Vimwe Vilifuilapo, Mahi Ovinyingi Kavilifuilapo

Okuti ove uhanda okunoñgonoka etyi matyiya komutwe? Ovanthu ovanyingi otyo vahanda. Kuna ovanthu ovanyingi vapopia ovipuka mavimoneka komutwe, mahi evi vimoneka vielikalela. Tala onongeleka mbulandulako:

• OVANONGO VOUYE vaundapesa onomakina ononene nonombongo ononyingi pala okuovola okutala etyi matyikamoneka komutwe, okutala vina mavinyono ohi nokutala inkha muhuka ombila mailoko.

• VOKUPOPIA EVI VIKAHI NOKUMONEKA MOUYE vapopia konthele yo nondando nopulitika. Warren Buffett, umwe ankho povanthu ovahona mouye, ankho wankhimana mokonda yokupopia etyi matyiya komutwe. Nate Silver, omunongo omukuavo, wankhimana mokonda yokukuatesako okutala evi mavimoneka moutumini wo Estados Unidos otyo vilekeswa mosinema Hollywood.

• VIOKOHALE ovanthu vehole okupopia okuti omaulo. Ovanthu vamwe hono vafuisapo ovihonekwa viapopilwe motyita 16 via Michel de Notredame (Nostradamus). O Kalendaliu Maia ankho kapopia okuti mo 21 ya Kayovo yo 2012, makumoneka ovipuka mavihanyauna ouye.

• ONONKHALAMUTWE MBONONGELEYA vehole okupopia okuti mouye mamumoneka oviponga opo valondole ovanthu nokuwaneka ovalanduli vavo. Harold Camping wokuula ovipuka ovivi, novalongwa vae vapopile okuti ohi maihanyuako mo 2011. Mahi ouye na hono oko ukahi.

• OVITAPI vapopia okuti vetyivila okutala etyi matyikamoneka komutwe. Edgar Cayce na Jeane Dixon vapopile ovipuka mavimoneka motyita 20. Mahi evi vapopile kaviamonekele. Mongeleka, Dixon wapopile okuti menima 1958 makuya Ovilwa via III Viouye Auho, iya Cayce wapopile okuti mokueenda kuenima 1970 o Nova York maikunkhunukila melunga.

Okuti tyilityili kuna umwe onkhalelo ongwa yokutala etyi matyikamoneka komutwe? Olio epulo liesukisa ekumbululo. Inkha utyivila okutala etyi matyiya komutwe, ñgeno wakala nomuenyo omuwa nokulinga omatokolo aviuka.