Likwatehila Wahatunde Meongano lya Siovaa

TIAKU wapopile okuti: “Fwenei ku Huku, nae na afwene kwoonwe.” (Tia. 4:8) Namphila tuvakwankhali, Siovaa kekahi kokule noonthwe, tyina tulikwambela ututehelela. (Ovil. 17:27) Mahi oñgeni matufwene ku Siovaa? Oputyina tumunoñgonoka umwe nawa tukale omapanga ae, na tyina tulikwambela kwe. (Ovii. 39:12) Otyikwavo, oputyina tulilongesa umwe nawa Ondaka yae Ombimbiliya ononthiki ambuho. Tyina tulinga ngootyo, tunoñgonoka umwe nawa Siovaa neetyi etuhandela. (2 Tim. 3:16, 17) Tyina twamemunoñgonoka nawa, matumuhumbu vali, ya kamatulingi natyike tyimunumanesa. — Ovii. 25:14.

² Mahi matukala vala omapanga a Siovaa tyina tunoñgonoka nawa Sesusi Kilisitu. (Swau 17:3; Loma 5:10) Tyina tunoñgonoka umwe nawa Sesusi, tutyivila okunoñgonoka oñgeni Siovaa asoka. Sesusi ankho wii umwe nawa tate yae. Otyo apopila okuti: “Nawike wii Omona ehe He, nawike wii vali nawa He ehe Mona wae, ou wemunoñgonoka nkhwali wemupopilwa Nomona.” (Luka 10:22) Tyina tutanga umwe nawa ono Evandyeliu, tunoñgonoka nawa Sesusi, tunoñgonoka etyi ankho asoka neetyi ankho ekahi. Tupu tunoñgonoka umwe nawa oñgeni Siovaa ekahi. Ya otyo tyitukwatesako okukala omapanga ae.

³ Tululikwa nomona wa Huku Sesusi. Oe utukwatesako okukala omapanga a Siovaa, atwahatundu meongano liae. Ya eongano litukwatesako okulinga etyi Siovaa ahanda. Ngeetyi tyipopia omukanda wa Mateusi 24:45-47, Sesusi Kilisitu oe wakoya “omupika omukwatyili, walunguka ape vo meumbo liae okulia mononthiki mbatyo mbanakwa.” Hono omupika oo utwavela okulia okunyingi kutukwatesako okupameka oupanga wetu na Siovaa. Utupopila tutange Ondaka ya Huku apeho, nokwivisa apeho “oviwa ovipe Viouhamba.” (Mat. 24:14; 28:19, 20; Susu. 1:8; Ovii. 1:1-3) Namphila omupika omukwankhali, katupondola okusoka okuti ovipuka etupopila oe vala wevihinda. Tuna okulikwatehila umwe tukakatele meongano lya Siovaa, atulingi atyiho tupopilwa. Okulinga ngootyo, matupameka vali oupanga wetu na Siovaa. Tyina twamakala novitateka, Siovaa kamatumuyekepo.

OITYI TUYELELELWE UNENE?

⁴ Ove hamwe ukahi-ale nokufenda Siovaa omanima omanyingi. Hamwe wakalele-ale notyitateka tyimwe wesukisile okukoleleya wahayekepo Siovaa. Mahi ine wanoñgonoka vala pahe Siovaa, utyii okuti Satanasi Eliapu likahi nokututumba opo liyondye ovanthu aveho vetavela ku Siovaa. (2 Tim. 3:12) Naina, tyilinge wakalele-ale novitateka ovinyingi, tyilinge evi wakalele navio kavihi, wahasoye, wahatile owoma. Siovaa mekukwatesako, komutwe wandyila ekekwavela omwenyo wahapu. — Hemb. 13:5, 6; Ehol. 2:10.

⁵ Mononthiki mbuno mbahulilila, onthwe atuho tufenda Siovaa matuyalwa umwe. Etyi Sesusi ahimbika okutumina keulu mo 1914, atahela Satanasi pano pohi. Satanasi novilulu viae veli vala nokumonesa ononkhumbi ovanthu pano pohi. Ononkhumbi tuli nokumona mouye uno, novanthu va Siovaa veyelwe unene, omokonda Satanasi wanumana unene. Ovipuka tuli nokumona vilekesa umwe okuti tuli kononthiki mbahulilila. — Ehol. 12:1-12.

⁶ Satanasi wanumana unene mokonda utyeete okuti pahe omuvo wae wapwa-po. Pahe nae novilulu viae vekahi nokututumba opo ovanthu va Siovaa vehelikwatepo, ovilinga viokwivisa avitalama. Onthwe tuli movilwa, ya ngeetyi Ombimbiliya ipopia, “onthwe twapambeka twelikwata umwe, mahi ha nohonde nohitu, o nonohamba, o novanene vatyo, o novatumini venthiki liouye uno, o nonomphepo onombi, mbononkhono, mbuli konomphangu mbo keulu.” Opo tutyivile okulwa Satanasi ehetuvili, tuna okumaneka onondyakulilo ambuho Siovaa etwavela. Tuna okukala ‘tyitai omaliva Eliapu ehetutokese.’ (Efe. 6:10-17) Opo Eliapu liehetutokese, tuna okupameka, atukoleleya.

OITYI UNA OKULINGA UTYIVILE OKUKOLELEYA?

⁷ Okukoleleya okulikwatehila tyina una ovitateka. Ku vana vokufenda Huku, okukoleleya oko, okulikwatehila valinge etyi tyaviuka naapa vena ovitateka, na tyina veyelwe oo vamoneswa ononkhumbi, avakakatela umwe vala mu Huku. Okukoleleya oko, katyiya vala atyike. Tyiya umwe vala tyina tukula motyili. Tyina tupameka onthumbi yetu mu Siovaa, tupama motyili, tyina haa tumona ovitateka atutyivili okukoleleya. (Luka 16:10) Twahakevelei okukala novitateka ovinene, opo tupameke onthumbi yetu. Twesukisa okupameka onthumbi yetu tyina nkhele twehenemone ovitateka. Omutumwa Petulu wapopile okuti opo tutyivile okukoleleya tuna ovipuka ovikwavo vali tuna okulinga. Watile: “Otyo tyahandela onwe mulikwatehile keyumba-nthumbi lienyi muyawise-ko ouwa, kouwa wenyi amuyawisa-ko enoñgonoko, kenoñgonoko lienyi amuyawisa-ko okulioondweya, kokulioondweya kwenyi amuyawisa-ko okukoleleya, kokukoleleya kwenyi amuyawisa-ko onthilo na Huku, konthilo yenyi na Huku amuyawisa-ko okulihole umwe tyokulikwai, ko tyokulihole amuyawisa-ko olwembia novanthu aveho.” — 2 Pet. 1:5-7; 1 Tim. 6:11.

⁸ Tiaku wapopia okuti okukoleleya otyiwa. Wahoneka okuti: “Tyimupe ehambu okukondya nononkhumbi vanthu vetu, mokonda onwe mutyii okuti eyumba-nthumbi lienyi okukanguka umwe nawa, lityita okukoleleya. Mahi okukoleleya tyiyekei tyivitule umwe otyilinga, onwe opo mufwepo umwe, amukongoka umwe mu atyiho, amwahakambe natyike.” (Tia. 1:2-4) Tiaku wapopia okuti ovanthu va Huku vena okuhambukilwa ononkhumbi mokonda mbweeta okukoleleya. Okuti noove tyina una ovitateka uhambukwa? Tiaku wapopia vali okuti okukoleleya tyitukwatesako okukala ovanthu vapama motyili, vetyivila okulinga etyi Huku ahanda. Tyina tukoleleya movitateka tukala navio ononthiki ambuho, tupama vali. Tyina tuna ovitateka atukoleleya, kokukoleleya kwetu tuyawisako ovituwa ovikwavo vali tuna yokukala navio.

⁹ Tyina tukoleleya tuhambukiswa Siovaa, ya ngwe meketwavela omwenyo wahapu. Tiaku wahoneka vali okuti: “Uhambukwa oyo una wahayeke-ko ukoleleya ononkhumbi, mokonda mokukangulwa omo makatambula otyuuya tyomwenyo, etyi Siovaa apangela ava Vemuhole vehemuyeke.” (Tia. 1:12) Onthwe tukoleleya umwe mokonda atuho twahanda okukamona omwenyo wahapu. Ine katukoleleya, tyina twamahongilinywa okulinga otyipuka tyimwe otyivi, matuyekepo eongano lya Siovaa atukondoka mouye. Ine katukoleleya, Siovaa kametwavela vali ononkhono mbae, ya opo kamatutyivili okukala notyinyango tyomphepo ikola.

¹⁰ Opo tutyivile okukoleleya mononthiki mbuno mbokwepwiya, katupondola okusoya tyina tumoneswa ononkhumbi mokonda yokufenda Huku. Hinangela etyi Tiaku apopia, wati: “Tyimupe ehambu okukondya nononkhumbi.” Pamwe tyipwiya unene mokonda soka pamwe tuvetwa umwe, pamwe tupopiwa otyipuka tyimwe tyitwiihama unene. Mahi wahalimbweko, mokapewa vala omwenyo komutwe wandyila ine ukoleleya. Etyi tyalingilwe ovatumwa tyitukwatesako okutala okuti noonthwe tupondola okuhambukilwa ononkhumbi. Omukanda Ovilinga 5:40, 41 upopia okuti: “Avaihana ovatumwa aveveveta-veta vala, avevepe otyitumino vahapopie vali enyina lya Sesusi, aveveyeke. Pahe Mombonge Onene avatundu-mo, avai tyahambukwa tyokwamoneswa emone kombanda yenyina lya Sesusi.” Ovatumwa ankho vetyii okuti veli tupu nokumoneswa emone, otyetyi vetavela otyitumino tya Sesusi. Ankho vetyii okuti etyi valinga tyahambukiswa Siovaa. Etyi pakala omanima amwe, Petulu ahoneka omukanda, ya momukanda omo apopi-mo ononkhumbi vamonesilwe mokonda yokulinga etyi tyaviuka. — 1 Pet. 4:12-16.

¹¹ Nthiki imwe etyi ovo Paulu na Sila ankho veli nokwivisa mo Filipu, vakwatelwe avapakwa mokaleya, avahungwa okuti veli vala nokweeta onondyaya mepunda-umbo nokuhahanesa oviso viahaviukile. Avevevete umwe unene, avevepake mokaleya. Ombimbiliya ipopia okuti etyi tyati mokati kovinthiki pokuli umwe mokaleya omo, nkhele tyeihamenwa umwe vala, “ovo Paulu na Sila ankho pahe veli nokulikwambela otyo vahilivika Huku noviimbo, vakwavo ononkhwatwa aveveivi.” (Ovil. 16:16-25) Ovo Paulu na Sila pokwakwatwa pana, ankho vetyii okuti petupu natyike otyivi valinga, omokonda vala yokwetavela ku Siovaa. Otyo atyiveavela vali omphitilo yokwivisa oviwa ovipe kovanthu ovakwavo. Okukoleleya kwavo akukwatesako umwe na vakwavo. Motyinthiki tyatyo umwe omo, omuyungi wokaleya no vomeumbo liae avakala ovalanduli va Sesusi. (Ovil. 16:26-34) Pweetyi ovo Paulu na Sila ankho veli nokumoneswa ononkhumbi, ankho vetyii umwe okuti Siovaa mevekwatesako. Ngwe Siovaa evekwatesako umwe.

¹² Na hono tyina tumoneswa ononkhumbi, Siovaa utukwatesako. Namphila etukwatesako, mahi wahanda noonthwe tulikwatehile atukoleleya. Wetwavela Ondaka yae opo twitange, tunoñgonoke umwe nawa etyi etuhandela, atumuyumbu onthumbi. Wetwavela omaliongiyo, omu tukala na vakwetu, atumufende. Tupu wetwavela vali otyipuka tyimwe otyiwa, wetuyeka tupopie nae melikwambelo. Tyina tulikwambela tumupandule, na tyina tumwiita etukwateseko tukale noupanga wapama nae, ututehelela. (Fili. 4:13) Okusoka koviwa matukamona komutwe wandyila, tyitupameka. — Mat. 24:13; Hemb. 6:18; Ehol. 21:1-4.

OKUKOLELEYA TYINA TUYELWE

¹³ Ononkhumbi tumona hono, ombo mbamwene ovalanduli va Sesusi Kilisitu kohale. Na hono Onombangi mba Siovaa vapopiwa omapita, pamwe atee vavetwa umwe novanthu vokuveyele. Ngeetyi tyali pononthiki mbovatumwa, haunene vokuyele Onombangi mba Siovaa, ovanthu vonongeleya. Etyi valongesa neetyi valinga, hatyetyi-ko-ale tyahonekwa Mondaka ya Huku. (Ovil. 17:5-9, 13) Pamwe Onombangi mba Siovaa opo veliaamene tyina vamahungwa, venda umwe kombonge. (Ovil. 22:25; 25:11) Mahi pamwe ovatumini vatyo ovo umwe vapakako ovitumino opo vatalameke ovilinga vietu. (Ovii. 2:1-3) Tyina tupopilwa twahaivise vali, onthwe tulinga umwe ngovatumwa vapopile okuti: “Onthwe tutavela Huku, oe omutumini tutavela vali wapona ovanthu.” — Ovil. 5:29.

¹⁴ Hono, ovanthu vokulimphandela otyilongo tyavo valinga ovanyingi. Mokonda yovipuka ovio vili vala nokuvilapo, vokwivisa oviwa ovipe vakuluminywa vahalinge vali otyilinga otyo. Otyo tyesukisila ovanthu va Huku aveho vanoñgonoke nawa onondaka tuvasa momukanda Eholololo 14:9-12 mbupopia ‘okufenda kenyama no kotyilolo tyalio.’ Onthwe tutyii umwe nawa oityi Swau ankho ahanda okupopia etyi ati: “Opo pahanda ovasukuki vakoleleye, ava vokutavela ovitumino vya Huku, vakakatela meyumba-nthumbi liavo mu Sesusi.”

¹⁵ Mokonda yovilwa, novanthu vokutyitukilapo ovatumini, nokumoneswa ononkhumbi, novatumini vailika ovilinga vietu, pamwe katutyivili okufenda nawa-nawa Siovaa. Pamwe nii katutyivili okulinga nawa omaliongiyo, nokupopia novanthu voko Mbetele. Tupu pamwe omutalelipo womawaneno ketyivili vali okutalelapo omawaneno. Pamwe nomikanda vala katutambula-le vali. Ine ovipuka ovio vimonekapo, oityi una okulinga?

¹⁶ Linga umwe vala etyi uvila. Ine hamwe wike vala, upondola okulilongesa Ombimbiliya awike. Ovanthu vala vehehi vapondola okulingila omaliongiyo monondywo mbavo. Mokonda vena-le Ombimbiliya, vapondola okulilongesa omikanda vina twelilongaisa-le. Wahalinge otyiho, wahatile owoma. Omupika omukwatyili walunguka, kamasete-ale, mapopi novakulu vewaneno, avetupopila etyi tuna okulinga.

¹⁷ Namphila mwelikalela kokule na vakwenyi, mahi kuli kokule na Siovaa Nomona wae Sesusi Kilisitu. Ove soka umwe vala koviwa matukapewa. Siovaa matehelela omalikwambelo ove, ekupameka, ekwavela ononkhono. Likwambela kwe ekulekese etyi una okulinga. Wahalimbweko okuti ove umufendi wa Siovaa, umulanduli wa Sesusi Kilisitu. Naina, twalako okwivisa oviwa ovipe apeho tyina wetyivila. Likwatehila, Siovaa mekuyambe. Ya ovanthu tyina vamatale ononkhono ulinga, navo mavahande okufenda Siovaa. — Ovil. 4:13-31; 5:27-42; Fili. 1:27-30; 4:6, 7; 2 Tim. 4:16-18.

¹⁸ Ine ovanthu vokutuyele vati umwe matukwiipaa, ngeetyi tyalingilwe ovatumwa novalongwa ovakwavo va Sesusi, opo yumba umwe vala onthumbi “mu Huku, upindula-po vokwankhia.” (2 Kol. 1:8-10) Tyina uyumba-ko onthumbi yokuti vokwankhia mavakatutiliswa, opo motyivili okukoleleya tyina uyelwe. (Luka 21:19) Etyi tyalingile Kilisitu Sesusi tyokukoleleya tyina ankho amoneswa ononkhumbi, tyakwatesileko vakwavo okukoleleya etyi veli mononkhumbi. Noove ine ukoleleya tyina umoneswa ononkhumbi, mokwatesako vakwenyi navo avakoleleya. — Swau 16:33; Hemb. 12:2, 3; 1 Pet. 2:21.

¹⁹ Tyehekumoneswa vala ononkhumbi nokuyelwe, tyipondola hamwe una vali ovitateka ovikwavo. Vamwe tyivesoyesa unene tyina motelitoliu yavo ovanthu vahahande okuvetehelela. Vamwe vavela, ava ovakwavo pamwe kavetyivili vali okulinga ovipuka ankho valinga. Paulu nae wali novitateka ngoovio, avimutyiki okulinga ovilinga viae, ya vimwe ankho alinga ehevivili vali okuvilinga. (2 Kol. 12:7) Epafolonditu woko Filipu, wakaleleko kotyita tyo tete, ‘katyemukalele nawa [etyi omapanga ae] vemwiiva okuti wavelele.’ (Fili. 2:25-27) Ovipuka onthwe tulinga, neevi vilinga vakwetu mokonda tuvakwankhali vipondola okutweetela ovitateka vimwe ovinene. Pamwe tupondola okwehelivili na vana tufenda navo, atee umwe vamwe mombunga yetu. Mahi vana vaendela mweetyi Ombimbiliya ipopia, tyina ovipuka ovio viamamonekapo vetyivila okuvitetulula liwa-liwa. — Isek. 2:3-5; 1 Kol. 9:27; 13:8; Kolo. 3:12-14; 1 Pet. 4:8.

TUTAVELEI KU SESUSI KILISITU, OMUTWE WEWANENO

²⁰ Tuna okutavela ku Sesusi Kilisitu, una Siovaa akoya akale Omutwe wewaneno. (Kolo. 2:18, 19) Tuna okutavela ‘komupika omukwatyili walunguka’ no kovakulu vewaneno. (Hemb. 13:7, 17) Tyina tulinga ovipuka tupopilwa neongano, na tyina tutavela ku vana vetukalela komutwe, opo ngootyo matutyivili okulinga ovilinga vya Siovaa. Onthwe apeho tupandula unene otyipuka otyiwa twapewa na Siovaa tyokupopia nae melikwambelo. Nga tupakwa ñgo movikaleya, atwiikilwa-mo vala atwike, otyo katyitutyiki okupopia na Siovaa nokulikwatapo na vakwetu.

²¹ Tuna okulikwatehila atukoleleya, atuundapa unene movilinga twapewa viokwivisa oviwa ovipe. Ovilinga ovio, ovio Sesusi Kilisitu apele ovalongwa vae etyi atutiliswa. Wevetile: “Onwe endei, kalongesei ovanthu vomihoko aviho valinge ovalongwa vange, amuvembatisala menyina lya Tate, no Liomona no liomphepo ikola. Velongesei vetavele ovipuka aviho nemutuma. Ame ndyina onwe ononthiki ambuho atee konthyulilo youye ou.” (Mat. 28:19, 20) Twahanda okukoleleya ngeetyi tyalingile Sesusi. Ononthiki ambuho, tusokei kovipuka oviwa matukapewa komutwe wandyila. (Hemb. 12:2) Mokonda onthwe tuvalongwa va Sesusi, twambatisalwa-le, tyituhambukiswa okuundapa motyilinga etyi Sesusi atile matyikalingwa ‘konthyulilo youye.’ Watile: “Oviwa ovipe Viouhamba, mavikapopiwa kombanda yohi aiho, ovanthu aveho vomihoko nomihoko mwene avekeliivilako, onthyulilo pahe aiya.” (Mat. 24:3, 14) Ine hono tulipaka motyilinga etyi nomutima wetu auho, matukahambukwa tyina Siovaa ametwavela omwenyo wahapu mouye omupe!