Otyipuka tya 5
Fuisapo Omasuka-suka Ove Opamphepo
OITYI OMBIMBILIYA ILONGESA? “Vana vaimbuka omasuka-suka avo opamphepo, ovana-mbembwa.”—Mateus 5:3.
OTYITATEKA OTYIPI? Kuna onongeleya ononyingi mbelikalaila mbulongesa ononkhalelo mbelikalaila mbokufuisapo omasuka-suka opamphepo. Oñgeni monoñgonoka ongeleya ilongesa otyili nokuapandwa na Huku? Ovanthu vamwe ovanongo vapopia okuti okutavela ku Huku tyitupu esilivilo, alo umwe tyilinga omapita. Omukanda Maclean, upopia omalusoke ovanthu vamwe vankhimana vehetavela ku Huku, okuti: “Olusoke luo Vakristau luokuti kuna vali otyipuka tyimwe tyipona omuenyo ou tuna, tyihamonwa, nokutehelelwa, nokukuatwa . . . tyipola esilivilo omuenyo tuna, nokutuhindila okulinga oungangala.”
OITYI UPONDOLA OKULINGA? Tala ehunga lilekesa okuti Huku oko ekahi. (Romanos 1:20; Hebreus 3:4) Uhayeke omunthu nawike ekutyilike okuovola omakumbululo omapulo akolela ngaa: Tuna omuenyo mokonda yatyi? Okuti konyima yononkhia kuna omuenyo? Oityi kuakalela ononkhumbi ononyingi? Oityi Huku ahanda kuame? Okuvasa omakumbululo afuapo omapulo oo, tyakolela opo ukale nehambu lihapu.
Mahi, uhetavele kese tyipuka upopilwa navakuenyi. Ondaka ya Huku ikulunda okuundapesa “onondunge” mbove opo utale oityi oe etavela. (Romanos 12:1, 2) Ove mopewa ondyambi mokonda yononkhono ulinga. Inkha wovola omuvo wokulilongesa Ombimbiliya nokuundapesa onondonga mbayo mbaviuka, molityilika ovitateka, nokutepulula omasukalalo, nokuyawisa ehambu liove momuenyo. Upondola okuyumba onthumbi momulao oo. Ovanthu ovanyingi vomihoko vielikalaila, vapola ouwa kokulilongesa otyili konthele ya Huku nomilao viae. Mongeleka, tanga ehipululo liotyotyili livasiwa pomago 18 alo 21.
Putyina upola ouwa kokuundapesa onondonga onongwa Mbombimbiliya, oupanga wove na Huku mauliyawisa. Omokonda yatyi uhetavelela okulilongesa Ombimbiliya Nonombangi mba Jeova? Inkha ulilongesa, motavela onondaka ombu mba apostolu Paulu, wahoneka okuti: “Okukala nonthilo na Jeova, tyieta ouwa omunene, tyina omunthu ahambukilwa etyi ena.”—1 Timóteo 6:6, onondaka pokatoi.
[Olutalatu pefo 8]
Litalelako ove munene oityi Huku etavela