OSAPI YOKONDYE | Opi Ove Upondola Okuvasa Ekuateso?
Atuho Tuesukisa Ekuateso
Okuti ove uhinangela onthiki imwe welipuminepo puetyi ankho umona? Hamwe welivetele kenkhanya ine opongolo. Okuti uhinangela oñgeni me yove ekukengelela? Tyafuile hamwe me yove wakohelepo iya apakepo ovihemba. Ove walilile, mahi onondaka mbae ekupopila nounkhengela mbekupamekele unene. Pomuvo opo, okuungumaneswa ankho otyo umwe wesukisa.
Omuenyo upuilisa vali haunene tyina tukula. Tyina ovitateka viliyawisa, kapamoneka ou upondola okukupameka. Ovitateka viovakulu vipuilisa vali unene, mokonda kavakengelelwa vala ngo mona ukengelelwa na me yae. Tala onongeleka mbumwe.
Okuti wakalele notyitateka mokonda yokuapolwa movilinga? Julian wapopia okuti etyi apolwa movilinga, oluihamo luatyo alumukalesa omapita. Ankho ulipula okuti: ‘Oñgeni mandyitekula ombunga yange? Naundapa omanima omanyingi movilinga vialema, omokonda yatyi ndyilitehelela okuti ndyitupu esilivilo?’
Hamwe ove ukahi nokulwa novitateka motyinepo tyove. Raquel wapopia okuti: “Tunde etyi omulume wange anthyenga, palambale onohanyi 18, mokonda yotyo ame ndyilitehelela omapita. Ankho ndyilitehelela ngoti omutima wange welitepuka ononthele onombali. Ankho navela unene owoma.”
Hamwe ove una ovitateka viekongoko iya utehelela okuti mosete okuveluka. Tyipondola hamwe nthiki imwe weliteheleliale nga Job, welipopilile okuti: “Ame hihande vali omuenyo wange, tupu hihande vali okutualako nomuenyo.” (Jó 7:16) Hamwe ove welitehelele nga Luis, omulume umwe una omanima 80, wapopia okuti: “Ovikando vimwe ame ankho ndyilitehelela okuti apa katutu mandyinkhi.”
Ine hamwe okunkhisa umwe uhole, ankho uhole okukuungumanesa. Robert wapopia okuti: “Puetyi omona wange anyimina mo aviau, tete ame andyihulilwa. Okutuka opo, andyiihamenwa unene. Ombimbiliya yeeleka oluihamo ngatyina omutunga ukahi nokukutoma.”—Lucas 2:35.
Robert na Luis na Raquel iya na Julian vavasile ekuateso momuvo una wovitateka. Vavasile omunthu ukahi vali nawa wevekuatesako—nawike vali ukahi nga Huku Wepondolo Aliho. Oñgeni Huku etuungumanesa? Okuti Huku mekuavela ekuateso ove wesukisa?