Omapulo Ovatangi
Pamwe mosukisa okusoka etyi vo mosipitali vapondola okulinga, netyi vahapondola okulinga nohonde yove. Oityi matyikukuatesako usoke nonondunge?
Ovanthu va Huku tyina vati pokukoya etyi mavahakulwa natyo kavasoko vala ku etyi mwene vahanda, nokutavela vala evi vapewa kosipitali, vena okutala umwe nawa etyi Ombimbiliya ipopia. Mokonda otyo, otyavo vala na Siovaa.
Siovaa wokwetutunga oe wetupopila okuti katupondola okulia ohonde. (Génesis 9:3, 4) Movitumino apele ovanthu vae Ova Isilayeli wevepopilile okuti kavapondola okulia ohonde mokonda ohonde omwenyo. Watile: “Omwenyo uli mohonde, ame nemupa ohonde opo mukohe nayo ononkhali mbenyi tyina mulinga ovilikutila komutala.” Mahi ine omunthu uhanda okwiipaa otyinyama alie ulinga ñgeni? Huku wati: “Una okutyipola ohonde yatyo eihihila pohi.”a (Levítico 17:11, 13) Siovaa otyipuka otyo ketyipopile vala like wetyiwana-wana. (Deuteronómio 12:16, 24; 15:23) Omukanda umwe utiwa chumash judaico, de Soncino, wati: “Ohonde kaipondola okupakwa nawa, ina umwe vala okuhihilwa pohi.” Ova Isilayeli ankho kavapondola okupaka nawa ohonde opo haa veilie, ankho vena umwe vala okwihihila pohi, mokonda hekulu yomwenyo o Huku.
Otyitumino otyo tyapwa vala etyi Mesiya ankhia. Mahi ku Huku na hono ohonde ikola. Ono apositolu vapopilile Ovakilisitau okuti: ‘Lityilikei ohonde.’ Otyitumino otyo, ovanthu ankho vena umwe okutyitavela, mokonda ankho tyikahi vala ngokulinga ovinepo vasila nokufenda ovilolo. (Ovilinga 15:28, 29; 21:25) Etyi pahe mouye auho otyipuka otyo tyokupakwa ohonde tyakaka unene, Onombangi mba Siovaa avetyimono umwe okuti otyipuka otyo tyilipona netyi Huku ahanda.b
Pamwe tyina omunthu umwe enda kosipitali akatandwa vemupopila apolwe ohonde aipakwa nawa haa eipakwa vali. Mahi okupolwa ohonde aipakwa nawa haa oipakwa vali, nokupolwa yove aipakwa mu mukwenyi katyelifwile netyi tyapopiwa mu Levítico nomu Deuteronómio. Ohonde kaipondola okupakwa nawa, ina umwe vala okuhihilwa pohi. Ngotyo tweikondolela Huku. Onombangi mba Siovaa kavalandula vali Ovitumino Viapelwe Moisesi. Mahi vetavela etyi Huku apopia okuti ‘lityilikei ohonde.’ Otyo vahapakela nawa ohonde mokonda vetyii okuti ‘ina okuhihilwa pohi,’ tupu kavapolwa ohonde yavo aipakwa vakwavo mokonda vetyii okuti Huku utyiyele.
Mahi pena ovipuka vimwe ovanthu valinga nohonde vihelipono novitumino vya Huku. Pamwe tyina omunthu enda kosipitaliakahakulwa upolwa ohonde na italwe ouvela patyi ena-o, tyina vameitale aveiyuvuhi. Mahi pamwe vekwita ulinge otyipuka tyimwe tyisukisa umwe ohonde onyingi.
Tyina omunthu atandwa ohonde yae pamwe wiipolwa aipakwa momakina pahe eipakwa vali. Otyipuka otyo tyilinga omapita mokonda ohonde kaikala vali nawa ngetyi mwene ankho ikahi. Tupu pamwe ohonde ina imutunda ipolwa-po aipakwa momakina aikohwa nawa akupolwa tyimwe tyitiwa glóbulos vermelhos ngotyo apakwa vali; Pamwe tyina omutima, nomapunga, nonoso, viahaundapa vali nawa, omunthu upolwa ohonde aipakwa momakina imwe, ngayo ilinga otyilinga ankho ñgeno tyilingwa novipuka ovio. Nkhele pamwe tyina vena apa veli nokuhakula, ohonde yatyo nkhele veipola-po aveipake momakina ha aveikondola-po vali. Tyimwe vapolela-mo ohonde oyo, okuhanda okuihonyeka novihemba ha avemupakeyo vali.
Tyiti umwe ava vahakula ñga ava vahakula ñga. Mahi omunthu kapopilwa-ko etyi ena okuhakulwa. Omunthu wa Huku oe muene utyii oñgeni mahakulwa. Tyina ehenehakulwe upondola okupopila ondotolo okuti ame nahanda okuhakulwa ñga, ohonde yange ina okulingwa ñga. Ulinga etyi omutima wae utavela. (Tala okakasa.)
Ovakilisitau vena okuhinangela okuti velipakula ku Huku tyihe otyo vala vei nawa otyitumino tyokuati: ‘una okuhumba Siovaa Huku yove nomutima wove auho, nomuenyo wove auho, nononkhono mbove ambuho, nomalusoke ove aeho.’ (Luka 10:27) Onombangi mba Siovaa, kavahande okulinga natyike tyinyona oupanga wavo na Huku. Ombimbiliya yapopia okuti: “Mokonda yomona wae, [Sesusi Kilisitu], tuayovolwa nofeto yeyovo alinga nohonde yae iya tuevelwa oviponyo vietu mokankhenda okanene ka Huku.” Otyo Omutungi wetu apopila okuti tuna okuyumba onthumbi mohonde ya Sesusi. — Ova Efesu 1:7.
[Onondaka Poutoi]
a Omulongesi umwe utiwa o Frank H. Gorman wahoneka okuti: “Tyina tuhihila pohi ohonde yovinyama tulekesa umwe okuti omwenyo wovinyama ukola tupu tulekesa okuti tuna onthilo na una wevitunga.”
b Omutala Womulavi 15 ya Julho yo 1959 wapopia umwe nawa omokonda yati tyapengela okupakwa ohonde.
[Okakasa/Omalutalatu]
LIPULA OKUTI
Pahe ine ndyikati ñgaa pokuhakulwa no nomakina, ohonde yange aitaamena monomakina omo, aihaende vali, mandyilingi ñgeni? Okuti mandyitavela ndyiipakwe vali, ine pahe ngotyo ina umwe vala “okunengulilwa pohi”?
Ine pokuhakulwa ohonde yange veimphola, aveihonyeka novihemba, aveimphake vali, okuti mandyikala umwe nomutima upumphi nawa?