Omaulo Konthele Yetyi Matyikamoneka Komutue

APOSTOLU Petulu wahoneka etyi matyikapita novanthu, no ohi komutue wandyila, okuti: “Kuna eulu epe noohi omphe tukahi nokukevelela ngetyi oe [Huku] alaa, muna mamukakala ouviuki.” (2 Pedro 3:13) Omuuli Isaia oe wapopile tete konthele yomulao “weulu epe nouye omupe.” (Isaías 65:17; 66:22) Etyi Petulu apopia konthele yeulo olio, walekesile okuti momuvo wae eulo olio kaliafuisilwepo aliho.

Konyima, menima 96 Pomuvo wa Kristu, apostolu João watolelua memonekelo konthele “yoohi omphe,” no nonkhano onongwa mambuetua Nouhamba wa Huku. (Revelação 21:1-4) Onondaka mbapopiwa na Jesus, na apostolu Paulu konthele yonkhalelo youye etyi nkhele Ouhamba wa Huku uheneye, pahe mbukahi nokufuiswapo. Moluotyo, tupondola okukevelela okuti apa katutu Ouhamba oo, maukaeta ouye omupe. Ouye oo omupe maukakala ñgeni? Omukanda wa Isaia ututolela tyo.

Ononkhano Onongwa Mouye Omupe

Ombembwa, Nefendelo Like Vala Ouye Auho. “Iya omitunga viavo mavekevinthila omatemo, iya omaonga avo avekeenthila onofoso. Kamavekeliluisa vali, tupu kavekelilongesa vali ovita.”—Isaías 2:2-4.

Ombembwa Pokati kovanthu Novinyama. “Tyotyili, ehunyu malikakala kumue nondyona, tupu onkhapi maikakala kumue notyiketa, nonthane, notyiketa tyonkheyama, novinyama ovikuavo aviho kumue, iya omukuendye omututu oe mekevilisa. Iya ongombe, nehunyu mavikalia kumue, oviketa viavo mavikakala pamue. Alo umue onkhulika maikalia eholi ngo ngombe. . . . Kambukevenumata ine okukalinga omapita komphunda yange ikola aiho, mokonda oohi aiho maikeyula enoñgonoko lia Jeova, ngetyi omeva eyula melunga.”—Isaías 11:6-9.

Okulia Okunyingi Pala Ovanthu Aveho. ‘Jeova ongombo yovita, makalingila aveho vekahi komphunda oyo okulia kumue kuapepa nawa kuna omulela, novinyu ipepa nawa.’—Isaías 25:6.

Kamakukala Vali Ononkhia. “Oe [Huku] makamanako ononkhia apeho, iya Ohamba Tatekulu Jeova, makasekuna ononkhuka kovipala aviho. Makapola olukundo kovanthu vae aveho pano pohi, mokonda Jeova oe muene wetyipopia.”—Isaías 25:8.

Vokuankhia Mavakatutila. “Ovivimbi viange mavikapindukapo. Pindukeipo, nokukuiilila nehambu, onwe mukahi mombuelo yeheke! . . . O ohi maikondola vana vokuankhia.”—Isaías 26:19.The New English Bible.

Mesiya Omukoyesi Omuviuki. “Kamakakoyesa ngatyina amona nomaiho ae, ine o ngatyina eiva vala nomatwi ae. Makakoyesa omapongo nouviuki, iya akaava eviyulo nouviuki, pala ouwa wonondalaua.”—Isaías 11:3, 4.

Ovamphoki, Novimpholo Mavakahakulua. “Omaiho ovamphoki maakapatuluka, omakutui onompholo maakahituluka.”—Isaías 35:5.

Mehoko Mamukayela Ovikuna. “Ehoko, no ohi yakukuta mavikahambukwa, otyipembe matyikeliyolela mokonda mamukatema ononthemo. Tyotyili mamukatema ononthemo, atyikuiilila nehambu enene.”—Isaías 35:1, 2.

Oohi Omphe. “Mandyilingi eulu epe [outumini omupe keulu], noohi omphe [ovanthu ovaviuki mouye omupe]; iya ovanthu kamavakahinangela vali ovipuka viokohale, tupu kamavikeya vali komutima. Anthi, lombokei hambukwei apeho mokonda yovipuka ndyikahi nokutunga. . . . [Vana mavakakala mouye omupe wa Huku] tyotyili, mavakatunga onondyuo avakalamo, mavakatuika omiti avakalia ovinyango viatyo. Kamavakatunga iya mukuavo ngae ukalamo, kamavakatuika iya mukuavo ngae ukalia. Mokonda ononthiki mbelongo liange mambukakala ngononthiki mbomuti, iya ovanthu aveho mavakalinga ovilinga vieta ehambu liotyotyili. Kamavalingi ovilinga tyahapoloko esilivilo, kamavakatyita pala ononkhumbi, mokonda ovo novana vavo vapewa ononkhano onongwa na Jeova. Iya matyikamoneka okuti putyina nkhele veheneihane, ame muene mandyiketavela, putyina nkhele vekahi nokupopia, ame muene mandyitehelela.” Jeova wapopia okuti: “‘Ngetyi eulu epe, no ohi omphe ame nalinga vikahi ponthele yange, otyo mavakala ovana venyi, nenyina lienyi.’”—Isaías 65:17-25; 66:22.

Ombimbiliya Yapopia Ouwa Matukapewa Komutue Wandyila

Omukanda wa Isaia haoko vala upopia ononkhano onongwa ovanthu mavakapewa komutue wandyila. Ombimbiliya ina omaulo omanyingi apopia ovipuka oviwa Huku makafuisapo Nouhamba wae maukatuminua na Kristu.a Okuti ove uhanda okukala momphangu oyo yombembwa? Tyotyili upondola okukakalamo! Ovola okutala ove muene etyi Ombimbiliya tyili ilongesa konthele yovipuka oviwa Huku makalinga komutue wandyila, nokulilongesa oityi una okulinga opo ukakalemo. Onombangi mba Jeova mavahambukwa no kukukuatesako.

[Onondaka Poutoi]

[Olutalatu pefo 8]

Ovanthu mavakakala nombembwa kese umue namukuavo, novinyama

[Olutalatu pefo 9]

Vokuankhia mavakakala vali nomuenyo

[Olutalatu pefo 10]

Oohi aiho maikakala omphangu yombembwa