Onondaka Mbokumanuhula

1, 2. Omokonda yatyi tyakolela okupameka pehepano ekolelo lietu? Ava ongeleka.

EKOLELO. Ondaka oyo ongwa, otyituwa tyimwe otyiwa. Mahi, tyina tuiva ondaka oyo, otyiwa tusoke kondaka onkhuavo yati: “Kuluminya!” Ngotyo, inkha tutupu ekolelo, otyiwa okukuluminya okuovola otyituwa otyo. Iya inkha tuna ekolelo, otyiwa okukuluminya okuliamena nokulitekula. Omokonda yatyi?

² Soka ñgeno ukahi nokueenda moluhandya olunene. Iya pahe waliwa nohunga. Tyina wamavasi omaande weyunga opo ahatokote nomuutenya. Wesukisa okuyulisa onthenda yove muna monu alo uhika kuna wenda. Hono, mopamphepo atuho tukahi ngatyina tueenda moluhandya, mouye uno muhena ekolelo liotyotyili, lielekwa nomaande, kalimoneka inkha katuliyulisa nokuliamena likukuta liwa-liwa. Esuko lietu lialumbana, ngetyi tuhapondola okukala nomuenyo tyihena omaande, tupu katupondola okutualako noupanga na Jeova tyihena ekolelo.​—Rom. 1:17.

3. Oityi Jeova etuavela tyitukuatesako okupameka ekolelo lietu, iya ovipuka patyi vivali tuesukisa okuhinangela?

³ Jeova utyii okuti tyalumbana okukala nekolelo, tupu utyii okuti katyapepukile okupameka nokukala nekolelo hono. Tyotyili otyo Jeova etuavelela onongeleka onongwa tuna okuhetekela. Jeova watuma apostolu Paulu okuhoneka okuti: “Kalei ovahetekeli va vana vapingana omilao mokonda yekolelo noumphua-lundo.” (Heb. 6:12) Iya otyo eongano lia Jeova litulundila okulinga ononkhono mbokuhetekela onongeleka mbovalume novakai vekolelo, tuelilongesa momukanda ou. Oityi tuesukisa okulinga pahetyino? Tutalei ovipuka vivali tuesukisa okuhinangela: (1) Tuesukisa okupameka ekolelo lietu, (2) Tuesukisa okutualako okusoka kekevelelo lietu.

4. Oñgeni Satanasi alekesa okuti ondyale yekolelo, iya omokonda yatyi katuesukisile okukala tyehena ekevelo?

⁴ Tualako okupameka ekolelo liove. Satanasi, ondyale onene yekolelo. Omutumini wouye watyitula ouye uno ngatyina oluhandya muhena ekolelo. Wapama vali tyipona onthwe. Okuti tupondola okukala tyihena ekolelo ine okulipameka? Au! Jeova Epanga enene liovanthu aveho, vaovola okukala nekolelo liotyotyili. Jeova utupopila okuti metukuatesako, iya tupondola okuyala Eliapu alo umwe utuavela ononkhono opo lituende nkholo! (Tia. 4:7) Tuyala Eliapu tyina tuovola omuvo kese nthiki opo tupameke ekolelo lietu. Ñgeni?

5. Oñgeni ovalume novakai vapopiwa Mombimbiliya vakala nekolelo? Hangununa.

⁵ Ngetyi tuetyimona, ovalume novakai vapopiwa Mombimbiliya kavatyitilwe nekolelo. Onkhalelo yavo yomuenyo ilekesa nawa okuti ekolelo lituka kospilitu sandu ya Jeova. (Gál. 5:22, 23) Omalikuambelo avo evekuatesako, iya moluotyo, Jeova apameka ekolelo liavo. Tulingei ngetyi valinga, atuhalimbuiko okuti Jeova wava ospilitu yae otyali ku vana veiita nokulinga etyi tyilikuata nomalikuambelo avo. (Luc. 11:13) Okuti pena vali etyi tupondola okulinga?

6. Oñgeni tupondola okupola unene ouwa tyina tulilongesa omahipululo Ombimbiliya?

⁶ Omukanda ou, wapopia vala katutu konthele yovanthu vekolelo liapama. Mahi kuna vali onongeleka ononkhuavo! (Tanga Hebreus 11:32.) Kese umwe puonthue, monkhalelo evila, una ononkhalelo ononyingi mbo kulikuambela nokulilongesa vali. Inkha tutanga vala nokualumbana konthele yovanthu vekolelo, ekolelo lietu kamalipame. Opo tupole ouwa kuetyi tuatanga, tuesukisa okutaindya omuvo wokuovolola ono versikulu mbatetekela nombu mbalandulako nononthele ononkhuavo mbo Mbimbiliya. Inkha apeho tuhinangela okuti ovalume novakai ovo ankho ovakuankhali “ngonthue,” onongeleka mbavo mambutukuatesako unene. (Tia. 5:17) Nehambu tupondola, okusoka oñgeni ankho velitehelela tyina valinga etyi tyepuiya na tyina vavasiwa novitateka ngo vietu.

7-9. (a) Oñgeni ovalume vamwe novakai vekolelo vokohale ankho velitehelela konthele yefendelo lia Jeova ngetyi tulinga hono? (b) Omokonda yatyi tuesukisila okupameka ekolelo lietu novilinga?

⁷ Tupu tupondola okupameka ekolelo lietu muetyi tulinga. Mokonda “ekolelo lihena ovilinga liankhia.” (Tia. 2:26) Tyina tusoka kuetyi ovalume novakai valinga matuimbuka inkha hono tukahi nokulinga ovilinga vietu ngetyi Jeova etuita!

⁸ Mongeleka, soka ñgeno Abraiau watuminwe vala okufenda Jeova, ahatungu omutala wovilikutila momaluhandya, mahi afende monkhalelo yaongana novafendi ovakuavo va Jeova mo Nondyuo Mbomaliongiyo mbukahi nawa no movionge ovinene, muna atala omilao via Huku vina ankho “atalela vala kokule” vikahi nokuhangununwa nawa. (Tanga Hebreus 11:13.) Iya soka ñgeno Eliya wapopililwe vala etyi tyakutikinya ovilinga viae, ahaipaa ovauli vomatutu va Baale mahi aumbila Jeova motyilongo tyituminwa no nohamba veyele otyili, otyo akatalelapo ovanthu okuvepopila onondaka mbupameka nokuava ekevelo. Tyotyili, ovalume novakai vekolelo vapopiwa Mombimbiliya ankho vetavela liwa-liwa ovilinga vapewa na Jeova, okuti nonthue otyo tulinga hono?

⁹ Ngotyo tutualeiko okupameka ekolelo lietu mokukala novilinga. Tyina tulinga ngotyo, matutyivili okulandula nawa onongeleka mbovalume novakai vekolelo mbukahi Mondaka ya Huku. Ngetyi tyapopia onondaka mbokuhimbika omukanda ou, matulitehela okuti tuafuena vali puvo ngo mapanga etu. Mahi, ngotyo oupanga wetu maukala vali wotyotyili.

10. Ehambu patyi matukakala nalio mouye omupe?

¹⁰ Soka kekevelelo liove. Ovalume vekolelo novakai apeho ankho vapameka ekolelo liavo nekevelo Huku eveavela. Okuti noove otyo ulinga? Mongeleka, nkhele soka kehambu liokulivasa novaumbili va Huku tyina vamakala vali nomuenyo “petutilo lio vaviuki.” (Tanga Atos 24:15.) Ovipuka patyi vimwe ove uhanda okuvepula?

11, 12. Mouye omupe omapulo patyi upondola okulinga (a) Abele? (b) Noe? (c) Abraiau? (d) Rute? (e) Abigaili? (f) Ester?

¹¹ Tyina wamelivasi na Abele, mokakala nehambu liokumupula konthele yombunga yae? Ine hamwe upondola okumupula okuti: “Ankho upopia no noandyu mbuyunga otyikunino tyo Endene? Ankho mbukumbulula? Iya Noe? Upondola okumupula okuti: “Okuti ankho mualuisilwe Nomakihi? Oñgeni muatekula ovinyama menima ankho mukahi mowato omunene?” Inkha uvasa Abraiau, upondola okumupula okuti: “Ove wapopile na Sem? Oityi ekulongesa konthele ya Jeova? Okuti ankho tyapepuka okutunda mo Ur?”

¹² Tupu, upondola okusoka komapulo uhanda okulinga ovakai vekolelo tyina vamatutila. “Rute, oityi tyekulunda opo ukale omuumbili wa Jeova?” “Abigaili, wakalele nowoma wokupopia na Nabale konthele yetyi wakuatesako David?” “Ester, oñgeni muakalele na Mordekai etyi ehipululo Liombimbiliya liapwa?”

13. (a) Ovipuka patyi mokapula vana mavatutila? (b) Oñgeni tyikukalesa okusoka konthele yokulivasa novalume novakai vekolelo vokohale?

¹³ Tyotyili ovalume ovo novakai vekolelo navo vena ovipuka ovinyingi mavekupulu. Matyikahambukiswa unene okupopia konthele yonthyulilo youye uno noñgeni Jeova ayamba ovanthu vae kononthiki mbokuepuiya! Tyotyili mavahambukwa unene okunoñgonoka oñgeni Jeova afuisapo omilao viae aviho. Mouye omupe katyikepuiya okusoka kovaumbili va Huku vekolelo vapopiwa Mombimbiliya. Matukakala navo mouye omupe! Ngotyo tualako nokulinga atyiho uvila pahetyino opo ukelivase novanthu ovo. Tualako okuhetekela ekolelo liavo. Inkha utualako nokuumbila Jeova nehambu ovanthu ovo mavakala omapanga ove apeho!