Otyipi otyili konthele yo Natale?

Ovanthu ovanyingi mouye auho vahinangela o Natale mokonda yomahunga elikalaila. Ku vamwe oyo onthiki yokulinga otyipito, nomapanga nombunga. Ovakuavo vasoka ku Huku ine vataindya omuwo wokukuatesako vana vahepa. Mokusoka kuavo, vetyilinga nomahunga omawa. Mahi, onthiki oyo ina ovipuka ovinyingi viapenga.

Tete, ovanyingi vetavela okuti o Natale onthiki Jesus atyitwa. Mahi, omahipululo omanyingi alekesa okuti onthiki atyitwa kaiiwe. Omukanda The Christian Book of Why wati: “Ovakristau votete ankho velityilika okuhinangela onthiki ovanthu vasoka okuti oyo Jesus atyitwa” mokonda ankho vahanda “okulityilika oviso via vana vahafende Huku.” Otyiwa okutala okuti Ombimbiliya kailekesa okuti Jesus ankho uhinangela onthiki muene atyitwa ine o yomunthu omukuavo. Mahi, Jesus waava otyitumino opo ovalanduli vae vahinangele vala onthiki yo nonkhia mbae.​—Lucas 22:19.

Vali, ovanongo ovanyingi vetavela okuti o Natale yatuka kovanthu vehe Vakristau, oviso via vana vahafende Huku. Oviso ovio, tyati no Santa Claus, okuundapesa ononthemo, nomiti vio Natale, nokuliavela ovipuka, nokutemesa ono vela, nokulinga onombolu, nokuhiwisa omaumbo avo no nonthemo, nokuimba. Konthele yoviso vimwe puovio, omukanda The Externals of the Catholic Church wati: “Tyina tupewa ine tuava ovipuka vio Natale nokuhiwisa meumbo lietu ovipuka vio Natale no mokapela, veñgapi puonthue vetyii okuti tukahi nokulinga oviso viatuka kovanthu vahafende Huku?”

Mahi hamwe tupondola okulipula inkha tyapenga okulandula ovanthu ovo valinga vala o Natale tyihetyi oku viatuka. Tala onthele ei yatatu ngatyina ekumbululo. Huku ketavela okuhonyeka efendelo liotyotyili noviso viatuka ku vana vehemufende. Menyina liomuuli Wae Amosi, Jeova Huku wapopila ovafendi Vae onomphuki ova Isilayeli kohale okuti: “Nayala, naanya ovipito vienyi . . . Hondovolei puame omuyuelo woviimbo vienyi.”​—Amós 5:21, 23.

Oityi apopila onondaka ononene ngombo? Tala ovipuka ovanthu kohale mouhamba wo koutakelo ankho vekahi nokulinga. Ohamba yavo yo tete, Jeroboau, walingile ovilolo momapundaumbo atiwa Dá no Betel iya ahongiliya ovanthu okufenda kovilolo ovio tyipona okufenda ku Jeova Huku ankho vafenda mo templu mo Jelusalei. Ohamba oyo tupu ailingi ovipito, nokuholovona ovanakwa opo vakuatesako ovanthu okuvifenda.​—1 Reis 12:26-33.

Etyi ova Isilayeli ovo valingile tyimoneka ngoti ankho vena ehunga ewa. Ovanthu ovo kavalingile ovipuka ovio aviho pala okufenda Huku nokumuhambukiswa? Onondaka onene Huku apopia menyina liomuuli Amosi novauli ovakuavo, mbulekesa nawa oñgeni Huku ankho elitehelela konthele yetyi valinga. Menyina liomuuli Malakia, Huku wati: “Ame Jeova, hapilulukile.” (Malaquias 3:6) Otyo katyilekesa oñgeni Huku hono elitehelela tyina atala ovanthu ovanyingi hono valinga o Natale?

Konyima yokuatala nawa ovipuka ovio tuapopia, ovanthu ovanyingi vatokola okuhalingi vali o Natale. Anthi, ovo vena ehambu liotyotyili liokukala omuwo umwe nomapanga avo, nombunga nokukuatesako vana vahepa na vana vesukisa mu kese nthiki menima.