Wakuata Komuvalo Wa Sesusi Aveluka

Etyi Sesusi atunda ko Dekapoli, atyiivala kova Sundeu aveho ankho vakala kokulio kuekumbi konthele Kelunga lyo Ngalileya. Tyipondola ankho ovanyingi vetyiiva okuti Sesusi watalameka omphepo onene, ankho yakatuka melunga, nomaande iya vamwe ankho vetyiiva okuti wahakula omulume ankho una ovilulu. Ngotyo, “ovanthu ovanyingi” avelikongololela kelunga, tyafuile mo Kafalanau opo vayakule Sesusi. (Maluku 5:21) Putyina Sesusi ankho ekahi nokuya, avahambukwa, mokonda ankho vesuka unene nae.

Omunthu umwe ankho uhanda unene okutala Sesusi o Sailu, onkhalamutwe yondyuo yokufendela, tyafuile mo Kafalanau. Aikila konongolo, ponomphai mba Sesusi, emuiti ovikando ovinyingi okuti: “Omona wange womukainthu wavela unene. Mbambavo endyu ukemupake omavoko ove, opo aveluke akala nomuenyo.” (Maluku 5:23) Oityi Sesusi ankho malingi opo akuateseko Sailu wemuita avelule omona wae wike vala, ankho una omanima 12, omona ankho ehole unene? — Luka 8:42.

Etyi Sesusi ankho ekahi mondyila okuenda no keumbo lya Sailu, avasi vali omunthu una otyitateka tyietesa okankhenda. Ovanthu ovanyingi ankho valandula Sesusi avahambukwa, mokonda ankho vahanda okutala inkha malingi vali ehuviso ekuavo. Mahi, omukai umwe ukahi pokati kavo ankho wasukalala vali unene nouvela wae.

Omukai oo omu Sundeu, ankho uvela konohanyi otyo tyihatalama mokueenda kuomanima 12. Wahakulilue nonondotolo ononyingi, afete onombongo mbae ambuho opo ahakulwe ngetyi ankho onondotolo mbumutuma. Mahi, ahaveluka. Ouvela wae ‘ankho uvilapo vala.’ — Maluku 5:26.

Ove tyafuile utyii nawa okuti ouvela wae, ankho kawemuhokesile vala, mahi tupu ankho umusoyesa nokumukundisa. Ankho oo, ouvela umwe uhapopilwa povanthu. Tupu, tyina omukai avela konohanyi, Movitumino Viapelwe Moisesi ankho wasila. Omunthu ankho uyama kwe ine kovikutu viae, usukisa okulikoha iya akala tyasila aloo kokangulohi. — Levítico 15:25-27.

Omukai oo weivile “ovipuka vipopiwa novanthu konthele ya Sesusi,” pahe ekemuovola. Mokonda youvela wae, ayombela, akuate pokati kovanthu, otyo elipopila okuti: “Inkha ndyikuata vala kotyikutu tyae, mandyiveluka.” Etyi akuata kotyikutu tya Sesusi, liwa-liwa elitehelela okuti ohonde yae yatalama! Ankho “waveluka kouvela oo weeta emone.” — Maluku 5:27-29.

Konyima, Sesusi apulu okuti: “Olie wankhuata?” Oñgeni omukai oo elitehelela etyi eiva onondaka ombo? Petulu akumbulula monkhalelo yokumuviyula, ati: “Mulongesi, ove ukahi pokati kovanthu ovanyingi, vekahi nokukuhitikinya.” Mahi, omokonda yatyi Sesusi apulila okuti: “Olie wankhuata?” Sesusi wati: “Pena omunthu wankhuata, neiva mu ame muatunda epondolo.” (Luka 8:45, 46) Okuahakula ouvela oo, tyemupola ononkhono.

Etyi omukai etyimona okuti etyi alinga tyamoneka, aikila konongolo ponthele ya Sesusi, nokuatila owoma nokuateketa. Apopila pokati kovanthu aveho otyili konthele youvela wae, tupu apopi okuti pahe wavelulwa. Nokankhenda, Sesusi emupameka, ati: “Mona wange, ekolelo liove liekukalesa nawa. Enda nombembwa, uhasukalale ouvela wove wahakuka.” — Maluku 5:34.

Tyimoneka nawa okuti, Omunthu Huku aholovona opo atumine ohi una oluembia, omunthu wokankhenda, kesukile vala novanthu, mahi una epondolo liokuvekuatesako!