangela ongeleka yo Hamba David. Ovikando vimwe, omutima wae waihamene unene mokonda yononkhumbi ononyingi. No ngotyo, oe welikuambelele ku Huku okuti: “Ame ndyisokolola nawa ovilinga viove aviho. Ame nahanda okutualako okusukalala novilinga viomaoko ove.” (Salmo 143:3-5) Namphila ankho ena ovitateka, David watuaileko nomutima wolupandu nehambu.
Soka konthele yetyi vakuenyi valinga opo vekukuateseko, nokupandula ononkhono valinga. Jesus waava ongeleka ongwa unene konthele oyo. Mongeleka, etyi epanga liae Maliya emunengulila komutwe no konomphai omulela ulanda onombongo ononyingi, vamwe vapula okuti: “Oityi omulela ou unika nawa wapesekela ñgaa?”a Ovanthu ovo ankho vasoka okuti omulela wesukisile okulandeswa, iya onombongo ambupewa ovahepi. Mahi, Jesus wakumbulula okuti: “Muyekei. Omokonda yatyi muhandela okumunumanesa?” Iya ayawisako okuti: “Oe walinga otyilinga otyiwa pala ame.” (Marcos 14:3-8; João 12:3) Jesus watala kuetyi Maliya alinga, katalele kuetyi ahalingile.
Vamwe vapandula vala ombunga, nomapanga, tyina vamankhi, ine oviwa vena, tyina viamanyoneka. Ove upondola okulityilika otyituwa otyo, mokusoka nawa ovipuka oviwa una pahe! Omokonda yatyi uhasokela ine okuhoneka ovipuka ove upandula?
Mokonda “kese otyiawa otyiwa” tyitunda ku Huku, otyiwa okumupandula melikuambelo. (Tiago 1:17) Okulinga ngotyo apeho, matyikukuatesako okutualako notyituwa tyokupandula nokuhambukilwa etyi tuna.—Filipenses 4:6, 7.
[Onondaka Poutoi]
a Kohale, okunengulila omulela komutwe womueenda, tyilekesa okuti wemuyakula nawa. Iya okuwaveka omulela konomphai, tyilekesa okuti ove weliola omutima.
[Olutalatu pefo 6]
Okuti ove upandula etyi vakuenyi vekulingila?