Pomuvo Wehinangelo Okuti Mohetekela Ombili ya Jeova na Jesus?
1. Ononkhono patyi Onombangi mba Jeova valinga pomuvo Wehinangelo?
1 Jeova ufuisapo ehando nombili. Isaías 9:7 yapopia konthele yovipuka vimwe oviwa mavikaetwa Nouhamba wa Huku okuti: “Ombili ya Jeova ongombo yovita, maiketyilinga.” Tupu, Omona wa Huku puetyi ankho eli pano pohi, wakalele nombili nefendelo liotyotyili. (João 2:13-17; 4:34) Omanima aeho pomuvo Wehinangelo, ovaivisi ovanyingi mouye auho, valinga ononkhono mbokuhetekela ombili ya Jeova no ya Jesus mokuundapa vali unene movilinga viokuivisa. Okuti noove mokala nombili ngoyo?
2. Ombili maitulundu okulinga tyi okuhimbikila monthiki 14 ya Tyitalale?
2 Okukonga Ovanthu Opo Veye Kehinangelo: Menima lino, ovilinga ovanthu opo veye Kehinangelo lia Tatekulu mavihimbika, Tyasapalo 14 ya Tyitalale. Lifuiika nawa pahetyino opo utyivile okupopila vakuenyi nombili tyina omuvo oo wamehikipo. Ovaivisi aveho Mewaneno mavakapewa ondundo yokuundapa nombili potyilongo tyavo atyiho. Linga ononkhono mbokukonga ovalongwa vove Vombimbiliya, na ava uhole okutalailapo, nokukonga vana undapa navo, nombunga, na vana tulongeswa navo kosikola, mokuveavela omukanda wokukonga ine okuvekonga no site jw.org..
3. Oñgeni tupondola okuundapa vali unene movilinga viokuivisa mohanyi ya Tyitalale na Tyikukutu?
3 Ovilinga Vioukokoli-ndyila Wapola Pokati: Ombili tupu maitulundu okuundapa vali unene movilinga viokuivisa. Tyotyili, ovanyingi mavetyivili okuundapa movilinga vioukokoli-ndyila wapola pokati mohanyi ya Tyitalale na Tyikukutu, mokonda tupondola okuava o noola 30. Mefendelo lienyi liombunga, ine melilongeso lioulike, likuambela wiite oñgeni upondola okulinga ngotyo. (Pro. 15:22) Ehambu ukala nalio movilinga viokuivisa, lipondola okulunda vakuenyi vakale nombili. Inkha ulionganeka nawa opo uundape vali movilinga viokuivisa, mohetekela ombili ya Jesus.—Mar. 6:31-34.
4. Ouwa patyi utuka kokuhetekela ombili ya Jeova no ya Jesus?
4 Inkha tuhetekela ombili ya Jeova no ya Jesus momuvo Wehinangelo, matuyambwa unene. Matuivisa ovanthu ovanyingi motelitoliu yetu. Matukala nehambu lituka kokuumbila Jeova, no kokuava. (Atos 20:35) Haunene, matuhambukiswa Huku yetu wombili no Mona wae.