Ovatangi Vapula . . .
Okuti omuenyo uhapu Momphangu Yombembwa maukasoyesa?
▪ Ombimbiliya ituavela ekevelelo liokukakala apeho nomuenyo Momphangu Yombembwa kombanda yoohi. (Salmo 37:29; Lucas 23:43) Okuti okukalako apeho monkhalelo ongwa katyisoyesa?
Epulo olio liakolela. Ovanongo vaimbuka okuti tyina omunthu asoya unene, ukala notyiho, nokunumana, nokumuhindila okulinga ovipuka ovivi. Vana veheete esilivilo liomuenyo wavo ine vaponwa netyi valinga kese nthiki, vapondola okusoya. Okuti omuenyo Momphangu Yombembwa maukakala tyihena esilivilo? Okuti etyi matyikalingwa kese nthiki matyikasoyesa?
Tete, noñgonoka okuti o Jeova Huku, Hekulu Yombimbiliya, maave omuenyo uhapu. (João 3:16; 2 Timóteo 3:16) Otyituwa tya Huku tyavilapo vali oluembia. (1 João 4:8) Jeova utuhole unene iya wetuavela ovipuka aviho oviwa tuna hono.—Tiago 1:17.
Omupakeko wetu utyii okuti opo tukale nehambu tuesukisa ovilinga vitukalesa nawa. (Salmo 139:14-16; Eclesiastes 3:12) Momphangu Yombembwa, ovaundapi kamavekelitehelela ngatyina vehena esilivilo. Ovilinga mavakalinga, mavikaetela ouwa ovo muene na vana vehole. (Isaías 65:22-24) Inkha ulinga apeho ovilinga uhole, okuti tyikusoyesa?
Tupu, noñgonoka okuti Jeova Huku kamayeke vala kese munthu akakale Momphangu Yombembwa. Oe wavela vala omuenyo uhapu vana vahetekela Omona wae Jesus. (João 17:3) Etyi Jesus ankho ekahi pano pohi, wali nehambu liokulinga ehando lia Tate yae. Oe walongesile ovalanduli vae netyi apopia netyi alinga okuti ehambu litundilila kokuava, ha kokupewa. (Atos 20:35) Momphangu omphe Yombembwa, aveho mavakaendela movitumino vivali ovinene, viokukala neholelo na Huku navakuavo. (Mateus 22:36-40) Soka okukala pokati kovanthu votyali vekuhole, nokuhole ovilinga viavo! Usoka okuti okukala kumwe navo matyikekusoyesa?
Momphangu Yombembwa omuenyo wetu maukakala vali ñgeni? Kese nthiki, matukelilongesa otyipuka otyipe konthele Yomupakeko wetu. Ovanongo vekahi nokuvasa apeho ovipuka vihuvisa konthele yovipuka Jeova atunga. (Romanos 1:20) Alo umwe hono onthue twii vala katutu ovipuka Jeova atunga. Kohale, Job omulume wekolelo, wasokololele nawa etyi ankho ei konthele yovipuka Huku atunga, iya etyi apopia na hono nkhele otyili. Job wati, “oku okononthele vala mbonondyila mbae [Huku]. Iya otyo tyeivala onthotovola vala! Mahi, olie upondola okulekesa okuti wanoñgonoka omutitimo wae omunene?”—Jó 26:14.
Namphila tukala nomuenyo apeho, nalumwe matukanoñgonoka aviho konthele ya Jeova Huku novilinga viae. Ombimbiliya ipopia okuti Huku wapaka ehando liomuenyo uhapu momitima vietu. Mahi, tupu ipopia okuti onthue nalumwe ‘matukanoñgonoka ovilinga Huku yotyotyili alinga tunde konthyimbi alo konthyulilo.’ (Eclesiastes 3:10, 11) Ove usoka okuti mokasoya okulilongesa ovipuka ovipe konthele Yomupakeko wetu?
Alo umwe hono, vana valinga ononkhono mbokukuatesako vakuavo nokunkhimaneka Huku, okusoya velihakamo vala. Tupondola okukala nonthumbi yokuti inkha tutualako okuundapa unene movilinga ovio, nalumwe matukala tyasoya, namphila tukala apeho nomuenyo.
[Olutalatu Lualandwa pefo 14]
Oohi: Image Science and Analysis Laboratory, NASA-Johnson Space Center; Omukeka-keka: The Hubble Heritage Team (AURA/STScI/NASA)