Jeremia Kayekelepo Okupopia Konthele ya Jeova

Pamwe ovanthu vetukuela ine vetunumanena tyina tuvepopila konthele ya Jeova. Otyo tyipondola okutukalesa nehando liokuyekapo okupopia konthele ya Huku. Okuti wasokeliale ngotyo?— Ombimbiliya itupopila konthele yomukuendye umwe ankho uhole Jeova mahi ahande okuyekapo okupopia konthele yae. Utiwa o Jeremia. Tulilongese vali konthele yae.

Puetyi Jeremia ankho omututu, Jeova wemutumine akalondole ovanthu opo vahalinge vali ovipuka ovivi. Otyo ankho katyapepukile, iya Jeremia atili owoma. Apopila Jeova okuti: ‘Ame hityivili okupopia. Nkhele ndyimona.’ Mahi Jeova ati: ‘Wahatile owoma. Mandyikukuatesako.’

Moluotyo, Jeremia ahimbika okulondola ovanthu okuti inkha kavapiluluka mavahitiswa. Usoka okuti ovanthu vemutavelele?— Au. Vemukuelele, nokumunumanena unene. Vamwe alo umwe avahande okumuipaa! Usoka okuti Jeremia welitehelelele ñgeni?— Watilile owoma, ati: ‘Himapopi vali konthele ya Jeova.’ Mahi okuti tyilityili wayekeleko umwe?— Au, kayekeleko. Ketyivilile okuyekapo okupopia konthele ya Jeova mokonda ankho umuhole unene. Iya mokonda Jeremia watuaileko, Jeova wemuyovolele.

Mongeleka, nthiki imwe, ovalume vamwe ovakalavi vayumbile Jeremia monyombo imwe yaya kohi nokuna onthata. Ankho utupu okulia nomeva. Ovalume ovo ankho vahanda Jeremia ankhilemo. Mahi Jeova emukuatesako, ahupu!

Oityi ulilongesila ku Jeremia?— Namphila pamwe atilile owoma, kayekeleko okupopia konthele ya Jeova. Tyina upopia konthele ya Jeova, ovanthu vapondola okukukuela ine okukunumanena. Hamwe tyipondola okukukundisa ine okukutilisa owoma. Mahi, wahayekepo okupopia konthele ya Jeova. Apeho mekukuatesako, ngetyi akuatesileko Jeremia.