Elongeso 8
Omwenyo Wombunga Uhambukiswa Huku
Omphangu yomulume mombunga oipi? (1)
Oñgeni Omulume ena okutekula omukai wae? (2)
Ovipi ovilinga vya he? (3)
Otyipi otyilinga tyomukai mombunga? (4)
Oityi Huku ahanda kovohe nokovana? (5)
Oityi Ombimbiliya ipopia kombinga yokuliyapuka nokulihenga (6, 7)
1. Ombimbiliya ipopia okuti omulume oe omutwe wombunga yae. (1 Coríntios 11:3) Omulume una yokukala vala nomukai wike. Ovo vevali vena okukala velinepa ngetyi tyipopia ovitumino.—1 Timóteo 3:2; Tito 3:1.
2. Omulume una yokukala nohole nomukai wae ngetyi elihole oe mwene. Una yokumutekula ngetyi Yesu atekula ovalanduli vae. (Efésios 5:25, 28, 29) Omulume kapondola ni okuveta ine okulinga onya omukai wae. Anthi, una okumuavela ehumbilo nonthilo.—Colossenses 3:19; 1 Pedro 3:7.
3. He una okuundapa nononkhono opo atekule ombunga. Una yokuovola okulia, omuvalo, noondywo pala omukai novana vae. He tupu una yokuavela ombunga yae eteku kespilitu. (1 Timóteo 5:8) Oe ukahi komeho kokukwatesako ombunga yae okulilongesa kombinga ya Huku noyomavangelo Ae.—Deuteronômio 6:4-9; Efésios 6:4.
4. Omukai una okukala omukwatesiko omuwa womulume wae. (Gênesis 2:18) Oe una okukwatesako omulume wae okulongesa nokuavela ontheto ovana vavo. (Provérbios 1:8) Yehova uhanda okuti omukai uyunga nawa ombunga yae neholelo. (Provérbios 31:10, 15, 26, 27; Tito 2:4, 5) Oe una okukala nonthilo yokwaya kohi nomulume wae.—Efésios 5:22, 33.
5. Huku wahanda okuti ovana vatavela kovohe. (Efésios 6:1-3) Ukevelela okuti ovohe valongesa nokuviyula ovana vavo. Ovohe vasukila okupesela omuvo novana vavo, okulilongesa navo Ombimbiliya, nokutala komasuko avo opaspilitu nokomalusoke. (Deuteronômio 11:18; Provérbios 22:6, 15) Ovohe kavapondola okuavela ontheto ovana vavo nonyengo onene ine onoukalavi.—Colossenses 3:21.
6. Putyino ovalinepi vavasa ovitateka mokuheliivite pokati, ovo vena okuovola okukwama elondolo Lyombimbiliya. Ombimbiliya itutuma okulekesa ohole nokukala ovaeveli. (Colossenses 3:12-14) Ondaka ya Huku kailongesako okuti eliyapuko olyo ondyila yokupunguhuna ovitateka ovitutu. Anthi omukai upondola okukoyapo okusapo omulume wae inkha (1) oe uanya okutekula ombunga yae, (2) inkha oe omukalavi unene okuti upaka ekongoko nomwenyo womukai wae motyiponga, ine (3) oundyale wae omunene utyilika omukai wae okufendela Yehova.—1 Coríntios 7:12, 13.
7. Ovalinepi vena okulikolela pokati. Ovipengi kondye yotyinepo onkhali ku Huku nokuuna velinepa nae. (Hebreus 13:4) Ovihonekwa vitutolela okuti okulinga ovipengi kondye yotyinepo olyo vala ehunga lyokulihenga, nokuavela omphito yokunepa vali. (Mateus 19:6-9; Romanos 7:2, 3) Yehova uyele putyino ovanthu velihenga tyihena ehunga Lyovihonekwa ya avakanepa vali umwe.—Malaquias 2:14-16.
[Elitalatu kemẽla 17]
Huku ukevelela okuti ovohe valongesa ovana vavo nokuveviyula
[Elitalatu kemẽla 17]
He weholelo uovola eteku lyombunga yae kolutu nokespilitu