Omulao wa Jefete

WALINGILIALE omulao umue iya konyima aukupwiya okuufuisapo? Omulume ou ukahi polutalatu olu walingile omulao, otyo anumanena. Omulume ou omukoyesi umue wakola omutima womo Isilayeli utiwa o Jefete.

Jefete wakaleleko pomuvo una etyi ova Isilayeli ankho vayekapo okufenda Yehova. Ovo vakondokele okulinga ovipuka ovivi. Iya Yehova ayeke ovanthu voko Amom vevemonese ononkhumbi. Otyo tyatuala ova Isilayeli okuliyava ku Yehova, avati: ‘Tualinga onkhali. Mbambavo, tuyovole.’

Ovanthu ankho velivela mokonda yovipuka ovivi valinga. Valekesa okuti velivela mokuakondoka okufenda Yehova. Moluotyo, Yehova evekuatesako.

Jefete waholovonua novanthu pala okukaluisa ovanthu voko Amon. Jefete wahandele unene Yehova emukuateseko kovilwa ovio. Moluotyo, walaa Yehova okuti: ‘Inkha unkhuatesako andyifindi ovanthu voko Amon, omunthu wotete matundu meumbo liange okuiya nokuame, putyina ndyitunda kovita malingi wove.’

Yehova atehelela omulao wa Jefete, iya emukuatesako okufinda. Etyi Jefete akondoka keumbo, utyii olie watunda tete pala okukemuliepesa? Omona wae wike womuhikuena. Jefete eliyavela okuti: ‘Tatie, mona wange.’ Wandyetela olunuma. Anthi, nalingale omulao ku Yehova, hipondola okukondoka konyima.

Etyi omona wa Jefete eiva kombinga yomulao, tete nae anumana. Mokonda, pahe ankho una yokusapo tate yae nomapanga ae. Akakala omuenyo wae auho okuumbila kondyuo ya Yehova ko Silo. Ngotyo, watolela tate yae okuti: ‘Inkha walingale omulao ku Yehova, una yokuufuisapo.’

Moluotyo, omona wa Jefete waya ko Silo, ngako akakala omuenyo wae auho nokuumbila Yehova mondyuo yae ikola. Kese enima ovakai vo Isilayeli ankho vaya okukemutalelapo, avakala nae ononthiki ononkhuana nehambu enene. Ovanthu ankho vehole unene omona wa Jefete mokonda ankho omuumbili umue omuwa wa Yehova.