Okuti Ankho Utyii-ale?
Omokonda yatyi tupopila okuti kova Isilayeli okulinga ovilikutila onopomba nomakuti ankho katyivepuiya?
MOVITUMINO viapelwe Moisesi, okuava ovilikutila onopomba nomakuti Siovaa ankho utyitavela. Omakuti nonopomba apeho ankho vipopilua kumwe mahi omunthu pokuviava ankho ukoya-po vala tyike. (Lev. 1:14; 12:8; 14:30) Omokonda yatyi okulinga ngotyo ankho tyikahi nawa? Omokonda omakuti ankho hapeho avasiwa. Ñgeni ngotyo?
Ekuti
Omakuti ankho akala vala mo Isilayeli pomuvo wokutokota. Tyina tyiti mohanyi ya Outubro ankho enda nokovilongo ovikuavo vitokota. Tyina pamalambe omuvo umwe akondoka vali mo Isilayeli tyina pahe muatokota. (Cân. 2:11, 12; Jer. 8:7) Otyo tyilekesa okuti ova Isilayeli ankho kavetyivili okuava ovilikutila omakuti pomuvo wokutenda.
Opomba
Mahi onopomba ankho mbukala vala mo Isilayeli omuvo watyo auho. Tupu mbutekulua. (Tyieleka na Suau 2:14, 16.) Omukanda umwe upopia ovinyama nomiti wapopia okuti: “Momaumbo no momapundaumbo otyilongo tyo Palestina, apeho ankho uvasamo onopomba. Hekulu yambo ankho una apa embutungila mbukala.” — Tyieleka na Isaías 60:8.
Okandyuo ko nopomba
Siovaa walekesa okuti una oluembia tupu wapola pokati etyi ayeka ova Isilayeli vaave ovilikutila ovipuka ankho venavio omanima aeho.