O Abigail na David

OMUKAI ou omuwa uhonyena na David umuii? Enyina liae o Abigail. Ankho omukai umue wokuna onondunge. Watyilikile David okukalinga otyipuka tyimue otyivi. Mahi, putyina nkhele tuhenelilongese kombinga yotyo, tutalei oityi tyapita na David.

Etyi David atila Saulu wakaholamene meleva. Ovakulu vae nombunga yae aiho avemulandula, iya avelipake kumue nae. Ankho vali 400 viovalume, iya David alingi onkhalamutue yavo. David akaita ko hamba yo Moabe okuti: ‘Mbambavo yeka tate yange na me yange, vakale noove alo ndyitala oityi matyipiti naame.’ David novalume vae avahimbika okuholama monomphunda.

Konyima yotyo, David elivasi na Abigail. Omulume wa Abigail Nabal, ankho omuhona. Ankho una onongi 3.000 no vikombo 1.000. Nabal ankho ondingavivi. Mahi, omukai wae Abigail ankho omuwa unene. Tupu ankho utyii okulinga etyi tyaviuka. Onthiki imue ayovola ombunga yae. Tutalei oñgeni.

David novalume vae valekesa Nabal eholelo. Vemukuatesako okuyunga onongi mbae. Ngotyo, onthiki imue David watuma ovalume vae opo vakaite ekuateso ku Nabal. Ovalume va David vavasa Nabal novaundapi vae, ankho vekahi nokuteta onongi omainya. Nabal ankho una ovipuka ovinyingi viokulia. Mokonda ankho onthiki yotyipito. Iya ovalume va David avati: ‘Onthue tuekulekesa eholelo. Ponongi mbove katuavakelepo naike. Anthi, tuekukuatesako okumbuyunga nawa. Pahe mbambavo, tuavelevo okulia.’

Nabal ati: ‘Ame hiavela okulia kuange ovanthu ngonue. Nabal apopi nokhalelo imue ombi. Apopi ovipuka ovivi kombinga ya David. Etyi ovalume ovo vakondoka ku David, avemutolela ovipuka ovio aviho. David anumana unene. Iya apopila ovalume vae ati: ‘Manekei omitunga vienyi.’ Iya avahimbika okuenda opo vakaipae Nabal novaumbili vae.

Omulume umue povaundapi va Nabal, ankho weiva onondaka onombi Nabal apopia, eketyipopia ku Abigail. Abigail akanyauka okupongiya ovikulia. Evipake kovimbulu, iya elipake mondyila. Etyi ahonyena na David, Abigail atuluka kotyimbulu tyae, anyongeka omutue iya apopila David okuti: ‘Mbambavo tatekulu, wahatehelele omulume wange Nabal. Utupu onondunge, walinga ovipuka vioulai. Otyiawa tyove otyetyi. Mbambavo tambula, iya tuevele kombinga yetyi tyapopia Nabal.’

David akumbulula okuti: ‘Ove umukai umue wonondunge. Wanthyilika okukaipaa Nabal, mokonda youvi wae. Pahe kondoka keumbo nombembwa.’ Konyima, etyi Nabal ankhia Abigail alingi omukai wa David.