Elongeso Liouhamba wa Huku Okulongesa Ovaumbili Vohamba

OVE uliyolela tyina utala omulongomoni kotribuna. Omulongomoni, omukuendye womeuaneno lienyi, ukahi nokulinga elongomona liae liotete motyonge. Putyina alinga elongomona, ove uhuva unene nelongeso ovanthu va Huku vapewa. Ove uhinangela onthiki yotete alinga onthele yae kotribuna, pahe utala oñgeni alongoka! Oe walongesua Nosikola Yovilinga via Huku Nosikola Yovilinga Vioukokoli-ndyila. Mononthiki mbokualamba, oe nomukai wae vakuata Mosikola Yovaivisi Vouhamba wa Huku. Putyina ovakuatate vapokela mokonda yelongomona ewa alinga, ove utala kovakuatate otyo usoka kelongeso olio aliho ovanthu va Huku vapewa.

Ombimbiliya yaula omuwo ovanthu va Huku aveho “mavalongeswa na Jeova.” (Isa. 54:13) Tukahi momuwo oo. Onthue katulongeswa vala nomikanda vietu, mahi tupu tulongeswa momaliongiyo etu, no movionge, no monosikola ononyingi mbaonganekwa pala okutukuatesako okufuisapo ovilinga meongano lia Jeova. Monthele ei matulilongesa oñgeni elongeso olio aliho lilekesa nawa okuti Ouhamba wa Huku ukahi nokutumina hono.