Omapulo Akumbululwa

◼ Oityi tuesukisa okulinga inkha tuhanda omalumono etu amwe ine aeho, akale eongano lia Jeova tyina tuamankhi?

Tyina ovanthu vankhia, kavetyivili vali okuyunga omalumono avo. (Ecl. 9:5, 6) Moluotyo, ovanyingi tyina nkhele vena omuenyo, vahoneka omukanda ulekesa oñgeni omalumono avo maavununwa. (2 Reis 20:1) Omukanda oo tupu ulekesa olie makala notyilinga tyokuavununa omalumono oo. Inkha omunthu kahoneka omukanda, movilongo ovinyingi ovatumini mavatokola oñgeni omalumono ae maavununwa. Ngotyo, inkha tuhanda omalumono etu amwe ine aeho akale eongano lia Jeova, tyakolela unene tuhoneke omukanda utyipopia, nokulekesa omunthu tuaholovona nawa, opo akale notyilinga tyokueavununa.

Omunthu oo, una otyilinga tyalema unene. Tyilinge omalumono omanyingi ine kaehi, okueongiya nokueavununa, tyakutikinya ovipuka ovinyingi, iya tyipondola okumana omuvo. Tupu, ovatumini ovikando ovinyingi vena ovitumino vina okulandulwa. Ha kese umwe mewaneno wafuapo pala okulinga nawa otyilinga otyo. Tuna okuholovona omunthu twii nawa okuti metyivili, wayumbua onthumbi, uhanda okulinga etyi onthue tuhanda.—Tala onthele yati: “Por Que é Bom e Sensato Preparar um Testamento,” mo Despertai! ya Dezembro yo 1998.

Inkha Waitua pala Otyilinga Otyo Tyokuavununa Omalumono: Inkha waitua okuti mokala notyilinga tyokuavununa omalumono omunthu umwe inkha anyima, tete soka nawa kuatyiho tyakutikinyamo iya nelikuambelo otokola inkha movili okufuisapo otyilinga otyo. (Luc. 14:28-32) Tyina omunthu oo amanyimi, ove mosukisa okupopila aveho mavapiñgana ovipuka viae. Iya mokonda otyilinga otyove, mokala novilinga viokuavununa omalumono oo nawa-nawa ngetyi tyahonekwa pomukanda wa hekulu, nokulandula ovitumino. Tyilinge omalumono omanyingi ine kaihi, omunthu wokuna otyilinga otyo, kapondola okutomba etyi tyahonekwa pomukanda. Kese tyimwe tyapewa eongano lio Nombangi mba Jeova, tyapakulwa ku Jeova.—Lucas 16:10; 21:1-4.