“Kalei Nohole Pokati Kenyi”
“Ame ndyimupa otyitumino otyipe, tyokuti kalei nohole pokati kenyi, ngetyi ame ndyimuhole, nonwe kalei nohole kese umwe namukuavo. Ovanthu aveho mavaimbuka okuti muvalongwa vange inkha mukala nohole pokati kenyi.”—JOÃO 13:34, 35.
Otyo Tyihangununa Tyi: Kristu wapopilile ovalongwa vae vakale nohole pokati kavo, ngetyi oe akala nohole navo. Oñgeni Jesus akala nohole navo? Wakalele nohole novanthu aveho, tyahatale komihoko, nokuhalingi okapungulula ankho kalingwa unene kononthiki mbae. (João 4:7-10) Ohole yalunda Jesus okuava omuvo wae, no nonkhono, nokulityilika okupululukwa opo akuateseko vakuavo. (Marcos 6:30-34) Okuhulako, Kristu walekesa ohole monkhalelo yavilapo. Oe wati: “Ame ndyimunthita omuwa. Omunthita omuwa wava ohande yae pala okuyovola onongi mbae.”—João 10:11.
Oñgeni Ovakristau Votete Vetyilekesa: Ovakristau votete ankho veliihana okuti “omukuatate” ine “omphange.” (Filêmon 1, 2) Ovanthu vomalongo aeho ankho vatambulwa nawa mewaneno lio Vakristau, mokonda ankho vetavela okuti “kutupu ou welikalela pokati ko mu Judeu no mu Gregu, mokonda kuna vala Tatekulu wike pala aveho.” (Romanos 10:11, 12) Konyima yo Pendekoste yo 33 P.K., ovalongwa mo Jelusalei “valandesa ovipuka viavo, nomalumono, iya onombongo avembuyapulila aveho, ngetyi kese umwe esukisa.” Omokonda yatyi? Opo ovape aveho vokuambatisalwa vakale mo Jelusalei navatualeko “okupanda ondongeso yono apostolu.” (Atos 2:41-45) Oityi tyevelunda okulinga ngotyo? Etyi palamba omanima 200 konyima yononkhia mbono apostolu, Tertuliano wahoneka etyi vakuavo vapopia konthele Yovakristau, okuti: “Ovo velihole unene ngatyi . . . iya alo umwe vafuapo pala okunkhia mokonda yavakuavo.”
Ovalie Valandula Onondonga Ombo Hono? Omukanda The History of the Decline and Fall of the Roman Empire (1837), wapopia okuti mokueenda komanima omanyingi, vana vapopia okuti Ovakristau “vehole okulilinga vali onya, tyipona vana [vehekahi] mongeleya.” Eovololo limwe lialingwa mo Estados Unidos, lialekesa okuti ovanthu ovanyingi veliti Ovakristau, navo vena okapungulula. Vana vaya kongeleya kotyilongo tyimwe, ovikando ovinyingi kavesukile navakuavo vekahi mongeleya yavo kotyilongo otyikuavo, iya ngotyo kavetyivili okuvekuatesako tyina vesukisa.
Mo 2004 etyi otyilongo tyo Flórida tyatumbilwa novinimawe vikuana mo nohanyi onombali, omutumini wo Comissão Administrativa de Emergências ko Flórida, watala inkha ovanthu vekahi umwe nokupewa ovipuka vatuma. Oe wati ankho kutupu vali ovanthu ovakuavo velionganeka nawa ngo Nombangi mba Jeova, iya apopi okuti maavela Onombangi mba Jeova atyiho vesukisa. Mo 1997 Onombangi mba Jeova vaya kotyilongo tyo Congo, okutyinda ovihemba, nokulia, novikutu opo vakakuateseko ovakuatate vavo no nomphange ankho vesukisa. Onombangi ononkhuavo ko Europa vaava ovipuka vihika pomiliau yo nondolale.