OMUENYO WETU WOUKILISITAU
Ovionge Viononthiki Ononthatu Vitukuatesako Okulekesa Okuti Tulihole
Omokonda yatyi tuholele unene ovionge vietu viononthiki ononthatu? Ngetyi ankho tyilinga ova Isilayeli, nonthue ovionge vietu hono vituavela omphitilo yokufenda Siovaa kumwe novakuatate vetu ovanyingi-nyingi. Tuhole unene ovipuka aviho tulilongesa-mo vitukuatesako okutualako okufenda Siovaa. Tupu tutyihole unene tyokukala nomapanga etu nonombunga mbetu. Mokonda yotyo, tulinga ononkhono mbokuhakambe-po onthiki naike.
Tyina tuamakala nomphitilo yokuliongiya, katupondola vala okusoka koviwa matupoloko, mahi tupu tuna okusoka kuetyi tupondola okulingila vakuetu opo tulekese okuti tuvehole. (Gal. 6:10; Heb. 10:24, 25) Tulekesa okuti tuesuka novakuatate vetu nonomphange, tyina tuveikulila-ko omapito, na tyina tuahapake ovipuka vietu kovipundi tuahamapumphama. (Fili. 2:3, 4) Ovionge viononthiki ononthatu vitukuatesako okulinga omapanga. Tupondola okulinga ononkhono mbokutomphola novakuatate tuehei, tyina otyonge tyehenehimbike na tyina tuombapo, na tyina tyamapu. (2 Kol. 6:13) Okulinga ngotyo tupondola okukala nomapanga otyotyili maatualako atee-tee! Tyihe-otyo vala tyina ovanthu vamatale okuti tulihole, navo vapondola okulihonyeka nonthue mokufenda Siovaa. — Suau 13:35.
HIKISA OVIDIU YATI: “OHOLE KAIPU NALUMWE”! OVIONGE VIOVILONGO OVINYINGI, IYA KONYIMA AMUKUMBULULA OMAPULO AA:
Oñgeni vokuaile kovionge viovilongo ovinyingi vatambulilwe?
Omokonda yatyi onkhalelo ovanthu va Siovaa velihole nonkhalelo velikuata okapandi ihuvisa?
Ovipuka patyi Ononkhalamutwe mbo Nombangi mba Siovaa vapopia vielikuata nohole ovakilisitau vena?
Oñgeni nove upondola okulekesa okuti uhole vakuenyi tyina uli motyonge?
Oñgeni okukala noluembia tyakuatesako ovakuatate vetu ko Alemanha no ko Coreia do Sul?
Oityi onthue tuapanga okulinga?