Elongeso 5

Evangelo lya Huku Noohi olipi?

Omokonda yatyi Yehova aetelako Oohi? (1, 2)

Omokonda yatyi Oohi hono hapalaisuko? (3)

Oityi matyikapita nonondingavivi? (4)

Komutwe wandyila, oityi Yesu makalingila ovavei?

navana vokwakulupa? nava vokwankhia? (5, 6) Oityi ove una okulinga opo ukakale nononkhaneno onongwa komutwe wandyila? (7)

1. Yehova waetako Oohi ei opo ovanthu vapondole okukalamo nomwenyo apeho. Oe wahandele Oohi ikalwe apeho novanthu ovavyuki vokuna ehambu. (Salmo 115:16; Isaías 45:18) Oohi kamaikanyimwako lukulu; maikakalako apeho. ​—⁠ Salmo 104:5; Eclesiastes 1:⁠4.

2. Pwetyi nkhele Huku ehenelinge omunthu, Oe wakoya onthele imwe onthutu yoohi ya eilingi opalaisu imwe yokwehiwa. Oe onthele oyo weihana okuti otyikunino tyo Edene. Omu omo oe apaka omulume nomukai wotete, Andau na Eva. Evangelo lya Huku ankho opala vakale novana nokuyulisa Oohi aiho. Mokwenda kwomuvo, Oohi aiho ñgeno veilinga opalaisu. ​—⁠ Gênesis 1:28; 2:​8, 15.

3. Andau na Eva valinga onkhali mokwahatavelele tyawina otyitumino tya Huku. Molwotyo, Yehova wevetaatamo motyikunino tyo Edene. Opalaisu yavombeswa. (Gênesis 3:​1-6, 23) Anthi Yehova kalimbwileko evangelo lyae ankho ena Noohi. Oe walá okulinga Oohi opalaisu imwe, omu ovanthu mavakakala apeho. Oñgeni oe meketyilinga? ​—⁠ Salmo 37:⁠29.

4. Pwetyi nkhele oohi ihenelingwe opalaisu, onondingavivi vena okupolwamo. (Salmo 37:38) Otyo matyikapita mo Armagedon, ovita vya Huku opo amaneko onondingavivi. Konyima, Satanasi makaikwa mokaleiya mokwenda kwo 1.000 yomanima. Otyo tyihangununa okuti naike ondingavivi maikahupako opo ikahanyaune oohi. Ovanthu va Huku ovo vala mavakahupako. ​—⁠ Revelação (Apocalipse) 16:​14, 16; 20:​1-3.

5. Ngotyo Yesu Kristu makavyala ngo Hamba kombanda Yoohi ino mokwenda kwo 1.000 yomanima. (Revelação 20:⁠6) Katutu katutu oe makanyima onkhali momitima nomomalutu etu. Matukakala ovanthu vokwelipwa ngetyi ankho Andau na Eva vali etyi inkha nkhele vehenelinge onkhali. Ngotyo kamakukakala vali omauvela, oukulupe, nononkhia. Ovanthu vokuvela mavakavelulwa ya ovanthu vokwakulupa mavakakala vali ovakwendye ine ovahikwena. ​—⁠ Jó 33:25; Isaías 33:24; Revelação 21:​3, 4. 

6. Mokwenda Kwouvyali wa Yesu Wovityita Ekwi Vyomanima, ovanthu vekolelo mavakaundapa opo vapilulule oohi aiho opalaisu. (Lucas 23:43) Tupu, omakwi nomakwi ovityita vyovanthu vokwankhia mavakatutiliswa pala omwenyo kombanda yoohi. (Atos 24:15) Inkha ovo valinga etyi Huku ahanda, mavakatwalako nokukala nomwenyo apeho kombanda yoohi. Inkha kavetyilingile, mavakahanyaunwako apeho. ​—⁠ João 5:​28, 29; Revelação 20:​11-15.

7. Ngotyo evangelo lyotete lya Huku Noohi malikawanehiwa. Wahandele okulinga onthele mononkhaneno ombu komutwe wandyila? Inkha wahanda, tyasukisa okutwalako nokulilongesa kombinga ya Yehova nokutavela ovitumino vyae. Okwenda komaliongiyo Kondywo Youhamba Yonombangi mba Yehova tyikekukwatesako okutyilinga. ​—⁠ Isaías 11:9; Hebreus 10:​24, 25.

[Elitalatu kemẽla 10]

Opalaisu yavombeswa

[Elitalatu kemẽla 11]

Konyima yo Armagedon, oohi maikapilululwa opalaisu