Huku Ukahi Nokukukonga Opo Ukale Epanga Liae

Huku uhanda ove ukale epanga liae. Ove wasokale okuti upondola okukala epanga lia Huku omunene kouye auho? Abraiau omulume umue waliko kohale, ankho wali epanga lia Huku. (Tiago 2:23) Ombimbiliya tupu ipopia kombinga yovanthu ovakuavo ankho vokuali omapanga a Huku, iya avapewa ononkhaneno onongwa. Hono, kononthele ambuho mbouye ovanthu vekahi nokukala omapanga a Huku. Tupu noove upondola okukala epanga lia Huku.

Okukala epanga lia Huku tyikahi vali nawa tyipona okukala epanga liovanthu. Huku kanumanesa omapanga ae okuna ekolelo. (Salmo 18:25) Okukala epanga lia Huku tyikahi vali nawa tyipona okukala nemona. Mokonda yeetyi tyina omuhona amankhi, onombongo mbae mbusala navakuavo. Anthi, vana vokuna oupanga na Huku vena otyipuka tyimwe tyakolela, okuti nauike upondola okuvepolatyo.—Mateus 6:19.

Ovanthu vamue vahanda uyekepo okulilongesa kombinga ya Huku. Alo umue vamue pomapanga ove nopombunga yove vapondola okukutolela uyekepo okulilongesa. (Mateus 10:36, 37) Inkha vakuenyi vekulinga omukuele ine vekupopila uyekepo okulilongesa kombinga ya Huku, lipula ove muene okuti: ‘Olie nahanda okuhambukiswa, ovanthu ine o Huku?’ Pahe sokolola: Inkha omunthu umue ekupopila okuti wahalie vali, ove momutavela? Tyotyili kumutavela. Mokonda ove wesukisa okulia opo ukale nomuenyo. Huku upondola okukuavela omuenyo waapeho. Ngotyo, wahayeke omunthu nauike ekutyilike okulilongesa oñgeni ove upondola okukala epanga lia Huku.—João 17:3.