Sobe Kayekele-po Huku

SATANASI wapopile okuti ovanthu vafenda vala Huku mokonda yovipuka vena, ine vamoneswa ononkhumbi vayekapo okumufenda. Sobe wakembululile omatutu oo a Satanasi.

Sobe ankho ombunga ya Ambalayau wali-ko puetyi ova Isilayeli veli ko Isitu. Kotyilongo ankho akala, hono kutiwa oko Arábia. Nthiki imwe Huku alingi eliongiyo, aihana onoandyu ambuho. Ponoandyu opo ankho na Satanasi opo eli. Peliongiyo opo, Siovaa apopila onoandyu ati petupu omunthu unthyole ngomuumbili wange Sobe. Satanasi akumbulula ati: ‘Ukuhole vala mokonda ove umukuatesako, wemupa ovipuka ovinyingi. Ine umupola umwe ovipuka aviho ena-vyo, motale vala, mekuyekepo.’

Huku ayeke Satanasi apole Sobe aviho ena-vyo. Satanasi emupolo omalumono ae, aipaa ovana vae, emuyumbu ouvela. Sobe ankho usoka okuti o Huku uli nokumumonesa ononkhumbi, mahi soka no ngotyo ehemutyindamena.

Nthiki imwe omapanga etatu a Sobe aemupopopila okuti: ‘O Huku ukahi nokukumonesa ononkhumbi mokonda tyafwa una ovivi waholeka. Tupu Huku yatyo nae mwene kayumbwale onthumbi movanthu vemufenda’. Sobe ehevetavela evepopila eveti: ‘Ame nii vala katutu himayekepo Huku yange!’

Sobe tupu nae wapengesa etyi asoka okuliamena. Omukwendye umwe utiwa o Eliuu nae ankho opo eli, uli vala nokutehela etompho lyoo Sobe nomapanga ae etatu. Pahe apopi ati: ‘Ove Sobe etyi walinga tyokuliamena tyapenga! Siovaa kapengesa. Kupondola okuliamena otendeleya Huku.’ Tupu apopi okuti etyi omapanga a Sobe alinga tyapenga.

Siovaa nae aviyula Sobe. Emulekesa ovipuka ovinene alinga opo Sobe etyimone okuti omututu unene, kapondola okulieleka na Huku. Sobe etavela umwe etyi Siovaa emupopila. Mokonda “Siovaa una oluembia olunene nokankhenda” emuhakula, emuavela ovipuka ovinyingi vilamba puevi ankho ena-vyo, akala vali novana ekwii. (Tiaku 5:11) Sobe welikuatehilile umwe ahayeke-po Huku! Pahe atyimoneka umwe okuti etyi Satanasi apopia okuti ovanthu ine vamoneswa ononkhumbi mavayeke-po okufenda Huku, omatutu vala.

​—Onondaka ombu mbapolwa momukanda wa Sobe.