Ondalelo Ya Tatekulu

Kongulohi motyinthiki otyo, Sesusi ankho walongesa ovalongwa vae otyituwa tyokuliola omutima, etyi akoha onomphai mbavo. Mokutala etyi vamana okulia Opasikwa, apopi onondaka Daviti apopile, ati: “Omulume umwe ankho tukala nae nombembwa, una ame ankho ndyiyumba onthumbi, ankho ulia ombolo yange, wanthyitukila-po akala ondyale yange.” Konyima apopi okuti: “Umwe pu onwe mamphakula.” — Salmo 41:9; Suau 13:18, 21.

Ono apositolu avelitale poyavo, kese wike apulu okuti: “Tatekulu, okuti ame?” Alo umwe na Sunda apulu ngotyo. Petulu apopila Suau, ankho ukahi ponthele ya Sesusi komesa opo apule olie memupakula. Ngotyo Suau afuene pu Sesusi, apulu ati: “Tatekulu olie upopia?” — Mateusi 26:22; Suau 13:25.

Sesusi emukumbulula okuti: “Oyouna mandyiavela otyimbembu tyombolo ame nayava motyilindo.” Sesusi ayave otyimbembu tyombolo motyilindo, etyiavela Sunda, ati: “Omona womulume maende ngetyi ovihonekwa vipopia, mahi una uyondya Omona womulume ngongo yae! Hahe vali inkha omunthu oo katyitilwe.” (Suau 13:26; Mateusi 26:24) Konyima Satanasi anyingila mu Sunda. Omulume oo ondingavivi, ankho pahe weliava opo alinge ehando Lieliapu, ngotyo akala “omona wehanyauno.” — Suau 6:64, 70; 12:4; 17:12.

Sesusi apopila Sunda okuti: “Etyi ukahi nokulinga, tyilinga liwa.” Ono apositolu vakuavo avasoko okuti, mokonda Sunda oe una okakasa konombongo, ukahi nokupopilwa okuti: “‘Kalande ovipuka tuesukisa motyipito,’ ine hamwe, aavele tyimwe ovahepi.” (Suau 13:27-30) Mahi Sunda alupuka, ekelipongiya opo apakule Sesusi.

Motyinthiki otyo tyo Pasikwa, Sesusi ahimbika otyipuka tyimwe otyipe. Akuate ombolo, elikuambela, eivembaula, aavela ono apositolu valie. Ati: “Etyi otyilekeso tyolutu luange, maluaawa pala ouwa wenyi. Tualeiko okutyilinga opo munthyinangele.” (Luka 22:19) Avelitambeka aveho, avali-ko.

Pahe Sesusi apolo okopo yovinyu, elikuambela, eiyavela ono apositolu. Aveho avanu kovinyu oyo iya Sesusi apopi okuti: “Okopo ei otyilekeso tyomphango omphe mokonda yohonde yange, maikamomeswa pala ouwa wenyi.” — Luka 22:20.

Ngotyo, Sesusi wahimbika ehinangelo liononkhia mbae, iya ovalanduli vae aveho ankho vena okutyihinangela omanima aeho monthiki 14 ya Nisan. Otyo ankho matyivehinangailisa etyi Sesusi na Tate yae valinga opo ovanthu aveho vena ekolelo vayovolwe konkhali no kononkhia. Ehinangelo olio ankho liakolela vali tyipona Opasikwa yova Sundeu, mokonda ankho lilekesa eyovo liotyotyili liovanthu aveho vena ekolelo.

Sesusi wati ohonde yae ankho “maimomeswa mokonda yovanthu ovanyingi, opo vaevelwe ononkhali.” Ankho pu vana mavaevelwa ononkhali pakutikinya ono apositolu mbae vekolelo novanthu ovakuavo vena ekolelo ngavo. Ankho mavakakala nae Mouhamba wa Tate yae. — Mateusi 26:28, 29.