Hetekela Jesus—Okulongesa Nohole
“Katunemone omunthu upopia nga una.”—JOÃO 7:46.
1. Oñgeni onkhalelo ya Jesus yokulongesa yakalesile ovanthu?
SOKA oñgeni tyakalesile ovanthu okutehelela etyi Jesus alongesa! Ombimbiliya ilekesa oñgeni akalesile ovanthu ankho vemutehelela. Omuhoneki wo Evandyeliu ya Luka wapopia okuti ovanthu mepundaumbo lia Jesus, “vahimbika . . . okuhuva mokonda yonondaka mbuhika komutima ankho mbutunda momulungu wae.” Mateusi wati vana ankho vatehelela Jesus etyi alongesa Melongomona lio Komphunda, ‘vakalele tyahuva nonkhalelo yae yokulongesa.’ Iya João walekesa okuti omafualali atuminwe okukakwata Jesus akondoka mankhanya, aati: “Katunemone omunthu upopia nga una.”—Lucas 4:22; Mateus 7:28; João 7:46.
2. Ononkhalelo patyi mbokulongesa ankho Jesus aundapesa?
2 Omatolopa oo kaakembele. Tyotyili Jesus wali Omulongesi wavilapo. Ankho ulongesa monkhalelo yayandyuluka nokuapepuka okunoñgonoka, petupu nawike upondola okupatana. Waundapesile nounongo onongeleka nomapulo. Jesus ankho ulongesa okutala konkhalelo yovanthu ankho apopila, tyilinge vatanga unene ine kavatangele. Otyili alongesa ankho tyapepuka okunoñgonoka, namphila ankho tyili tyaya kohi. Anthi, ovipuka ovio, havioko viakalesile Jesus Omulongesi omunene.
Otyituwa Tyakolela Vali AnkhoEna, Ohole
3. Oñgeni Jesus ankho elikalela nononkhalamutwe mbonongeleya kononthiki mbae?
3 Pokati kovanongo vovihonekwa no va Faliseu, tyafuile ankho pena ovalume vena enoñgonoko, ankho vena ounongo wokulongesa. Oityi tyakalesile Jesus omulongesi welikalela novanthu ovo? Ononkhalamutwe mbonongeleya kononthiki oko, ankho vetupu ohole novanthu. Ankho vevepenyenyeka, nokuvetala ngatyina “ovanthu vahinganwa.” (João 7:49) Anthi, Jesus ankho una okankhenda novanthu, mokonda ankho “vakunyauninwa vala kononthele ambuho, ngo nongi mbuhena omunthita.” (Mateus 9:36) Jesus ankho omunakhenda, ondyandyi, no kuna ohole. Tupu, ononkhalamutwe mbonongeleya, ankho vetupu ohole yotyotyili na Huku. (João 5:42) Anthi, Jesus ankho uhole Tate yae, no kuna ehambu liokulinga ehando liae. Ononkhalamutwe mbonongeleya ankho vatomba onondaka mba Huku, mokonda yomahando avo. Mahi, Jesus ankho uhole “ondaka ya Huku.” Oe weilongesa, nokuhangununa, nokuiyakulila, nokuendela movitumino viayo. (Lucas 11:28) Kristu walekesa ohole monkhalelo yomuenyo wae auho, no mokulongesa kuae, monkhalelo ankho atekula ovanthu nokuvelongesa.
4, 5. (a) Omokonda yatyi tyakolela okulongesa nohole? (b) Pokulongesa, omokonda yatyi enoñgonoko nounongo tupu viakolela?
4 Iya onthue? Mokonda tuvalanduli va Kristu tuhanda okumuhetekela movilinga vietu viokuivisa no momuenyo wetu. (1 Pedro 2:21) Ngotyo, ehando lietu hakukala vala nenoñgonoko Liombimbiliya, mahi tusukisa okukala novituwa via Jeova, haunene ohole. Tyilinge tuna enoñgonoko enyingi ine kalihi, ounongo ounyingi wokulongesa ine kauhi, okukala nohole matyitukuatesako okulongesa monkhalelo ihika komitima via vana tuivisa. Opo tukale ovanongo movilinga vietu viokulinga ovalongwa tuna okuhetekela Jesus okulongesa nohole.
5 Tyotyili, opo tukale ovalongesi ovawa, tuesukisa okunoñgonoka etyi tulongesa nounongo wokutyilongesa vakuetu. Jesus wakuatehileko ovalongwa vae, okukala nenoñgonoko nounongo oo. Tupu hono Jeova neongano liae utukuatesako okulinga ngotyo. (Tanga Isaías 54:13; Lucas 12:42.) Moluotyo, tuesukisa okulongesa nomalusoke etu nomitima vietu. Tyina tulongesa nenoñgonoko, nounongo, nohole matukuatesako ovanthu ovanyingi. Omononkhalelo patyi tupondola okulekesa ohole tyina tulongesa? Oñgeni Jesus novalongwa vae vetyilinga? Tutalei.
Tuna Okukala Nohole na Jeova
6. Oñgeni tupopia konthele yomunthu tuhole?
6 Onthue tuna ehambu liokupopia konthele yovipuka tuhole. Tyina tupopia otyipuka tuhole, tutyipopia nomutima auho nehambu. Tulinga ngotyo, haunene tyina tupopia konthele yomunthu tuhole. Tuhanda okupopila vakuetu ovipuka twii konthele yomunthu oo. Tumunkhimaneka, nokumuhumba, nokumuamena. Tulinga ngotyo, mokonda tuhanda vakuetu navo vapande omunthu oo novituwa viae.
7. Ohole Jesus ankho ena na Huku yemulundile okulinga tyi?
7 Tyina nkhele tuhenevatele vakuetu okukala nohole na Jeova, onthue muene tuna okumunoñgonoka nokukala nohole nae. Ngotyo, ohole na Huku oyo ehina liefendelo liotyotyili. (Mateus 22:36-38) Jesus waava ongeleka ongwa. Oe walekesa okuti uhole Jeova nomutima auho, nomuenyo auho, nononkhono mbae ambuho. Jesus wii nawa Tate yae keulu, mokonda wakala nae omanima omanyingi unene. Otyo tyemulongesa tyi? Jesus wati: “Ame ndyihole Tate.” (João 14:31) Jesus walekesa ohole oyo muatyiho apopia netyi alinga. Ohole yemupele ondundo yokulinga apeho ovipuka vihambukiswa Huku. (João 8:29) Yemulundile okuhololola ounkhembi wononkhalamutwe mbonongeleya, ankho velikembesa okuti valingila Huku. Tupu, yemulundile okupopia konthele ya Jeova nokuvatela vakuavo okunoñgonoka Huku nokukala nohole nae.
8. Ohole na Huku yalundile ovalongwa va Jesus okulinga tyi?
8 Ngetyi tyalingile Jesus, ovalongwa vae votete vali nohole na Jeova. Iya ohole oyo aivepe ondundo yokuivisa onondaka onongwa nombili nokuakola omutima. Aveyulisa o Jelusalei aiho nondongeso yavo, namphila ankho veyelwe nononkhalamutwe mbonongeleya. Ovalongwa ankho kavapondola okuyekapo okupopia ovipuka vamona nevi veiva. (Atos 4:20; 5:28) Ankho vetyii okuti Jeova ukahi navo meveavela ononkhano onongwa, iya evekuatesako umue tyili! Etyi palamba omanima 30 konyima yononkhia mba Jesus, apostolu Paulu ahoneka okuti, onondaka onongwa mbaiviswale “kovanthu aveho mombuelo yeulu.”—Colossenses 1:23.
9. Oñgeni matupameka ohole tuna na Huku?
9 Inkha tuhanda okukala ovalongesi ovanongo, tupu tuesukisa okutualako okupameka ohole tuna na Huku. Oñgeni matuipameka? Onthue apeho tutomphola na Huku melikuambelo. Tupu, tupameka oupanga wetu tyina tulilongesa Ondaka yae, nokutanga omikanda vitunda Mombimbiliya, na tyina tukahi momaliongiyo Ovakristau. Putyina tutualako okunoñgonoka Huku, omitima vietu mavikala vieyula ohole nae. Iya tyina tulekesa ohole tuna na Huku muevi tupopia nevi tulinga, vakuetu mavetyimono iya atyivekokela ku Jeova.—Tanga Salmo 104:33, 34.
Tuna Okupanda Etyi Tulongesa
10. Oityi tyikalekesa omunthu omulongesi omuwa?
10 Otyipuka tyimue matyikukalesa omulongesi omuwa, okupanda etyi ulongesa. Una okutavela okuti etyi ulongesa otyili, nokuakolela. Inkha omulongesi asuka netyi alongesa, ehambu liae malimoneka, tupu malilundu vana alongesa. Anthi, inkha omulongesi kampande etyi ekahi nokulongesa, oñgeni omulongwa mapande etyi ekahi nokulongeswa? Ongeleka yove mulongesa Wondaka ya Huku yakolela unene komulongwa. Jesus wati: “Kese una walongesua nawa, makala ngomulongesi wae.”—Lucas 6:40.The New Berkeley Version in Modern English.
11. Jesus ankho uhole etyi alongesa mokonda yatyi?
11 Jesus ankho uhole etyi alongesa. Ankho utyii okuti una otyipuka tyakolela pala okuivisa. Otyipuka otyo, otyili konthele ya Tate yae keulu, “onondaka mba Huku” no “nondaka mbomuenyo wahapu.” (João 3:34; 6:68) Ngetyi otyimimi tyiliaima, otyili Jesus aivisa tyahololola ovipuka ovivi, nokulekesa nawa ovipuka oviwa. Otyili tyaetela ovanthu ekevelelo nokuungumanesa vana veliola omitima, ankho vakembwa nononkhalamutwe mbonongeleya mbomatutu nokumoneswa emone Neliapu. (Atos 10:38) Ohole Jesus ankho ena notyili, kaimonekela vala kuetyi alongesa, mahi no kuaviho alinga.
12. Apostolu Paulu ankho ulitehelela ñgeni konthele yonondaka onongwa?
12 Nga Jesus, novalongwa vae ankho vehole unene otyili konthele ya Jeova na Kristu nokuetyipanda. Moluotyo, onondyale kavetyivilile okuvetyilika okutyipopila vakuavo. Paulu wahonekelele Ovakristau mo Roma okuti: “Ndyina ondundo onene yokuivisa onondaka onongwa . . . Tyetyi ame ndyitupu ohonyi yonondaka onongwa. Mokonda ombo ononkhono mba Huku pala eyovo lia kese munthu una ekolelo.” (Romanos 1:15, 16) Ku Paulu otyilinga tyokuivisa ankho elao enene. Oe wahoneka okuti: “Ame . . . nalingilwa okankhenda nahatokalele, opo ndyipopile omalongo onondaka onongwa konthele yomalumono ahaelekwa a Kristu.” (Efésios 3:8) Katyipuiya okusoka ehambu Paulu ankho ena liokulongesa vakuavo konthele ya Jeova nehando Liae.
13. Omokonda yatyi tuesukisila okukala nohole nonondaka onongwa?
13 Onondaka onongwa mbukahi Mondaka ya Huku mbutuvatela okunoñgonoka Omupakeko wetu, nokulinga oupanga omuwa nae. Onondaka ombo onongwa mbuava omakumbululo komapulo akolela momuenyo. Mbutuavela ekevelelo, nokutupameka pomivo viononkhumbi. Tupu, mbutupopila konthele yomuenyo omuwa uhakapwa vali. Kutupu enoñgonoko liakolela vali tyipona onondaka onongwa. Otyili otyo, otyipuka tyakolela tuaavelwa, tyituetela ehambu enene. Tyina tupopila vakuetu otyili otyo, ehambu lietu liliyawisa vali.—Atos 20:35.
14. Oñgeni tupondola okupameka ohole yetyi tulongesa?
14 Oityi upondola okulinga opo upameke vali ohole una no nondaka onongwa? Okutanga Ondaka ya Huku, nokutalama ovikando vimue pala okusokolola nawa etyi watanga. Mongeleka, soka ñgeno ukahi nokulandula Jesus mokueenda kuovilinga viae pano pohi, ine ulinga oungendi no apostolu Paulu. Soka ñgeno ukahi mouye omupe, nokusoka oñgeni omuenyo maukakala tyelikalela. Soka ouwa unale mokonda yokuetavela onondaka onongwa. Inkha utualako okupameka ohole una monondaka onongwa, vana ulongesa navo mavakala nohole ngoyo. Moluotyo, tuesukisa okusokolola nawa etyi tulilongesa, nokutala nawa etyi tukahi nokulongesa.—Tanga 1 Timóteo 4:15, 16.
Tuna Okukala Nohole Novanthu
15. Omokonda yatyi otyiwa omulongesi akale nohole novalongwa?
15 Omulongesi omuwa ulongesa monkhalelo yungumanesa ovalongwa vae, opo vakale nehambu liokulongeswa nokukumbulula tyina valongeswa. Omulongesi wokuna ohole wavela ovalongwa vae enoñgonoko mokonda una esuko enene navo. Tyina evelongesa utala komasukasuka ovalongwa, noñgeni vanoñgonoka etyi valongeswa, nonkhalelo yavo. Tyina ovalongesi vena ohole ngoyo, ovalongwa vetyiimbuka, iya otyo tyihambukiswa omulongesi nomulongwa.
16. Omonkhalelo patyi Jesus alekesa okuti una oluembia novanthu?
16 Jesus ankho una okankhenda nohole ngoyo. Walekesa ohole yae yavilapo vali etyi apakula omuenyo wae uhena onkhali, opo ayovole vakuavo. (João 15:13) Mokueenda kuovilinga viae viokuivisa, Jesus kepuilile okuvatela ovanthu nokuvelongesa konthele ya Tate yae. Ankho kakevelela ovanthu veye okumuovola. Anthi, oe ankho ulinga oungendi omunene okuendela pohi, opo ekevepopile onondaka onongwa. (Mateus 4:23-25; Lucas 8:1) Ankho wii onkhalelo yovanthu nokuapwa elundo. Tyina ovalongwa ankho vesukisa okuviyulwa, utyilinga noluembia. (Marcos 9:33-37) Wevepele ondundo opo vakale nonthumbi yokuti mavakala ovalongesi ovanongo vonondaka onongwa. Kakunekale omulongesi wo kuna oluembia nga Jesus. Oluembia ankho Jesus ena novalongwa vae, luevelundile okukala nohole nae, nokuendela movitumino viae.—Tanga João 14:15.
17. Oñgeni ovalongwa va Jesus valekesile okuti vena ohole na vakuavo?
17 Nga Jesus, ovalongwa vae navo ankho vena ohole onene novanthu vana ankho valongesa. Vatuaileko okulongesa vakuavo nokuivisa onondaka onongwa, namphila otyo ankho tyiveetela ononkhumbi nokupaka omienyo viavo motyiponga. Tyotyili, vali nohole na vana vatavela onondaka onongwa! Onondaka mbo apostolu Paulu mbulekesa nawa ohole oyo. Wahoneka okuti: “Onthue tuakala ovapoleyi pokati kenyi, nga ina wokuna oluembia ulela ovana vae. Mokonda yoluembia tuna nonwe, tuakala nehambu liokumupopila onondaka onongwa mba Huku, nokumuavela omienyo vietu, tyetyi tumuhole unene.”—1 Tessalonicenses 2:7, 8.
18, 19. (a) Omokonda yatyi tulingila ononkhono opo tutualeko novilinga viokuivisa? (b) Popia ongeleka imue ilekesa okuti ohole tuna imoneka ku vakuetu.
18 Tupu, mononthiki mbo hono, Onombangi mba Jeova vaivisa onondaka onongwa ouye auho, okuovola vana vahanda okunoñgonoka Huku nokumuumbila. Momanima 17 okualamba, tuaundapa onoola ononyingi unene kese nima, movilinga viokuivisa nokulinga ovalongwa. Na hono tutualako novilinga ovio. Tulipakula onthue muene movilinga viokuivisa, namphila tyihanda tuave omuvo wetu, nononkhono, nomalumono etu. Nga Jesus, onthue tutyii okuti Tate yetu woluembia keulu, uhanda ovanthu vakale nenoñgonoko lituala komuenyo wahapu. (João 17:3; 1 Timóteo 2:3, 4) Ohole itulunda okuvatela vomitima viaviuka okunoñgonoka Jeova nokukala nohole nae ngetyi onthue tumuhole.
19 Ohole tuna novanthu imoneka ku vakuetu. Tala ongeleka yomphange umue omukokoli-ndyila ko Estadu Unidu, uhoneka omikanda pala okuungumanesa vana onombunga mbavo vanyima. Iya omulume umue emuhonekela okuti: “Otyipuka tyotete nahuvila, omunthu walinga ononkhono mbokuhonekela una ehei, opo emupameke momuvo wovitateka. Ame ndyitavela okuti ove una ohole novanthu nohole na Huku una uhongolela ovanthu monondyila mbomuenyo.”
20. Omokonda yatyi tyakolela okulongesa nohole?
20 Omulume umue wati, tyina ohole nounongo viundapela kumue, upondola okulinga ovilinga oviwa. Movilinga vietu viokulongnesa, tuovola okukuatesako ovalongwa vetu okunoñgonoka Jeova nokukala nomutima umuhole. Tyotyili, opo tukale ovalongesi ovanongo, tuesukisa okukala novipuka vitatu—ohole na Huku, ohole notyili, nohole novanthu. Tyina tuna ohole ngoyo, nokuilekesa movilinga vietu viokuivisa, tukala nehambu liokuava. Tupu, tukala nehambu liokunoñgonoka okuti tukahi nokuhetekela Jesus nokuhambukiswa Jeova.
Oñgeni Ove Mokumbulula?
• Tyina tulongesa vakuetu onondaka onongwa, omokonda yatyi otyiwa tukale . . .
nohole na Huku?
nohole netyi tulongesa?
nohole na vana tulongesa?
[Ehangununo liolutalatu pefo 17]
Oñgeni onkhalelo ya Jesus yokulongesa ankho yelikalela no yovanongo vovihonekwa no va Faliseu?
[Ehangununo liolutalatu pefo 20]
Okulongesa nawa tyesukisa enoñgonoko, nounongo, haunene ohole