Ovola Ehongolelo lia Huku opo Ukale Nehambu Motyinepo

Jeovaa Huku oe wanepesile ovalinepi votete. Ombimbiliya itupopila okuti walinga omukai wotete “emueta komulume.” Andau ahambukwa unene, ati: “Ou, enkhipa liomankhipa ange, nohitu yohitu yange.” (Gênesis 2:22, 23) Jeova na hono uhanda ovalinepi vakale nehambu.

Tyina unepa upondola okusoka okuti ovipuka aviho maviende nawa. Mahi, tyotyili alo umwe omulume nomukai velihole unene, pokati kavo pamoneka ovitateka. (1 Coríntios 7:28) Mombruchula ei, muna onondonga Mbombimbiliya, iya inkha umbulandula, mokala notyinepo tyina ehambu nombunga ina ehambu.​—Salmo 19:8-11.

1 TAVELA OTYILINGA JEOVA EKUAVELA

ETYI OMBIMBILIYA IPOPIA: Omulume oe omutwe wombunga.​—Efésios 5:23.

Inkha ove wanepa, Jeova ukevela utekule omukai wove noluembia. (1 Pedro 3:7) Jeova walinga omukai akale omukuatesiko wove, iya uhanda umutekule nonthilo, nohole. (Gênesis 2:18) Una okukala nohole onene nomukai wove, okupaka omasuko ae komutwe womasuka ove.​—Efésios 5:25-29.

Inkha wanepua, Jeova ukevela ukale nonthilo onene nomulume wove nokumukuatesako okufuisapo otyilinga tyae. (1 Coríntios 11:3; Efésios 5:33) Mukuatesako momatokolo ae nokuundapa kumwe nae nomutima auho. (Colossenses 3:18) Tyina ulinga ngotyo, mokala omuwa komaiho omulume wove no komaiho a Jeova.​—1 Pedro 3:1-6.

OITYI UNA OKULINGA:

• Pula una muelinepa nae oñgeni upondola okukala omulume omuwa ine omukai omuwa. Tehelela nawa, olingi etyi wesukisa okuviukisa

• Pwa elundo. Tyesukisa omuwo opo kese umwe alinge etyi tyihambukiswa mukuavo

2 SUKA NONKHALELO UNA MUELINEPA NAE ELITEHELELA

ETYI OMBIMBILIYA IPOPIA: Wesukisa okutala vali komasuka-suka a una muelinepa nae. (Filipenses 2:3, 4) Tekula una muelinepa nae ngatyina akolela, okuhinangela okuti Jeova uhanda ovaumbili vae “vakale onondalawa novanthu aveho.” (2 Timóteo 2:24) “Kuna una upopia onondaka mbutoma ngomutunga, mahi elaka liovana-ndunge lihakula.” Ngotyo, holovona nawa onondaka mbove. (Provérbios 12:18) Ospilitu ya Jeova maikukuatesako okupopia nokankhenda nohole.​—Gálatas 5:22, 23; Colossenses 4:6.

OITYI UNA OKULINGA:

• Likuambela opo ukuatesueko okukala tyapoleya nokusoka nawa tyina nkhele muhenepopie konthele yovitateka na una muelinepa nae

• Soka nawa konthele yetyi mopopi no ñgeni mopopi

3 SOKELEI KUMWE

ETYI OMBIMBILIYA IPOPIA: Tyina wamanepe, mukala “ohitu ike” na una muelinepa nae. (Mateus 19:5) Mahi nkhele muvevali iya mupondola okukala nomalusoke elikalela. Ngotyo, muesukisa okulilongesa okuhonyeka omalusoke enyi, netyi mulitehela. (Filipenses 2:2) Okusokela kumwe tyakolela tyina mulinga omatokolo. Ombimbiliya yati: “Okulipakelamo, ovipuka vienda nawa.” (Provérbios 20:18) Yekei onondonga Mbombimbiliya mbumuhongolele tyina mulinga amuho omatokolo akolela.​—Provérbios 8:32, 33.

OITYI UNA OKULINGA:

• Suka no ñgeni una muelinepa nae ulitehelela tyina upopia etyi wasoka

• Pula una muelinepa nae tyina nkhele uhenetokole etyi molingi