OSAPI YO KONDYE | OVE UPONDOLA OKUNOÑGONOKA OMBIMBILIYA
Oityi Tyesukisila Okunoñgonoka Ombimbiliya?
“Ombimbiliya Omukanda wonongeleya wiiwe nawa. Mahi ova China kavewii. Kuvo utupu esilivilo.”—LIN, ko CHINA.
“Ame alo umwe omikanda vikola viongelelya yange o Hindu, hityivili okuvinoñgonoka. Oñgeni mandyivili okunoñgonoka Ombimbiliya?” —AMIT, ko INDIA
“Ame nahumba Ombimbiliya ngatyina omukanda omukulu. Tupu ndyihole okuiva okuti ulandeswa unene. Mahi, komaiho hineimone.”—YUMIKO, ko JAPAN.
Ovanthu ovanyingi mouye, vapanda unene Ombimbiliya. Mahi, pamwe vei vala katutu etyi Ombimbiliya ipopia, ine kavei natyike. O ngotyo tyikahi ovanthu ovanyingi vakala mo Asia, no movilongo ovinyingi omu Ombimbiliya yayandyana unene.
Mahi ove upondola okupula okuti, ‘Oityi ame ndyina okukalela nesuko liokunoñgonoka Ombimbiliya?’ Okunoñgonoka etyi omukanda oo wa Huku upopia, matyikukuatesako okulinga ovipuka mavilandula-ko:
Okuvasa ehambu
Okutetulula ovitateka viombunga
Okufinda otyiho
Okupameka oupanga na vakuenyi
Okuundapesa nawa onombongo
Tala ongeleka ya Yoshiko ko Japau. Ankho ulipula oityi Ombimbiliya ipopia, iya atokola okuitanga. Ouwa patyi apola-ko? Oe wati: “Ombimbiliya yankhuatesako okuvasa esilivilo liomuenyo, nekevelelo komutwe.” Iya ayawisa-ko okuti: “Pahe ndyilitehelela okuti ndyina esilivilo.” Amit, wapopiua konthyimbi, atokola okulilongesa Ombimbiliya. Iya ati: “Ame nahuva unene. Ombimbiliya ina onondonga mbakolela pala kese munthu.”
Ombimbiliya yakuatesako unene ovanthu ovanyingi. Oityi ove uhelilongesila-yo, opo utale ouwa upondola okupola-ko?