OSAPI YOKONDYE | OUHAMBA WA HUKU KUOVE OITYI UHANGUNUNA

Ouhamba wa Huku Oityi Maukahangununa Kuove?

Ngetyi wetyimona mononthele mbokualamba Ouhamba wa Huku una ehangununo enene ko Nombangi mba Jeova. Iya hamwe ove ankho wanguanguana noviwa vimwe tuapopia mavikaetua komutwe Nouhamba wa Huku. Tupu, tyipondola hamwe ulipula inkha omilao ovio mavikelifuilapo umwe.

Mahi ove umunongo mokonda kutavela vala kese etyi wiiva. (Provérbios 14:15) Monkhalelo oyo, ove upondola okuelekwa no va Bereia vokohale.a Etyi vapopilwa tete onondaka onongwa konthele Youhamba wa Huku, ova Bereia ankho vetavela etyi veiva, mahi hamokonda vetavela okuti otyo otyili. Anthi, tete vaovolola nawa Ovihonekwa “opo vatale inkha ovipuka ovio viapopiwa otyili umwe.” (Atos 17:11) Monondaka ononkhuavo, vaeleka onondaka onongwa veiva netyi tyapopia Ovihonekwa. Otyo, tyevekalesa nonthumbi yokuti onondaka onongwa tyotyili mbatunda umwe Mondaka ya Huku.

Onombangi mba Jeova vekukonga nombili onene nove ulinge ngotyo. Notyilinga tyetu tyokulongesa ovanthu Ombimbiliya otyali, tukuavela omphitilo yokueleka etyi Onombangi mba Jeova vetavela konthele Youhamba wa Huku netyi Ombimbiliya ilongesa.

Tupu opo ulilongese konthele Youhamba wa Huku, okulilongesa Ombimbiliya tyipondola okukukuatesako okuvasa omakumbululo amwe omanene konthele yomuenyo, ngaa:

Onthue opi tuatunda?
Huku walinga ovanthu pala tyi?
Omokonda yatyi Huku ayekelako ononkhumbi?
Oityi tyipita nonthue tyina tuamankhi?
Okuti ohi maikanyaunuako?
Oityi tyieta ehambu mombunga?

Haunene, okulilongesa Ombimbiliya tyikukuatesako ‘okufuena ku Huku.’ (Tiago 4:8) Ngotyo, tyina wamafuene ku Huku, matyikukuatesako okutala oñgeni Ouhamba wa Huku upondola okukuetela oviwa pahetyino nokomutue wandyila. Jesus etyi elikuambela ku Tate yae wapopile okuti: “Tyihangununa omuenyo uhapu, okukala nenoñgonoko liove Huku wike wotyotyili, na Jesus Kristu una watumine.”—João 17:3.

Onombangi mba Jeova vapondola okuundapesa omukanda ou pala okulilongesa nove Ombimbiliya.

Opo ulongeswe Ombimbiliya ita Kombangi umwe ya Jeova ine honeka mo www.pr418.com. (Tala pana pati ITA OPO ULONGESWE OMBIMBILIYA)

a O Bereia ankho epundaumbo lio Masedonia yokohale.

Oityi Ouhamba wa Huku Uhangununa Palae

Nthiki imwe omukainthu umwe womanima ekwi utiwa Folake kosikola waholovonwa opo ahangunune osapi: “Oityi Ndyihole Vali Mouye Uno.” Folake aholovona okuhoneka konthele yetyi ehole okupopila vakuavo konthele Youhamba wa Huku.

Folake wahangununa okuti: “Ouhamba wa Huku outumini wotyotyili, mahi kaumonwa komaiho, alo umwe tyina utalela mono vokolo!”

Folake ankho uhole okuhoneka konthele yoviwa Viouhamba haunene vina akevela komutwe. Wapopia ovitateka vimwe Ouhamba wa Huku maukatetulula, wahoneka okuti: “Ndyinumana unene okutala ovanthu vehena omaumbo vakala momatapalo novana vekahi nokunkhia mouye auho.” Ayawisako okuti: Mahi “Ndyihambukua tyina ndyitanga omukanda wa Isaías 65:21.” Konthele yovanthu mavakakala moutumini Wouhamba wa Huku, oversikulu yalaa okuti: “Mavakatunga onondyuo avakalamo, mavakatuika omiti avakalia ovinyango viavio.”

Folake tupu wapopia okuti ukevelela onthiki Huku makamanako omauvela aeho Nouhamba wae. Momukanda wae, Folake wapopia Revelação 21:4, yokuapopia okuti Huku “makasekuna ononkhuka momaiho avo, ononkhia, okulila, no nongembia kamavikakalako vali.” Etyi amanuhula wapopia konthele ya Jeova Nouhamba wae okuti otyo ehole vali mouye omu.” Tyotyili, Ouhamba wa Huku momutima womukainthu oo wakolela unene!