OSAPI YO KONDYE
Tyina Umwe Tuhole Amankhi
“Huku wii nawa etyi tyaviuka, nkhelo. . . Ove . . . uhalile . . . vali.”
Onondaka ombo, mbatotovekelwa omukai umwe utiwa o Bebe. Ankho vakapaka tate yae wankhila metuku-tuku liapinunuka.
Bebe ankho epanga enene lia tate yae. Iya onondaka ombo, mbapopiwa nepanga liombunga yae. Mahi onondaka ombo, kambaungumanesile Bebe, mbemuihamene vali unene. Iya atualako okulipopila okuti: “Ononkhia mbae hatyipuka-ko tyaviuka.” Atyimoneka nawa okuti Bebe etyi palamba omanima puetyi ahipulula vali otyiponga otyo momukanda umwe, nkhele ankho utualako okulila.
Ngetyi tyalamba na Bebe, omunthu upondola okukala omuvo omunyingi opo oluihamo eiva tyina umwe amankhi, luhimbike okutepuluka, haunene tyina ankho omapanga omanene no wokuanyima. Mo Mbimbiliya, ononkhia mbupopiwa okuti “ondyale yahulilila-ko.” (1 Coríntios 15:26) Ononkhia mbuuhuluka vala, nawike upondola okumbutyilika, iya ambutupolo vana tuhole. Nawike puonthue upondola okulityilika ononkhumbi mbueeta. Hatyivi-ko okulitehelela omapita, tyina umwe tuhole amankhi.
Hamwe ove uhole okulipula okuti: ‘Omunthu ukala omuvo ulifwe-pi opo afinde oluihamo olo? Oñgeni apondola okufinda oluihamo olo? Oñgeni ame mandyiungumanesa vakuetu vasiwa-po no vavo vehole? Okuti kuna ekevelelo konthele ya vana tuhole vanyima?’