Oñgeni Onombongo Mbuundapeswa

Atuho tuesukisa onombongo opo tuavele ombunga yetu ovipuka yesukisa. (Provérbios 30:8) Ngotyo, “onombongo mbuyakulila” ovanthu. (Eclesiastes 7:12) Kovalinepi tyipondola okupuiya unene okupopia konthele yonombongo, mahi muhayekei onombongo mbuete ovitateka motyinepo tyenyi. (Efésios 4:32) Ovalinepi vesukisa okuliyumba onthumbi poyavo, nokuundapela kumwe tyina vatokola oñgeni mavaundapesa onombongo.

1 PANGEI NAWA

ETYI OMBIMBILIYA IPOPIA: “Olie puonwe, tyina ahanda okutunga ondyuo, kapumphama tete iya avalula otyiñgapi mapesela, opo atale inkha una etyi tyituuka pala okuivitula?” (Lucas 14:28) Otyiwa okulipakelamo oñgeni mamuundapesa onombongo. (Amós 3:3) Talei nawa etyi muesukisa, iya otyiñgapi tyilanda. (Provérbios 31:16) Mokonda muna onombongo mbutuuka okulanda otyipuka tyimwe, katyilekesa okuti muna okutyilanda. Lityilikei onongele. Landei vala etyi tyata monombongo muna.​—Provérbios 21:5; 22:7.

OITYI MUNA OKULINGA:

• Inkha tyina ohanyi ipwa pahupa onombongo, lipakeleimo amuho oñgeni mamulingi onombongo ombo

• Inkha muatala muesala tyihena onombongo, lipakeleimo etyi mamuyekepo okulanda. Mongeleka, telekei okulia kuenyi tyipona okulia mo nombale

2 POPIEI OTYILI NOKUKALA NOLUSOKE LIAVIUKA KONTHELE YONOMBONGO

ETYI OMBIMBILIYA IPOPIA: “Tulanda ovipuka tyihavake, ha komaiho a Jeova vala mahi tupu nokomaiho ovanthu.” (2 Coríntios 8:21) Linga ovipuka tyihavake una muelinepa nae konthele yetyi ufetwa netyi ulanda.

Apeho pula una muelinepa nae tyina ulinga etokolo enene konthele yonombongo. (Provérbios 13:10) Okutomphola konthele yonombongo tyikuatesako okukala nombembwa motyinepo. Uhatale onombongo ufetwa, ngatyina ombove, mahi mbutala ngatyina ombombunga.​—1 Timóteo 5:8.

OITYI MUNA OKULINGA:

• Popiei otyiñgapi kese umwe apondola okupesela tyihesukisa okupula mukuavo

• Uhakevele alo pamoneka ovitateka otyo muhenepopie konthele yonombongo