Omukanda Watunda Kononkhalamutwe mbo Nombangi mba Jeova
Nonthyolwa Vaumbili Vakuetu:
Nehambu enene tuumuhonekela mokuhimbika kuenima eli lihambukiswa! Tyina tuvitula enima 2014, mapalambe otyita tyomanima tunde apa Ohamba yetu Jesus Kristu ekahi nokutumina pokati konondyale mbae.—Sal. 110:1, 2.
Etyi tuehimbika enima eli liovilinga, meliongiyo liokuvitula enima lio Watch Tower Bible and Tract Society of Pennsylvania, o Komisau Yokupitiya Ombimbiliya yalekesa Ombimbiliya omphe yaviukiswa vali nawa melaka lio Ingelesi, Ombimbiliya oyo yapitiyua monkhalelo ovanthu hono vapopia. Jeova waundapesa ovana vae ovakristau ovalembulwa opo vatuavele Ombimbiliya yokonthuko Tradução do Novo Mundo. (Rom. 8:15, 16) Tyotyili otyilinga otyo tyakalesa Ombimbiliya oyo yelikalela unene, ove kutyitavela?
Mokueenda kuomanima omanyingi, o Komisau yo Vahoneki yo Nonkhalamutwe mbo Nombangi mba Jeova vapaka komutwe otyilinga tyokupitiya Ombimbiliya. Hono Ombimbiliya Tradução do Novo Mundo yapitiyua aiho ine otyinthimbu momalaka 121. Tukahi nokukuavela ondundo opo utale oñgeni Jeova apanda unene Ombimbiliya oyo. Itanga ononthiki ambuho nokusokolola kuetyi yapopia. Okulinga ngotyo, matyikuhikiya vali kuhekulu yavo, Jeova Huku.—Tia. 4:8.
Tyituihama unene komitima tyina tuiva ovitateka ovakuatate nonomphange vena. Tutyii okuti pamwe tyipondola okuvepuiya okuvasa ehambu kumwe novakuatate vavo. Mongeleka, Ombunga imwe ko Asia, yanumanene unene etyi me yavo aambuka. Nokuanguangwana onondotolo avehetyivile okumuhakula. Tyiihama unene okutyisoka! Omulume ehimama otyitenya atyiho nokuovola apa mahakulisa omukai wae. Ovana vavo vetatu avaave ongeleka ongwa Youkristau okukuatesako ovohe noluembia. Ombunga oyo ongwa na aveho vekahi nokutyivila okulwa novitateka vielikalaila, vapondola okutehela ehambu liokupameka tyina ekolelo liavo lilolwa. (Tia. 1:2-4) Jeova upameka ovalembulwa nonongi ononkhuavo opo tutualeko nokukoleleya nehambu tyina tumona ovitateka, mokonda matukayambwa omuenyo wahapu!—Tia. 1:12.
Menima liokualamba, ovanthu 19.241.252 vakalele Pehinangelo. Tyitulunda unene okutala omunkhima omunene ukahi nokupewa Jeova na Jesus Kristu tyina tuenda keliongiyo olio liakolela unene menima kovanthu va Huku! Mokueenda kuomuwo Wehinangelo lia Tatekulu, ovanthu ovanyingi vakalele ovakokoli-ndyila vapola pokati mu Tyitalale na Tyikukutu. Otyo tyihambukiswa unene! Iya katuahambukilwe unene etyi tueiva okuti ovakokoli-ndyila vapola pokati vapondola okukala peliongiyo aliho liovakokoli-ndyila tyina omutalelipo womawaneno atalelapo ewaneno, alo umwe inkha ha mohanyi ya Tyitalale na Tyikukutu? Otyiwa tuimbuke ounongo wokukala ovanthu vapama movilinga viokuivisa nomewaneno. Okuundapa unene tyitukuatesako okukala tyapama nokuhatengatenga tyina tulolwa Neliapu atupame mekolelo nokutualako novilinga oviwa.—1 Cor. 15:58.
Tupu tuahambukwa okutala ovanthu 277.344 menima liokualamba velipakula avambatisalwa iya pahe vekahi nokuendela mondyila yomuenyo novakuatate vavo ouye auho! (Mat. 7:13, 14) Ovape ovo vesukisa okukuatesuako opo vakale “tyapama mekolelo.” (Col. 2:7) Tualeiko okulipameka alo konthyulilo. (Mat. 24:13) “Popiei onondaka mbuungumanesa vana vasoya, pamekei vokuatenda, pwei elundo novanthu aveho.” (1 Tes. 5:14) Okumanuhula, kese umwe puonthue “elikuambele apeho,” okuti: “Ouhamba wove uye.”—1 Tes. 5:17; Mat. 6:10.
Mbambavo hambukilwa o Anuário yenima lino, nokukala tyityi okuti tuhole unene kese umwe puonwe na aveho vehole Jeova!
Ovakuatate venyi,
Ononkhalamutwe mbo Nombangi mba Jeova