“Ou Nkhele Hamuvo Wange Wokunkhia”
Omusingi umue wetukutuku enene, ketyivilile okuviukisa nawa, etukutuku liae aliyapuka metapalo alikapuma ovalinepi, nomukuendye ankho una omanima 23. O jornale yoko Nova York yati, ovalinepi vankhila umue opo, iya omukuendye aseluluka. Etyi apindukapo iya atale etyi tyapitapo, wasoka okuti: ‘Ame hitavela okuti otyipuka etyi otyili. Mbambavo Huku, uhayeke ndyinkhie.’ Apopi okuti: “Ou nkhele hamuvo wange wokunkhia.”
OVE hamue weiviliale omahipululo omanyingi elifwa noo. Tyina omunthu amavasiwa notyiponga iya ahankhi, ovanthu vehole okupopia okuti ‘ou hamuvo woveko wokunkhia,’ mahi, inkha omunthu ankhia, ovo vapopia okuti ‘omuvo wae wehikapo,’ ine ‘olio ehando lia Huku.’ Tyikale ovanthu vapopia okuti, otyo ankho tyina okupita umue nae, elao, ine Huku, olusoke luavo luike vala. Ovanthu ovanyingi vetavela okuti ovipuka vihole okupita momuenyo wavo, ankho viaholovonuale, iya petupu vali natyike vapondola okulinga. Olusoke olo, luatukale kohale.
Mongeleka, ovanthu Mombambilonia kohale, ankho vetavela okuti omuenyo wovanthu uhongolelwa no nonthungululu. Ovo ankho vatala peulu pala okuovola enyingilikilo liokuhongolela omuenyo wavo. Ova Gregu nova Roma, ankho vafenda huku yomukai ankho una epondolo liokupopia etyi matyikapita nomunthu komutue. Ovikando vimue huku yomukai ankho unguanguanesa alo umue ehando liono huku Zeus na Júpiter.
Ova Hindu nova Budista, vetavela okuti ovipuka omunthu alinga hono, elekeso yetyi alingile momuenyo puetyi nkhele ehenetyitue, iya ovipuka alinga hono, ovio mavilekesa oityi matyikapita nae momuenyo omukuavo. Onongeleya ononkhuavo, novikapela ovinyingi veliti Ovakristau, tupu vetavela komatavelo oo, okuti kese omunthu waholovonenuale etyi matyikapita nae komutue.
Tyotyili, alo umue ovanthu vana mononthiki mbetu vapopiwa okuti vena enoñgonoko, nkhele vetavela okuti onkhalelo yavo yomuenyo, novipuka valinga kese nthiki, netyi matyikapita navo komutue, viaholovonuale tunde kohale, iya petupu vali etyi vapondola okulinga. Okuti ongotyo ove usoka konthele yomuenyo? Okuti ovipuka vipita momuenyo wovanthu, ovivi, noviwa, alo umue okutyitwa, nokunkhia, viaholovonuale? Okuti nove utavela okuti Huku waholovonale etyi matyikapita momuenyo wove? Tutalei oñgeni Ombimbiliya maitukuatesako okukumbulula omapulo oo.
[Olutalatu Lualandwa pefo 3]
Ken Murray/New York Daily News