Seoyanda Wakolele Omutima

Sesambele ankho una omona omuhikwena utiwa o Ataliya, ankho omukalavi nga ina. Ataliya anepwa Nohamba yoko Sundaa. Etyi ohamba yankhia, omona wae akala ohamba yomo Sundaa. Mahi etyi omona wae ankhia, Ataliya ngae ukala ohamba yomo Sundaa. Aipaa ovanthu aveho vatuka mohamba, novatekula vae eveipaa. Ovanthu aveho ankho vemutila owoma.

Omunene-nakwa Seoyanda nomukai wae Seosemba, ankho vetyii okuti ovipuka Ataliya ekahi nokulinga viapenga. Avaholeka omutekula wa Ataliya olukembe lutiwa o Seowasi, namphila tyipondola okuveipaesa. Veluholekele mondywo ya Huku.

Pweetyi Seowasi ena omanima epandu-vali, Seoyanda aongiya ovalume aveho ononkhalamutwe mbovita no vomuhoko wa Levii, evepopila okuti: ‘Yungei omapito ondywo ya Huku, mwahanyingile ovanthu.’ Seoyanda apake ohala komutwe wa Seowasi, Seowasi akala ohamba yo Sundaa. Ovanthu vomo Sundaa avapopila peulu okuti: ‘Kala nomwenyo omule hamba!’

Etyi Ataliya eiva ovanthu vaviela unene, aende no kondywo ya Huku. Etyi amona ohamba eliyavela ati: ‘Natyitukilwapo! Natyitukilwapo!’ Ovalume ononkhalamutwe mbovita avapolo onkhai-hamba onkhalavi aveitwala pondye aveiipaa. Mahi oñgeni ovipuka vina ovivi ankho alinga viakalesile ovanthu?

Seoyanda akwatesako ovanthu okulinga omphango na Siovaa, avati matufende vala Siovaa. Oo Seoyanda novanthu avahanye-po ondywo ya Mbaale novilolo viatyo. Seoyanda aholovona ovanakwa no vomuhoko wa Levii opo vaundape mondywo ya Huku, ovanthu pahe avafende vali Siovaa. Tupu aholovona ovanthu vayunge ondywo ya Huku opo mwahanyingile ovanthu vasila. Seoyanda novanthu ovakwavo avatwala Seowasi kondywo yohamba, avemupake kotyipundi tyoutumini. Ovanthu vomo Sundaa avahambukwa unene, mokonda pahe vapondola okufenda Siovaa, vayovoka kondingavivi Ataliya no kokufenda Mbaale. Wetyimona, Seoyanda wakwatesileko ovanthu ovanyingi mokonda wakolele omutima.