Oñgeni Molongesa Omona Wove

Etyi Jeova alinga ombunga, wavela ovohe otyilinga tyokutekula ovana. (Colossenses 3:20) Ove he, ove una otyilinga tyokulongesa omona wove okuhumba Jeova, nokukala omukulu una onondunge. (2 Timóteo 1:5; 3:15) Tupu una okuovola okunoñgonoka etyi tyikahi momutima womona wove. Tyotyili, ongeleka yove yakolela unene. Motyivili okulongesa nawa omona wove Ondaka ya Jeova inkha tete wiipaka momutima wove.​—Salmo 40:8.

1 KALA OMUNTHU WAHATILISA OWOMA OPO OVANA VOVE VATOMPHOLE NOVE

ETYI OMBIMBILIYA IPOPIA: “Kanyauka okutehelela, iya olipulukwa okupopia.” (Tiago 1:19) Tyotyili, ove uhanda ovana vove vatomphole nove, avehekutili owoma. Mahi, vena okunoñgonoka okuti ove wafuapo pala okuvetehelela tyina vahanda okupopia nove. Kala nombembwa opo ovana vove tyihevepuiye okutomphola nove. (Tiago 3:18) Inkha vasoka okuti ove umukalavi ine uvetañgunisa, kamavetyivili okupopia etyi vasoka. Pwa elundo novana vove, nokulekesa okuti uvehole.​—Mateus 3:17; 1 Coríntios 8:1.

OITYI UNA OKULINGA:

• Tehelela ovana vove tyina vena etyi vahanda okupopia

• Tomphola apeho novana vove, uhakevele vala tyina pena ovitateka

2 OVOLA OKUNOÑGONOKA ETYI VAHANDA OKUPOPIA

ETYI OMBIMBILIYA IPOPIA: “Una upunga nawa ovipuka makavasa ouwa.” (Provérbios 16:20) Pamwe, wesukisa okutala konyima yonondaka mbomona wove oityi mbulekesa no ñgeni elitehelela. Ovana pamwe vapopia ovipuka vimwe mahi ankho hatyoko vahanda okupopia. “Tyina omunthu akumbulula otyipuka tyina nkhele ehenetyiive, owova.” (Provérbios 18:13) Uhanumane liwa.​—Provérbios 19:11.

OITYI UNA OKULINGA:

• Tokola okuhatyilika ine okunumana tyina omona wova apopia

• Ovola okuhinangela oñgeni ove ankho ulitehela puetyi ukahi meti liae netyi ankho tyimoneka ngoti kuove tyakolela

3 LEKESEI OKUTI MUELIVILA

ETYI OMBIMBILIYA IPOPIA: “Mona wange, tehelela onondonga mba ho, wahayekepo otyitumino tya nyoko.” (Provérbios 1:8) Otyilinga tyokuhongolela ovana, Jeova wetyiavela ovohe. Muna okulongesa omona wenyi opo akale nonthilo nonwe, nokumutavela. (Efésios 6:1-3) Ovana kamavetavela inkha ovohe kavekahi “tyelikuata kumue nomutima wike.” (1 Coríntios 1:10) Inkha kamwelivilile, muhapopilei povana, mokonda okulinga ngotyo kamavakala nonthilo nonwe.

OITYI UNA OKULINGA:

• Lipakeleimo, amulitavela oñgeni muna okulonga ovana venyi

• Inkha una olusoke luelikalela no lwa una muelinepa nae konthele yokulonga ovana, ovola okutala etyi una muelinepa nae asoka

4 PANGEI ETYI MAMULINGI

ETYI OMBIMBILIYA IPOPIA: “Longesa omukuendye ondyila yaviuka palae.” (Provérbios 22:6) Okulongoka kuomona katyiya vala atyike. Muesukisa okupanga etyi mamulingi, netyi mamulongo omona wenyi. (Salmo 127:4; Provérbios 29:17) Okulonga omona ha kuveta vala, mahi muakutikinya okukuatesako omona okunoñgonoka omokonda yatyi esukisila okulandula ovitumino. (Provérbios 28:7) Tupu, velongesei okuhumba Ondaka ya Jeova nokupaka nawa ovitumino viayo. (Salmo 1:2) Otyo matyikuatesako ovana okukala nombungo yasukuka.​—Hebreus 5:14.

OITYI UNA OKULINGA:

• Tala ovana vove inkha vatala Huku okuti Omunthu wotyotyili una vapondola okuyumba onthumbi

• Vekuatesako okunoñgonoka oñgeni mavaimbuka ovipuka ovivi vipondola okuvenyona no ñgeni vapondola okulityilika vio, ngevi vivahiwa mo Internete. Velongesa oñgeni mavelityilika vana vahanda okulinga navo otyihola