Okuhiwapo Tyiihama Unene

“Omukai wange ankho utiwa o Sophiaa wanyima-le. Twakala umwe nae omanima alamba 39, pahe ngwe avele umwe ehimbwe, anyimi. Omapanga ange ankhuatesileko unene, ankho hikala andyike. Namphila ankho vakuetu veya ñgoo otyo vankhuatesako, mahi nongotyo andyikala umwe enima nolukalanyana. Pahe ankho pamwe ndyiti vala ñgaa nahambukwa, tyina ndyikati vali ñgaa nanumana. Apa omukai wange anyima pena-le omanima etatu, mahi nongotyo hityivili-ale okumulimbwa, tyina vala ndyimusoka tyindyihama vala.” — Kostas.

Ine no ove wahiwapo tyipondola uliivite ngetyi tyakalele omukulu ou Kostas. Petupu otyipuka tyitwiihama vali tyipona okuhiwapo nomunthu tuhole, pamwe omunthu watyo wokwanyima oyou twelinepele nae, o hamwe ombunga yetu, ya pamwe epanga lietu. Novanthu vokwatanga navo otyo umwe vapopia ngotyo. Omukanda umwe wapopia okuti ovanthu ovanyingi tyina vamahiwapo vasoka okuti wavo wokuanyima wakakota umwe, kamavemumona-mona vali, otyo atyiveihama unene. Tyina omunthu pamwe eihamenwa unene, upondola okulipula omapulo ngaa: ‘Mandyikala ñgaa atee nalupi? Okuti pena umwe onthiki mandyikala umwe tyahambukwa? Oityi mandyilingi hamwe ndyikale nawa?’

Omukanda ou maukumbulula omapulo oo! Onthele mailandulako maipopi oñgeni ovanthu vakala tyina vamahiwapo, tupu maipopi ovitateta patyi vehole okukondya navio. Ononthele ononkhuavo mambupopi etyi tupondola okulinga hamwe etyi tyitwiihama tyitepuluka kapii.

Twahanda ñgeno omukanda ou ukuateseko aveho vana vahiwapo.