EPULO 5

Oityi Mandyilingi Inkha Ndyilewa Kosikola?

OMOKONDA YATYI TYAKOLELA

Onkhalelo mokala ipondola okuvilisapo otyitateka ine okutyimanapo.

**OITYI UNA OKULINGA?**

Soka kuetyi: Tomas kahande okuenda hono kosikola. Ine muhuka. Ine onthiki onkhuavo. Palambale onohanyi ononthatu tunde apa vakuavo kosikola vemuleva. Pahe vemuluka enyina. Pamwe vaveta pomikanda vikahi pomaoko a Tomas iya avitoko ine pamwe vemukunyuna tyina aleuka ketyii olie wetyilinga. Monthiki onkhuavo, Tomas atambula onondaka mo Intertent mbumuleva nokumuhonga iya atili vali unene owoma . . .

Inkha ove Tomas, ñgeno walinga ñgeni?

TALAMA IYA OSOKO!

Ove hakuti watopa! Upondola okuliamena tyina ulewa mahi ohesukisa okulwa. Ñgeni?

VENIANGA. Ombimbiliya yati: “Otyova tyilekesa oñgeni tyikahi nokulitehelela mahi omunongo utualako apeho tyahiliya.” (Provérbios 29:11) Ankho utualako tyahiliya ovanthu vokukuleva vapondola okukuyeka.
UHEVEKONDOLELE. Ombimbiliya yati: “Muhakondolelei nawike otyivi notyivi.” (Romanos 12:17) Una unumana uvilisapo otyitateka.
LITYILIKA OTYIPONGA. Ombimbiliya yati: “Omunthu wokualunguka oyo una utala otyivi iya akaholama.” (Provérbios 22:⁠3) Apeho tyina tyitavela lityilika okukala povanthu vapondola okukuleva ine okulinga ovipuka viveavela omphitilo yokukuleva.
TYITALA NGATYINA VANYANA. Ombimbiliya yati: “Ekumbululo liapoleya, likondola onyengo.” (Provérbios 15:⁠1) Ove upondola okuhanumana. Mongeleka ankho umwe ukupopila okuti wanina unene upondola okupuma keimo oti, enga tyili “nesukisa umwe okuhoka katutu!”
TUNDAPO. Nora womanima 19, wapopia okuti: “Okuhapopi tyilekesa okuti ove wapama vali tyipona una wekuleva. Otyo tyilekesa okuti utyivila okulikondola omutima, otyituwa omunthu wekuleva ehena.”—2 Timóteo 2:⁠24.
PANDA ETYI OVE MUENE UKAHI. Ovanthu ovanyingi vokuleva vatala ovipuka ove uhahande ine vikunumanesa. Ngako pahe vahimbikila okukuleva.
POPILA OMUNTHU UMWE. Omulongesi umwe wapopia okuti: “Ame ndyiavela ondundo vana vekahi nokulewa vetyipopie. Otyo otyipuka tyaviuka upondola okulinga iya tyipondola okukuatesako vakuavo tyina valewa.”

Omukuendye uliyumba onthumbi putyina alewa — Okupanda etyi ove muene ukahi tyikuavela ononkhono, una wekuleva ehena

**SOKA KUETYI TYINA ULOLWA**
OTYILI INE OTYIKEMBO	OMAKUMBULULO
1 Okulikuela otyipuka tyilingwa tunde kohale.	1 Otyili. Ombimbiliya ipopia konthele Yomakihi. Enyina liao lihangununa okuti “vana valinga onya vakuavo.”—Gênesis 6:4.
2 Okulikuela otyinyano tyinumanesa. Hatyipuka otyinene.	2 Otyikembo. Ovakuendye ovanyingi veliipaa mokonda yokukuelwa.
3 Onkhalelo yaviuka opo vehekuleve vali okuvekondolela.	3 Otyikembo. Pamwe wokukuela uvilapo vali tyipona una ulewa, opo ovanthu vemutale omapita.
4 Inkha ulewa omokonda watopa.	4 Otyikembo. Monkhalelo oyo, katyitavela okumona otyipuka olilingisa ngatyi wehetyimuene. Ankho ove umona omunthu ulinga ngotyo ukahi nokuyawisa kotyitateka, kekahi nokutyitetulula.
5 Inkha umona omunthu ukahi nokulwa, ove linga ngoti kuetyimuene oende.	5 Otyili. Namphila vamwe vokukuela vakuavo velipakako, ovanyingi vakala tyahapamene iya valeva vakuavo opo velitehelele nawa..
6 Omunthu ukahi nokukukuela upondola okupiluluka.	6 Otyili. Nekuateso liavakuavo upondola okupilulula onkhalelo yae yokusoka novituwa viae.