Ovipuka Ovivi Vieliyawisa!

Smita,a omukai womanima 35 ko Dhaka, Bangladesh, ankho uhole ovanthu nokuvelinga nawa. Ovanthu ankho vemwii okuti omukai uundapa unene nokuna ehambu, ankho uhanda okukuatesako vakuavo okunoñgonoka etyi elilongesa konthele ya Huku. Ombunga nomapanga vanumanene unene etyi Smita avasiwa nouvela umwe wahakalele simano aumuipaa!

James nomukai wae, ovalinepi vamwe ankho vena omanima 30, nokuna ovituwa oviwa nga Smita. Pondyovo ankho vapita okukatalelapo omapanga avo koutakelo wo Estados Unidos. Nalumwe vakondokele vali keumbo liavo ko Nova York. Etyi vekahi mondyila avaviluka netukutuku avankhi, avasila omuihamo omunene ombunga yavo na vana ankho vaundapa navo.

Hono kese apa utala ovivi no nonkhumbi vieliyawisa unene. Ovilwa vipaa ovanthu alo umwe omatolopa. Okuipaa, noungangala tyimoneka alo umwe kovanthu vehena etyi valinga. Ononkhia nomauvela alemaneka, vikahi nokumoneka kovanthu vomati aeho. Ovinimawe vikahi nokuipa ovanthu ovanyingi. Okulingwa onya tyeliyandyana unene. Hamwe nove ukahi movipuka ngovio.

Katyapengele okulipula ngetyi:

• Omokonda yatyi ovanthu ovawa navo vamonekelwa novivi?

• Okuti Huku oe uvelwa onombei mokonda yovipuka ovio?

• Okuti ovivi viyako vala, ine vietwa novanthu?

• Okuti o Karma, ine etyi tyituka kuetyi omunthu alingile kohale, otyo tyimumonesa ononkhumbi?

• Inkha kuna Huku wepondolo aliho, omokonda yatyi ahaamenena ovanthu kovivi?

• Okuti ovanthu mavakayovoka kovivi no kononkhumbi?

Opo tukumbulule omapulo oo, tuesukisa okunoñgonoka omakumbululo omapulo evali akolela: Oityi ovipuka ovivi vimonekela, iya oityi Huku makalinga?