4. Okuti Huku Wetutunga Opo Tumone Vala Ononkhumbi?

Omokonda yatyi otyiwa okutyinoñgonoka?

Inkha otyo otyili, opo onthue tuesukisa okunoñgonoka omokonda yatyi. Mahi inkha otyo hatyiliko opo tuesukisa okunongonoka oityi tyaendapo.

Soka kuetyi:

Okuti tyina umwe esilivilo Huku okutunga ohi ongwa konyima atungu ovanthu opo vamone ononkhumbi?

Mokonda yononkhumbi ovanthu ovanyingi vakala nomalusoke apenga konthele ya Huku. Vasoka okuti (1) Huku ketyivili okumanako ononkhumbi, (2) Huku kesuku nonokhumbi tukahi nokumona, ine (3) Huku keko.

Mahi okuti omalusoke oo aviuka?

Oityi Ombimbiliya ipopia?

Huku Katungile ovanthu opo vamone ononkhumbi.

Huku uhanda onthue tukale nehambu.

“Ovanthu vetupu vali natyike otyiwa, tyipona okuhambukwa nokulinga oviwa mokueenda kuomuenyo wavo. Tupu, nanoñgonoka okuti ovanthu aveho valia vanwa, avahambukwa mokonda yovilinga viavo vaundapa nononkhono. Otyo, otyali tya Huku.” — ECLESIASTES 3:12, 13.

Huku wavelele ovalinepi votete atyiho vesukisa opo vakale nomuenyo ukahi nawa.

Huku kahandele vamone ononkhumbi kumwe navana vavo.

“Huku evepopila okuti: Lityitei, amukala ovanyingi, amuyulisa ohi aiho, iya amuitumina.” — GÊNESIS 1:28.

Ovalinepi votete vakoyele okuhetavela Huku.

Mokonda yotyo avelietela ononkhumbi iya novanthu aveho vatunda muvo.

“Mokonda yomunthu wike vala, onkhali yanyingila mouye iya onkhali yaeta ononkhia, ngotyo ononkhia ambuliyandyana movanthu aveho, mokonda aveho valinga onkhali.” — OVA LOMA 5:12.a

Onthue katuatungilwe opo tulitumine, tyahahongolelwa na Huku.

Omunthu katungilwe opo elitumine oe muene, ngetyi ahatungilwe opo akale kohi yomaande.

“Ovanthu vetupu epondolo liokulihongolela ovo muene.” — JEREMIAS 10:23.

Huku kahande ovanthu vamone ononkhumbi.

Otyo etuavelela onondongwa opo mbutukuateseko okukala nomuenyo uhena ovitateka ovinyingi.

“Inkha wetavelele ovitumino viange! Ñgeno ombembwa yove yakala ngondongi.” — ISAÍAS 48:18.