Etutilo lia Jesus Liaetela Ovanthu Omuenyo Wahapu!

ETUTILO lia Jesus hatyipuka vala tyamonekele kohale atyihena esilivilo pala onthue hono. Apostolu Paulu wapopile esilivilo olio etyi ahonekele okuti: “Kristu watutilisua povokuankhia. Oe tete kuaveho velele mononkhia. Tyetyi ononkhia mbeya mokonda yomunthu wike, tupu vokuankhia mavakatutila mokonda yomunthu wike. Mokonda, ngetyi mu Andau aveho vankhia, tupu mu Kristu aveho mavakakala nomuenyo.”—1 Coríntios 15:20-22.

Jesus watutilisua monthiki 16 ya Nisã, yo 33 P.K, onthiki ova Judeu ankho vaya mondyuo ya Jeova Huku mo Jelusalei okutuala ovikuna viotete vateya. Etyi aihana Jesus okuti ovikuna viotete, Paulu ankho ukahi nokulekesa okuti kuna ovanthu ovakuavo mavakatutiliswa.

Onondaka mba Paulu mbulandulako mbupopia etyi etutilo lia Jesus lialinga. Paulu wati: “Tyetyi ononkhia mbeya mokonda yomunthu wike, tupu vokuankhia mavakatutila mokonda yomunthu wike.” Atuho tunkhia mokonda o Andau wetuetela onkhali. Mahi etyi Jesus aava otyilikutila tyomuenyo wae wehena nkhali, waikula ondyila opo ovanthu aveho vayovoke konkhali, nokututiliswa. Paulu wapopia nawa konthele oyo etyi ahonekele mu Romanos 6:23: “Ofeto yonkhali ononkhia, mahi otyali tuapewa na Huku omuenyo wahapu, menyina lia Kristu Jesus Tatekulu yetu.”

Jesus muene wapopile ouwa patyi ononkhia mbae netutilo vituetela. Wapopia konthele yae okuti: “Omona womulume una okutulikwa, opo aveho vana vetavela mwe vakale nomuenyo wahapu. Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akakale nomuenyo wahapu.”—João 3:14-16.

Hinangela okukala nomuenyo tyehena oluihamo, nononkhumbi, nokulila! (Revelação 21:3, 4) Olio ekevelelo limwe ewa! Omunongo umwe wati: “Putyina omaendo etuhinangelesa okuti omuenyo omusupi, etutilo litukalesa nonthumbi yokuti ononkhia kamambukalako apeho.” Tyotyili, etutilo lia Jesus lituetela omuenyo!