Okuti Tupondola Okupula Huku?

VAMUE vapopia okuti tyapenga okupula Huku. Vasoka okuti okupula Huku omokonda yatyi alingila tyimwe ine ayekela ovipuka vimwe vimoneke, tyilekesa okuti utupu onthilo. Okuti noove ongotyo usoka?

Inkha ongotyo usoka, mohuvu tyina wamelilongesa okuti ovanthu ovanyingi ovawa vapulile Huku. Tala omapulo amwe valinga pombuelo:

Job omulume wekolelo wati: “Omokonda yatyi onondingavivi vatualako nomuenyo, nokukulupa, nokukala unene ovahona?”​—Jó 21:7.

Habakuke omuuli omukuatyili wati: “Omokonda yatyi utalela vana valinga ovivi, oti filu putyina ondingavivi ilinga tyina tyahaviukile omuviuki vali kuyo?”​—Habacuque 1:13.

Jesus Kristu, wati: “Huku yange, Huku yange, oityi wandyekela?”​—Mateus 27:46.

Inkha utanga ovihonekwa konthele yo mapulo oo, motale okuti natyike tyilekesa okuti Jeovaa Huku wanumanene etyi vemupula. Tyotyili, etyi Huku ayekelela ovipuka vimwe ovivi vimoneke, kapengesile. Mongeleka, Huku kanumana tyina tuita etuavele okulia opo tutualako nekongoko. Oe uhambukwa ya etuavela etyi tuesukisa. (Mateus 6:11, 33) Tupu, uhambukilwa okutuavela etyi matyitukuatesako okukala nekongoko momutima nokutuhambukiswa. (Filipenses 4:6, 7) Tyotyili, Jesus wapopila ovalanduli vae okuti: “Tualeiko okuita, alo mupewa.” (Mateus 7:7) Onondaka mba Jesus mbulekesa okuti kapopile vala konthele yokupewa etyi matuli mahi tupu nokupewa omakumbululo omapulo akolela.

Inkha ove ñgeno upula Huku, olipi pomapulo aa pombuelo uholovona po?

● Omuenyo wange walingilua tyi?

● Oityi matyipiti naame tyina namankhi?

● Omokonda yatyi undyekela ndyimone ononkhumbi?

“Ovihonekwa aviho viatumwa okuhonekwa na Huku,” ngotyo ove movasi omakumbululo Huku aava Mondaka yae, Ombimbiliya. (2 Timóteo 3:16) Lilongesa omokonda yatyi vamwe valingila Huku omapulo oo nokutehelela omakumbululo Ombimbiliya.

[Onondaka Poutoi]