Okuti Ovakai Onombangi Mba Siovaa Navo Valongesa Ovanthu?

Eenga, mouye auho muna ovakai ovanyingi-nyingi Onombangi mba Siovaa valongesa ovanthu Ombimbiliya. Omukanda wa Salmo 68:11 wapopia okuti: “Siovaa waava otyitumino. Ovakai vapopia onondaka onongwa, embamba enene liovita.”

Mahi ovilinga vilinga ovakai Onombangi mba Siovaa vielikalela nevi vilinga ovakai vonongeleya. Oityi valinga tyelikalela?

Ovakai vonongeleya pamwe ovo valongesa ovanthu movikapela viavo, tupu pamwe ovo vakalela komutwe ovanthu vomongeleya yavo. Mahi ovakai Onombangi mba Siovaa valongesa ovanthu Ombimbiliya momaumbo avo, no ponomphangu ononkhuavo vali, kavalongesila kotilimbuna.

Otyipuka otyikuavo tyelikalela valinga okuti momawaneno Onombangi mba Siovaa vapewa otyilinga tyokulongesa ovalume. Ine meliongiyo muna omulume wambatisalwa, omukai kapondola okulongesa. — 1 Timotiu 3:2; Tiaku 3:1.

Ombimbiliya ipopia okuti ovalume ovo vala vapondola okululika ewaneno. Paulo wapopilile Titu opo aholovone “ovakulu vomawaneno momapunda-umbo aeho.” Apopi vali okuti: “Omukulu wewaneno una okukala omulume uhahungwa, wanepa omukai wike.” (Titu 1:5, 6) Tupu Paulu otyo apopilile Timotiu etyi ati: “Inkha omulume umwe wovola okukala omukulu weuaneno, ukahi nokuovola ovilinga oviwa. Omukulu wewaneno una okukala omunthu uhalingi ovipuka vimupopisa omapita, una vala okunepa omukai wike, . . . utyivila okulongesa nawa.” — 1 Timotiu 3:1, 2.

Omokonda yatyi ovalume ovo vala vapondola okululika ewaneno? Paulu wati: “Ame hiyeke omukai alongese ine atumine ovalume, mahi una okutualako tyahiliya. Mokonda Andau watetekela okutungwa, Eva atungwa konyima.” (1 Timotiu 2:12, 13) Otyo tyilekesa okuti otyilinga tyokululika nokulongesa ewaneno Huku wetyiavela ovalume.

Onombangi mba Siovaa vahetekela onkhalamutwe yavo Sesusi Kilisitu. Luka etyi apopia ovilinga vya Sesusi wati: “Ahimbika okulinga oungendi punda-umbo nepunda-umbo, no momaumbo otyo aivisa onondaka onongwa Mbouhamba wa Huku.” Konyima Sesusi atumu ovalongwa vae valinge ovilinga ovio. Ovalongwa “avaende umbo na umbo, otyo vaivisa onondaka onongwa, nokuhakula ovavei.” — Luka 8:1; 9:2-6.

Na hono, Onombangi mba Siovaa, tyilinge ovalume tyilinge ovakai, valinga ovilinga Sesusi apopile etyi ati: “Onondaka ombu onongwa Mbouhamba wa Huku, mambukaiviswa kombanda yohi aiho, okuava oumbangi kovanthu vomalongo aeho iya konyima onthyulilo aiya.” — Mateusi 24:14.