OSAPI YO KONDYE | ONOMBANGI MBA JEOVA OVALIE?
Onombangi mba Jeova Ovanthu Patyi?
Onthue tu veongano livasiwa mouye auho, liheliwaneka no nongeleya ononkhuavo. Namphila ombala yetu ikahi ko Estados Unidos, Onombangi mba Jeova ononyingi mbukala movilongo ovikuavo. Onombangi vehungi po nomiliau 8 valongesa ovanthu Ombimbiliya movilongo vilamba po 230. Tualinga ngotyo, okuendela monondaka mba Jesus, mbati: “Onondaka ombu onongwa mbouhamba wa Huku, mambukaiviswa kombanda yohi aiho, pala oumbangi movilongo aviho, iya konyima onthyulilo aiya.”—Mateus 24:14.
Onthue tutavela ovitumino kese apa tukala. Mahi, tulinga ononkhono mbokuhelipake mo pulitika. Tulinga ngotyo mokonda tutavela ehongolelo Jesus aavela Ovakristau, liokuti “kamulingi onthele youye.” Ngotyo, onthue katulipake mo pulitika no movilinga ine ovipuka ovikuavo vikuatesako ovita. (João 15:19; 17:16) Moluotyo, mokueenda Kuovita Viouye Auho via 2, Onombangi mba Jeova, vapakailwe movikaleya, vavetailwe, alo umwe vamwe avaipawa, mokonda ankho kavahande okulipaka mo pulitika. Ombisipu imwe mo Alemanha kohale, yahoneka okuti: ‘Vena ehunga liokupopia okuti eongano liavo olio vala lihelipakele movita ine mo pulitika, mokueenda kuoutumini wa Hitler, Terceiro Reich.’
“[Onombangi mba Jeova] vena ononkhono ononene momutima. Tuesukisile okuundapesa ovanthu ovo vehena elungavi ponomphangu ononene mbovilinga vio pulitika. Mahi, kamavetutavela nalumwe. . . . Tyotyili Onombangi mba Jeova vahumba ovatumini, mahi vetavela okuti Ouhamba wa Huku, oo vala maukatetulula ovitateka aviho viovanthu.”—O jornale Nová Svoboda, ko República Tcheca.
No ngotyo, tukala umwe pokati kovanthu vouye. Jesus waitilile-ko ovalanduli vae ku Huku okuti: “Ame ndyikuita, hapala-ko uvepole mouye, mahi o pala uveyunge, mokonda yondingavivi.” (João 17:15) Mahi, ove upondola okutumona putyina tuenda kovilinga, tyina tukalanda ovipuka, tuenda kosikola, na pana tukala.