Okuti Vokwankhia Vapondola Okututila?

ETYI OMBIMBILIYA IPOPIA

“Onondingaviwa mavakatutila naava vehenondingaviwa mavakatutila.” — Ovilinga 24:15, Ombimbiliya Ikola.

OTYO OTYIWA MOKONDA YATYI?

Otyo tyituungumanesa putyina twamasiwa-po. — 2 Ova Kolindu 1:3, 4.

Katutili owoma ononkhia. — Ova Hembeleu 2:15.

Tukevelela onthiki matukelivasa vali no vetu vokwanyima. — Swau 5:28, 29.

OKUTI TUPONDOLA UMWE OKUYUMBA ONTHUMBI MWEETYI OMBIMBILIYA IPOPIA?

Yoo, pena ovipuka vitatu vituyumbisa-ko onthumbi:

• Huku oe watunga ovanthu. Ombimbiliya ipopia okuti Siovaa Huku “ondyivi-ndyivi yomwenyo.” (Oviimbo 36:9; Ovilinga 17:24, 25) Ine Oe watunga ovipuka aviho vili-ko vina omwenyo, opo nokututilisa vokwankhia katyimupono vali.

• Huku kohale watutilisile-ale vokwankhile. Ombimbiliya ipopia okuti kwali-ale ovanthu vena etyinana vatutilisilwe avakala vali nomwenyo — ovana, novakulu, ovalume, novakai. Vamwe kavakalele ehimbwe avatutiliswa, mahi vamwe vapakelwe avakala ononthiki ononkhwana. — Swau 11:39-44.

• Huku wesuka umwe unene natyo tyokututilisa vokwankhia. Siovaa uyele ononkhia; ondyale onene. (1 Ova Kolindu 15:26) Ondyale oyo onene ononkhia, mekeinyima-ko, vokwankhia ekeveeta vali kouye. Vana ahinangela mekevekondola vali kouye. — Sombe 14:14, 15.